ლანჩხუთის მუნიციპალიტეტის 2015 წლის ბიუჯეტის დამტკიცების ადმინისტრაციული წარმოება კი დაიწყო, მაგრამ საკრებულოში შემოტანილ საკითხის ირგვლივ ძალიან ბევრი კითხვა გაჩნდა. ბიუჯეტის შემოთავაზებული ვარიანტის განხილვა მხოლოდ განხილვისთვის რომაა და უკან რომ გაბრუნდება, ეს დეპუტატთა განწყობიდან ერთი შეხედვითაც კარგად ჩანს.
ფაქტობრივად, ლანჩხუთის მუნიციპალიტეტის საკრებულოში არ მოიძებნება ერთი ადამიანიც კი, ბიუჯეტის პროექტი რომ მოსწონდეს. ბუნებრივია, შეფასებებში ოპოზიცია აქტიურობს და კრიტიკის ქარცეცხლში ატარებს დოკუმენტს. რამდენიმე ნიშანდობლივი მოსაზრება საკრებულოს რიგგარეშე სხდომაზეც გაჟღერდა _ დეპუტატი გიორგი გოგუაძე დაინტერესდა, "თუ იყო წარდგენილი დოკუმენტი ფინანსთა სამინისტროში, რა მუხლები დაიცვეს ან ვერ დაიცვეს გამგებელმა და საკრებულოს თავმჯდომარემ იქ. რატომაა ხელფასები რიგ სამსახურებში 16 თვეზე გათვლილი (აქედან, ოთხი თვე პრემიებია), ხოლო სამხედრო და სამაშველო სამსახურებზე _ 13 თვეზე, ა(ა)იპ-ებში კი _ 12 თვეზე, რატომაა დასუფთავების მუხლში იგივე თანხა გათვალისწინებული, მაშინ, როცა გამგებლის თქმით, 250 ცალი ბუნკერი და ორი მანქანა უნდა დაემატოს, სოფლებიდან უნდა მოხდეს ნაგვის გატანა, ეს ხარჯებს არ ზრდის? არც წყლების მოვლა-პატრონობის ხარჯები ჩანს, არადა, სამსახური შექმნილია".
დეპუტატმა ნონა მურვანიძემ ვერ გაიგო, რატომ შემცირდა სკოლამდელი აღზრდის ცენტრის ბიუჯეტი, მაშინ, როცა მონიტორინგის დასკვნის საფუძველზე, შეიძლება უკლებლივ ყველა ბაღი დაიხუროს. პირიქით, თანხებს უნდა ვამატებდეთ, რომ ეს ასე არ მოხდეს. ბაღების თემა ია ჩხაიძემაც გაიზიარა. სოციალურ საკითხთა კომისიის თავმჯდომარის აზრით, პრიორიტეტი მომავალი თაობების აღზრდა უნდა იყო: _ სანამ არ განისაზღვრება პრიორიტეტები, ბიუჯეტს მხარს არ დავუჭერ. მით უმეტეს, სოციალურ, განათლების და კულტურის სფეროში თანხები შარშანდელთან შედარებით შემცირებულია, _ თქვა ჩხაიძემ.
დეპუტატმა დარეჯან ბურჭულაძემ თქვა, რომ ბიუჯეტის გადახედვისას "გული კინაღამ გაუსკდა": "ხელისუფლება როცა მოდიოდა, მესამე წელს გადამწყვეტად მიიჩნევდა. გადავხედე ბიუჯეტის პროექტს და გული კინაღამ გამისკდა. განსაკუთრებით, ა(ა)იპ-ების ბედი მაღელვებს _ რას ვერჩით მათ, 50 ბავშვს ძიძა 160 ლარად უნდა უვლიდეს და აქეთ ხელფასები 16 თვეზე იყოს? ვერ გამიგია ტურიზმის განვითარების ცენტრის ბიუჯეტი 60 ათასი ლარი იყო და სამომავლოდ მასთან ერთად კიდევ ორი სამსახურის გაერთიანების შედეგად შექმნილ "მონსტრ" ა(ა)იპ-ის 100 ათასი ლარი როგორ უნდა ეყოს?"
ბიუჯეტის პირველადი ვარიანტის დამტკიცების ადმინისტრაციულმა წარმოებამ დროის ათვლა კი დაიწყო, მაგრამ წინ დიდი ბრძოლა იქნება ყველასთვის სასურველი ბიუჯეტის მისაღებად, ყველა სფეროს საკუთარი მოსაზრება გააჩნია. მთავარ კითხვად რჩება _ რას მიენიჭება პრიორიტეტი?
