თავდაცვის სამინისტროს მაღალჩინოსნების საქმის (ე.წ. კაბელების საქმე) ნაწილს საიდუმლო გრიფი მოეხსნა . ეს განცხადება რამდენიმე წუთის წინ მთავარ პროკურატურაში სპეციალურ ბრიფინგზე გააკეთეს.
პროკურორმა კოკა კაციტაძემ განმარტა, რომ გრიფი დარჩა საქმის მხოლოდ იმ ნაწილზე, რომელიც შეიცავს ქვეყნის სამხედრო უსაფრთხოებასთან დაკავშირებულ საიდუმლო ინფორმაციას.
რაც შეეხება დანარჩენ მასალებს, პროკურორის განცხადებით, ის გადაეცემა ადვოკატებს. გრიფ საიდუმლოს სტატუსის მქონე ნაწილს კი, როგორც პროკურატურაში განმარტეს, ყველა მხარე შესაბამისი პროცედურების დაცვით გაეცნობა.
პროკურორმა კოკა კაციტაძემ სპეციალურ ბრიფინგზე საგანგებოდ განმარტა საქმეზე გრიფ საიდუმლოს მინიჭების მიზეზი და აღნიშნა, რომ რადგანაც საქმე ეხებოდა თავდაცვის სამინისტროს მიერ საიდუმლო შესყიდვების თემას, საკითხს საიდუმლო გრიფი ამავე უწყების მიერ ჰქონდა მინიჭებული.
კაციტაძის თქმით, საქმეზე გრიფ საიდუმლოს მოხსნა შსს-ს კონტრდაზვერვის დეპარტამენტმა თავდაცვის სამინისტროსა და პროკურატურის მიმართვის საფუძველზე მიიღო.
როგორც კაციტაძემ აღნიშნა, საიდუმლო გრიფი საქმის მხოლოდ 7 პროცენტს ადევს, დანარჩენი მასალები კი საჯარო გახდა.
