ოზურგეთის მუნიციპალიტეტის სოფელ ლიხაურში მცხოვრებ არაერთ ოჯახს, ისევე როგორც სხვა სოფლებში, სტიქიამ დიდი ზარალი მიაყენა.
ლიხაურელი ირმა საჯაია-კალანდარიშვილი აცხადებს, რომ მისი საცხოვრებელი ადგილი, კარგა ხანია, წითელ ზონაშია მოქცეული. სექტემბრის სტიქიის დროს კი, მდინარე აჭმა კალაპოტი იცვალა და მისი კუთვნილი მიწის დიდი ნაწილი, რომელზეც 30 ძირი თხილი იყო, მთლიანად წაიღო.
_განცხადება მერამდენედ დავწერე, მაგრამ ჯერ არაფერი უპასუხიათ. დაბიონს ვაკეთებთო, რომ იძახიან, მე საგზაოზე ვმუშაობდი და შემიძლია დავუანგარიშო მათ, რომ დროებითი სამუშაოს შესრულება ნაკლები ჯდება და ეს კალაპოტი მომაშორონ აქედან. თუმცა, მათ ვერ გავაგებინე. მპირდებიან, კომპენსაცია იქნებაო და ჩემი კომპენსაცია ისაა, ეს მდინარე მომაშორონ აქედან. სულ ხუთი ათასი ლარი თუ დასჭირდება. ეს ჩემი საკარმიდამო ნაკვეთია და მალე იქნებ, სულ წაიღოს მდინარემ.
ლია სურგულაძე, სოფელ ლიხაურის მკვიდრი: მე დამაზარალა სტიქიამ, თხილის პლანტაციაში შემოვარდნილმა ადიდებულმა მდინარემ, დაახლოებით, 30 ძირი თხილი მოგლიჯა და ნაკვეთის ნაწილიანად წაიღო. დავწერე განცხადება და მივედი გამგებელთან. შემპირდნენ კომპენსაციას, დარწმუნებული ვარ, დამეხმარებიან, რადგან ვხედავ, სტიქიისგან დაზარალებულთა ნაწილი დააკმაყოფილეს. ალბათ, ჩვენი რიგიც დადგება. მიხარია ის, რომ გადაწყვეტილია მდინარე აჭის კალაპოტში, საკმაო მანძილზე, დაბიონის გაკეთება და საერთოდ, ერთი რამ მინდა გკითხოთ, მადლობა ყურადღებისთვის, მაგრამ მე რედაქციისთვის არ მომიმართავს და როგორ აღმოჩნდა ჩემი თხოვნა თქვენთან?
კახა გობრონიძე, სოფელ ლიხაურის მაჟორიტარი დეპუტატი: ჩვენ სტიქიით დაზარალებული არცერთი ოჯახი უყურადღებოდ არ დაგვიტოვებია. მდინარე აჭისწყლის იმ მონაკვეთზე, სადაც ხშირია კალაპოტიდან მდინარის გადმოსვლა, გადაწყვეტილია, გაკეთდეს დაბიონი. შესასრულებელია 260 ათასი ლარის სამუშაო. მალე ტენდერი გამოავლენს, რომელი სამშენებლო ორგანიზაცია ითავებს ამ საქმეს. ასევე ველოდებით სტიქიით დაზარალებულთათვის დახმარებას. არავინ დარჩება დახმარების გარეშე, თუმცა ისე, რომ თითოეული დაზარალებულის საკარმიდამო ერთჯერადი სამუშაო ჩატარდეს და პროექტი მერე განხორციელდეს, ეს შეუძლებელია.
