ნორჩი სპორტსმენებისა და მათი მწვრთნელებისთვის ლანჩხუთში სპორტული დარბაზის არარსებობა, უკვე მრავალი წელია, საკმაოდ დიდ დისკომფორტს ქმნის.
დაპირებები ბევრი იყო ამ ხნის მანძილზე _ ჯერ კიდევ 2007 წელს, ქვეყნის მაშინდელი პრეზიდენტის მიერ საცურაო აუზის გახსნისას დაიგეგმა სასპორტო სკოლის დანგრეული შენობის რეაბილიტაცია.
გაკეთდა დარბაზის პროექტი, რომლის რეაბილიტაციაც მილიონ 600 ათასი ლარი უნდა დამჯდარიყო. თავად პროექტის ღირებულება 50 ათასი ლარით განისაზღვრა და ამ თანხის ნაწილი (10 ათასი ლარი) მაშინ მუნიციპალიტეტმა გაიღო. თუმცა, მიზეზთა გამო, საქმე ამის იქით აღარ წასულა.
2012 წლის შემდეგ, დარბაზის თემა კვლავ აქტუალური გახდა. თავად სპორტისა და ახალგაზრდულ საქმეთა მინისტრი ლევან ყიფიანი გაეცნო სპორტული დარბაზის არსებულ პროექტს და მოიწონა კიდეც. დამაიმედებელი განცხადებაც გააკეთა: "ვეცდები ამ საკითხის გადაჭრაში მოგეხმაროთ", _ გვითხრა მაშინ ყიფიანმა.
მას შემდეგ ორი წელი გავიდა და კვლავაც არაფერი გაკეთებულა სპორტული სკოლის რეაბილიტაციისთვის, თუმცა, ადგილობრივი ხელისფლება პირობას დებდა, რომ 2015 წლის გასახორციელებელ ინფრასტრუქტურული სამუშაოების ნუსხაში დარბაზის მშენებლობას აუცილებლად შეიტანდა. როგორც ჩანს, ამ შემთხვევაში, მართლაც, ასე უნდა იყოს, რადგან ლანჩხუთში თვით ინფრასტრუქტურის მინისტრის წარმომადგენლები იმყოფებოდნენ და ამორტიზებული სპორტული სკოლის შენობა გამგებელთან ზაზა ურუშაძესთან ერთად მოინახულეს.
ურუშაძის ინფორმაციით, სამინისტროდან ჩამოვლენ სპეციალისტები, რომლებიც ადგილზე შეისწავლიან ვითარებას, თუ რამდენად ვარგისია შენობის ფუნდამენტი და შესაძლებელია თუ არა შენობის რეაბილიტაცია. წინააღმდეგ შემთხვევაში, მოხდება მისი დემონტაჟი და აშენდება ახალი დარბაზი.
