საგარეო საქმეთა სამინისტროში საქართველოში აკრედიტებულ დიპლომატიური კორპუსის წარმომადგენლებთან საგანგებო შეხვედრა გაიმართა. მინისტრმა და მინისტრის მოადგილეებმა დიპლომატებს გააცნეს საქართველოს პოზიცია რუსეთის ფედერაციასა და აფხაზეთის საოკუპაციო რეჟიმს შორის ე.წ. "მოკავშირეობისა და სტრატეგიული პარტნიორობის შესახებ ხელშეკრულების" გაფორმების შესახებ.
დიპლომატიურ კორპუსთან შეხვედრაზე ყურადღება გამახვილდა იმ საფრთხეებზე, რასაც აღნიშნული ე.წ. ხელშეკრულება უქმნის არა მხოლოდ რეგიონს, არამედ ზოგადად ევროპულ უსაფრთხოებას.
დიპლომატიური კორპუსის წარმომადგენლებთან შეხვედრაზე, საქართველოს საგარეო საქმეთა მინისტრმა, კიდევ ერთხელ მოუწოდა საერთაშორისო თანამეგობრობას დაგმოს რუსეთის ფედერაციის ქმედებები, რომელიც ეწინააღმდეგება საქართველოს სუვერენიტეტსა და ტერიტორიულ მთლიანობას და ასევე წარმოადგენს საერთაშორისო სამართლის ნორმების უხეშ დარღვევას.
დიპლომატებს ასევე მიეწოდათ ინფორმაცია იმ ღონისძიებების შესახებ, რომელსაც საგარეო საქმეთა სამინისტრო რუსეთის ქმედებების წინააღდეგ საერთაშორისო ასპარეზზე განახორციელებს.
