ჩრდილოეთ კაროლინაში მცხოვრები ლესბოსელი წყვილის ვაჟმა, ერთხელ Google Maps-ის (Google-ის რუკები) სერვისის საშუალებით საკუთარი სახლის მოძებნა განიზრახა. Google-ის რუკები პლანეტის სხვადასხვა ტერიტორიების რუკებსა და თანამგზავრიდან გადაღებულ ფოტოებს მოიცავს. მართალია, ბიჭმა საკუთარი სახლის ფოტო ვერ იპოვა, მაგრამ დაადგინა, რომ ის ქუჩა, სადაც სახლი დგას, დასახელებულ სერვისზე სახელდებულია, არც მეტი, არც ნაკლები, შემდეგი ფორმულირებით: "აქ პედერასტები ცხოვრობენ" (Faggots live here).
ლესბოსელი ოჯახი – ჯენიფერ მანი და ჯოდი მაკდენიელი (Jennifer Mann and Jodi McDaniel) პატარა ქალაქის ამ ქუჩაზე სამი შვილითა და შვილიშვილით უკვე ოთხი წელია, ცხოვრობენ. გუგლის რუკაზე ზემოთხსენებული მინიშნება მათმა ერთ-ერთმა ვაჟმა, დაკოტამ, აღმოაჩინა.
ორივე ქალი მომხდარს ჰომოფობიურ დანაშაულად მიიჩნევს და ვერაფრით მიმხვდარა, როგორ მოხდა ამგვარი რამ. ჯოდი ამბობს, რომ ყოველთვის დარწმუნებული იყო გუგლის სერვისების კეთილსაიმედოობაში. როდესაც წყვილმა კომპანია Google-ს შეურაცხმყოფელი სახელწოდების წაშლის მოთხოვნით მიმართა, მთელი თვე ცდა მოუხდა.
ოჯახი ეჭვობს, რომ სერვისი რომელიმე ჰომოფობმა ჰაკერმა გატეხა. "ჩვენ სრულიად ჩვეულებრივი ცხოვრება გვაქვს, ისეთი, როგორიც ყველას, – ამბობს ჯენიფერი, – მაგრამ ახლა სიტუაცია ისე გამოიყურება, თითქოს ვიღაცამ სამიზნედ გადაგვაქცია".
Google-ის წარმომადგენლებმა დიდი ბოდიშები უხადეს წყვილს, და შეურაცხმყოფელი დასახელება წაიშალა. მაგრამ, ეს ადვილად არ მომხდარა: კომპანიას ადგილობრივი გაზეთი Asheville Citizen-Times დაუკავშირდა და ქმედითი ზომების გატარება მოსთხოვა.
"ჩვენ ვზრუნავთ ბავშვებზე, დავდივართ სამსახურში, შემდეგ ვბრუნდებით შინ, – გვიამბობენ ქალები, – და ამგვარი რამ არაფრით არ დაგვიმსახურებია!". მათი თქმით, მეზობლების მხრიდან წინასწარგანწყობებს არასოდეს წაწყდომიან, და ამიტომაც ვერაფრით მიმხვდარან, ვის მოუვიდა თავში აზრად მათი ქუჩისთვის "სახელის გადარქმევა".
წყარო http://17maisi.org/
