ამ წუთებში, საქართველოს კულტურისა და ძეგლთა დაცვის სამინისტროსთან, საყდრისის გადარჩენის კომიტეტისა და მასში გაერთიანებული ორგანიზაციების წევრები, გამაფრთხილებელ საპროტესტო აქციის გასამართად იკრიბებიან მოთხოვნით – სასწრაფოდ დაიწყოს კვლევები და აღუდგეს საყდრის ძეგლის სტატუსი.
ამის შესახებ "გურია ნიუსს" საყდრისის გადარჩენის კომიტეტის ერთ-ერთმა წევრმა, ირაკლი მამალაძემ განუცხადა.
"მოვითხოვთ, კულტურის მინისტრთან მიხეილ გიორგაძესთან დაუყოვნებლივ შეხვედრასა და მისი პოზიციის დაფიქსირებას საყდრისის პრობლემასთან დაკავშირებით. უკვე სამი თვე გავიდა, რაც მინისტრია. თუმცა, საყდრისთან დაკავშირებით რა პოზიცია აქვს არ ვიცით. ერთი განცხადებაც კი არ გაუკეთებია.
საზოგადოებრივი კომიტეტი, კულტურის მინისტრის დანიშვნამდე აცხადებდა, რომ ეს ურთულესი პრობლემა მინისტრს უნდა გადაეწყვიტა .
როცა გიორგაძეს მინისტრობა შესთავაზეს და დათანხმდა, ძალიან კარგად იცოდა, რომ მის წინაშე იდგა ამოცანა, საყდრისის გადარჩენა და ძეგლის სტატუსის მინიჭება. მიუხედავად ამისა, საყდრისის თემასთან დაკავშირებით მინისტრი დუმს და არ რეაგირებს. სტატუსი ისევ არ არის აღდგენილი.
ყველასთვის ცნობილია, რომ წინამორბედი კულტურის მინისტრი გურამ ოდიშარია საყდრისის თემას გადაყვა, მისი არათანმიმდევრული და მერყევი პოზიციის გამო. ხოლო, მიხეილ გიორგაძეს რომელსაც საერთოთ პოზიცია არ გააჩნია, ვფიქრობ, გაცილებით მძიმე იქნება მისი ბედი თუ დროულად არ დააფიქსირებს მის პოზიციას საყდრისი-ყაჩაღიანის ბორცვთან დაკავშირებით. საქმე იქამდე მივიდა, რომ სასამართლომაც კი მოითხოვა კულტურის სამინისტროს პოზიციის დაფიქსირება. რომელიც, როგორც ჩანს მათ არ გააჩნიათ.
კულტურის სამინისტროს მხრიდან ამ თემის თაროზე შემოდება ხდება. არ აინტერესებთ საყდრისი. მისი ბედის გადაწყვეტა მთლიანად კომპანიას მიანდეს.
ჩვენ მოვითხოვთ, რომ მინისტრმა მიმდინარე პროცესებზე სასწრაფოდ მოახდინოს რეაგირება. დაიწყონ კვლევები და საყდრისს აღუდგეს ძეგლის სტატუსი", _ განცხადა "გურია ნიუსთან" მამალაძემ.
