ამის შესახებ შს მინისტრის პირველმა მოადგილემ, ლევან იზორიამ განაცხადა და დასძინა, რომ პარლამენტის დეპუტატების, ბესელია-სესიაშვილი-ფოფხაძის მიერ მომზადებული საკანონმდებლო ინიციატივის მთავარი ამოცანა, ისეთი სისტემის შექმნაა, რომელიც საფრთხეების მინიმალიზებას მოახდენს.
"გუშინდელმა დისკუსიამ ცხადყო, რომ ყველა აღიარებს ერთ რამეს – უკანონო მოსმენებისგან 100%-იანი დაცვის სისტემის უზრუნველყოფა შეუძლებელია. მომზადებული ინიციატივით ამოცანა დგას იმგვარად, რომ შეიქმნას ისეთი სისტემა, რომელიც მოახდენს როგორც ადამიანის უფლებების ხელყოფის, ისე ეროვნული უსაფრთხოების ხელყოფის თვალსაზრისით არსებული საფრთხეების მინიმალიზებას. როგორც იცით, პირველ აგვისტოს პარლამენტის მიერ მიღებული გადაწყვეტილების მიხედვით, პერსონალურ მონაცემეთა დაცვის ინსპექტორს ფარული საგამოძოებო მოქმედებების, ანუ ე.წ. მოსმენების ფარგლებში პერსონალური მონაცემების დაცვა დაევალა. მინდა, საზოგადოებას ვუთხრა, რომ დღესაც ყველა განჩინების ასლი, რომელიც ფარულ მოქმედებებს უკავშირდება, მიდის სწორედ პერსონალურ დაცვის ინსპექტორთან. აქ ლაპარაკია დამატებით მექანიზმზე, რაც მას ელექტრონული ზედამხედველობის შესაძლებობასაც მისცემს, რათა ყოველგვარი მანიპულაცია გამოირიცხოს. ლოგიკური და სამართლებრივად გამართლებულიც კი არის, რომ გარე კონტროლის მექანიზმი სწორედ ინსპექტორს ჰქონდეს.
ყველაზე ოპტიმალური ვარიანტია, რომ სწორედ იმ ორგანოში იყოს მოსმენებთან დაკავშირებული ტექნიკური მიერთება, რომელიც უსაფრთხოებაზეა პასუხისმგებელი. მთელ მსოფლიოში ეს გასაღები არის შსს-ს, სამართლადამცავი ან უშიშროების ორგანოების ფარგლებში. დედამიწის ზურგზე არ არსებობს არც ერთი მაგალითი, როდესაც ის არის შსს-ს გარეთ", _ აღნიშნა იზორიამ და დასძინა, რომ ზოგიერთი დეპუტატის განცხადება იმის შესახებ, თითქოს ბესელია-სესიაშვილი-ფოფხაძის ავტორობით პარლამენტში შესული კანონპროექტი სინამდვილეში შსს-ში დაიწერა, არასწორია.
"ეს არასწორი ინფორმაციაა. კონსლუტაციები ეკა ბესელიას არა მხოლოდ ამ კანონპროექტთან, არამედ სხვა კანონპროექტებთან დაკავშირებითაც ხშირად ჰქონია. ასევე მას კონსუტლაციები ჰქონდა არა მხოლოდ ჩვენს უწყებასთან, არამედ პერსონალურ დაცვის ინსპექტორთან. გამომდინარე იქედან, რომ მისი ინიციატივა ეხება ერთი მხრივ ჩვენნ უწყებას, მეორე კი პერსონალური დაცვის მონაცემტა ინსპექტორს, ბუნებრივი და პასუხიგმებლიანი დამოკიდებულებაცაა რომ ეს კონსულტაციები გაემართა", – განამარტა შს მინისტრის მოადგილემ.
