ჩოხატაურის მუნიციპალიტეტის ახალ გამგებელს, ლელა იმედაშვილს, რომელმაც კარიერა პედაგოგობით დაიწყო, ახალგაზრდებთან ურთიერთობის დიდი გამოცდილება აქვს. ჯერჯერობით, უცნობია, როგორ გამოიყენებს ამ გამოცდილებას იმედაშვილი ჩოხატაურელი ახალგაზრდებისთვის. ცნობილია ის, რომ ახალ გამგებელს ბევრი გეგმა აქვს. ჩვენი გაზეთი იმედაშვილს ახალგაზრდების პრობლემების შესახებ სასაუბროდ შეხვდა:
_ ქალბატონო ლელა, რამდენიმე დღეა, რაც გამგებელი გახდით და როგორც ვიცით, ბევრი ორგანიზაცია და სოფელი უკვე მოინახულეთ. საინტერესოა, თუ შეხვდით ახალგაზრდობას და თუ შეხვდით, რაზე ესაუბრეთ მათ?
_ ახალგაზრდების ნაწილს უკვე შევხვდი და ერთ კონკრეტულ პროექტზეც ვისაუბრეთ. ამ დღეებში მათ სრულ წარმომადგენლობასთანაც ვგეგმავ შეხვედრას. ვფიქრობ, მათი უნარები და შესაძლებლობები უკეთ უნდა რეალიზდებოდეს და ჩემთვის მათი აზრი ძალიან მნიშვნელოვანია.
_ ხართ თუ არა საქმის კურსში იმ პრობლემების შესახებ, რომლებიც დღევანდელ ჩოხატაურში ახალგაზრდებს აწუხებთ?
_ შემიძლია, თამამად გითხრათ, რომ ამ მოკლე დროში ყველა პრობლემას გავეცანი და ზუსტად ვიცი, რა აწუხებთ ახალგაზრდებს და არა მარტო მათ. დარწმუნებული ვარ, მათთან ერთად შევძლებთ, სწორად გამოვავლინოთ საჭიროებები, გამოვყოთ პრიორიტეტები და მათზე ერთად ვიმუშაოთ.
_ ახალგაზრდულმა გაზეთმა ბევრი გამოკითხვა ჩაატარა პრობლემების გასარკვევად… ახალგაზრდების მიერ მთავარ პრობლემად ის დაასახელა, რომ ჩოხატაურში არ ფუნქციონირებს კინო, არ არის არანაირი გასართობი საშუალება… ელემენტარული სკვერიც კი არ არის, რომ დასხდნენ, ისაუბრონ და გაერთონ… რას აპირებთ ამ პრობლემების აღმოსაფხვრელად და გაქვთ თუ არა კონკრეტული გეგმები ამ მიმართულებით?
_ სწორედ ამ საკითხებს ვგულისხმობდი, როცა ვსაუბრობდი ახალგაზრდების პრობლემების ცოდნაზე. ამ მიმართულებით კონკრეტული გეგმებიც მაქვს. უმჯობესია, ჯერ შევხვდე ახალგაზრდების დიდ ჯგუფს, ვიმსჯელოთ, მე ჩემს ხედვებს გავაცნობ მათ და ამის შემდეგ კონკრეტულ გეგმებს და საკითხებს აუცილებლად წარმოგიდგენთ.
_ იყო რამდენიმე შემთხვევა, როდესაც ადგილობრივ ხელისუფლებას ახალგაზრდების ჯგუფმა სხვადასხვა პროექტით მიმართეს, თუმცა ეს პროექტები, ხელისუფლების თქმით, უფულობის გამო, ფურცელზე დარჩა… თქვენც იმავეს გვეტყვით? ჩოხატაურის ბიუჯეტს არ აქვს იმის საშუალება, რომ ახალგაზრდებს პროექტები დაუფინანსოს?
_ ახალგაზრდული პროექტების დაფინანსება და თანადაფინანსება ნამდვილად იქნება ჩემი პრიორიტეტი. ბიუჯეტში ეს აუცილებლად იქნება გათვალისწინებული. ახალგაზრდული იდეები აუცილებლად უნდა წახალისდეს და მათი შესაძლებლობები, არსებული დაფინანსების პირობებში, უნდა იყოს რეალიზებული.
_ წელს, მაისში ახალგაზრდული დღეები გაიმართა. ერთკვირიანმა ღონისძიებამ მთელი მუნიციპალიტეტი მოიცვა. მაშინ ითქვა, რომ ეს ტრადიციად იქცეოდა. თქვენ რას გვეტყვით, შედის ეს თქვენს გეგმებში?
_ ეს ღონისძიება, თუ არ ვცდები, ჩოხატაურის საკრებულოსა და გამგეობის მიერ იყო მხარდაჭერილი. ვფიქრობ, კარგი ტრადიციები აუცილებლად უნდა გაგრძელდეს.
_ რამდენიმე წელი საგანმანათლებლო რესურსცენტრის ხელმძღვანელი იყავით და ახალგაზრდებთან ურთიერთობის საკმაოდ დიდი გამოცდილება გაქვთ. გვაინტერესებს, რა გეგმები გაქვთ იმ მოზარდებთან დაკავშირებით, რომლებიც სოფლებში ცხოვრობენ და მათთვის ყველა სახის ღონისძიება თითქმის დახურულია, რადგან არავინ ფიქრობს იმ რესურსის მოძიებაზე, რომელიც შესაძლებელია, სოფლებში საკმაოდ დიდი დოზით იყოს…
_ ეს ჩემთვის ძალიან მნიშვნელოვანი თემაა. ახალგაზრდა, ნიჭიერი, გონიერი თაობა ყველგან არის _ მნიშვნელობა გეოგრაფიულ მდებარეობას ნამდვილად არ აქვს. უბრალოდ, კარგად უნდა იცოდე, როგორ იპოვო, გამოავლინო და წაახალისო ისინი. ამ მიმართულებით ზუსტად ვიცი რა უნდა გავაკეთო და იმედი მაქვს, ჩემი გამოცდილება დამეხმარება წარმოვაჩინო ასეთი ახალგაზრდები.
_ კულტურის სფეროსაც შევეხოთ. რაიმე კონკრეტული ცვლილებები ხომ არ გაქვთ ამ სფეროსთან მიმართებაში დაგეგმილი… საკმაოდ დიდი თანხა იხარჯება ამ მიმართულებით, თუმცა შედეგი ნაკლებია… თუ არ ჩავთვლით, კულტურის ცენტრის მიერ გამართულ დღესასწაულებისადმი მიძღვნილ ღონისძიებებს და კულტურის სამსახურის მიერ ჩამოყვანილ რამდენიმე ცნობილ ადამიანს, რომელთა სტუმრობის ხაჯრთაღრიცხვამაც ბევრი უკანონობა გამოავლინა, შეიძლება ითქვას, რომ ჩოხატაურში კულტურული ცხოვრება არც თუ მაღალ საფეხურზე დგას…
_ ტრადიციული, ე. წ. “კალენდარული ღონისძიებები” კარგია, მაგრამ არასაკმარისი. თანხა, რომელიც კულტურული მიმართულებით დაიხარჯება, მიზნობრივად უნდა იყოს გამოყენებული. თუ გადავწყვეტთ, რომ ჩამოვიყვანოთ ცნობილი შემსრულებლები, ესეც საზოგადოებრივი აზრის ზოგადი გამოკითხვით უნდა მოხდეს. ჩოხატაურის მუნიციპალიტეტის ბიუჯეტი და რეალურად გასაკეთებელი საქმე ზუსტად უნდა იყოს ერთმანეთთან თანხვედრილი _ ეს არის მთავარი.
_ იყავით გულწრფელი და გვითხარით, როგორია თქვენი თვალით დანახული ჩოხატაურის სინამდვილე?
_ ჩოხატაურის სინამდვილე _ უთბილესი და მოსიყვარულე ადამიანები და გასაკეთებელი ბევრი საქმე…
_ ინტერვიუ უახლოესი გეგმებით დავასრულოთ… იმედია, რომ ეს გეგმად არ დარჩება და ამ სიტყვებს მხოლოდ ჩვენი გაზეთის ფურცლები არ შემოინახავს….
_ უახლოესი გეგმები ასეთია _ საქმე, საქმე და კიდევ საქმე. საქმე კი, დამერწმუნეთ, ძალიან ბევრია.
