სათაურმა გაგაკვირვათ? რატომ? დღეს რისი ზეიმი, ვისნაირი და რანაირი შოუ არ იმართება ჩვენს ქვეყანაში, თანაც ისეთი სახელებით, რომლის გასაგებად თანამედროვე უცხოური ლექსიკონია საჭირო.
გუბე კი… ჩვენეულია, თუმცა, მაინც მოვუსმინოთ სულხან-საბას: “გუბე _ ფოსო, გინა წყლის ტბორე”.
ფოსოს ახსნაც აუცილებელია? კი, ბატონო, მცირედ დაღრმავებულიო! _ საბამ.
მცირედის რა მოგახსენოთ! ადგილი, სადაც გეპატიჟებით, საკმაოდაა დაღრმავებული, თანაც ერთ ან ორ ადგილას კი არა, რამდენიმე ალაგს.
მერე რა გვეზეიმება? ქართული ხასიათი ხომ იცით? ჩვენშიც იმძლავრა ორიგინალობის სურვილმა, თანაც ისეთი შემოტევით, რომ მოსაწვევ ბარათს არ დავჯერდით, ასე ღიად, საჯაროდ, გაზეთის საშუალებით გეპატიჟებით ყველას _ შინაურს და გარეულს, დიდს და პატარას, პოზიციას და ოპოზიციას, მინისტრს და ნამინისტრალს, ნაცნობს და უცნობს…
ზეიმი ცოტა უცნაურ სტილში დაიწყება და გაგრძელდება: შეგიძლიათ, მობრძანდეთ მაშინ, როგორც კი მოპატიჟების ამ ტექსტს წაიკითხავთ, შეგიძლიათ, მობრძანდეთ შემდეგაც, განმეორებით, გასამმაგებით…
ასეთ საინტერესოს რას ნახავთ და გეტყვით?
ეს სიურპრიზია!
დროის მონაკვეთი თქვენ შეარჩიეთ! ჩვენ, გრიბოედობის ქუჩის #29 ბინის მცხოვრებლები ყოველთვის მზად ვიქნებით თქვენ დასახვედრად, თანაც ისეთ სტილში, როგორითაც არსად, არავინ არ შეგხვედრიათ!
სტუმარი ქართველისთვის მუდამ საპატიო და გასაფრთხილებელია. ამიტომ რჩევასაც მოგცემთ: თუ დარში ინებებთ მობრძანებას, შეგიძლიათ, ჩვეულებრივ ჩაიცვათ, ხოლო თუ წვიმიან ამინდს არჩევთ (მრავალფეროვნებისთვის ეს ჯობია), მაშინ “ჩექმებ-ვალინკების” გამოყენებას გირჩევთ!
არ იფიქროთ, ჩვენი ზეიმი კონკურსის და სპორტული შეჯიბრებების გარეშე ჩატარდეს: სადღეგრძელოებიც გუბეების შესაფერისი იქნება და პრიზებიც!
გუბერნიის და მუნიციპალიტეტის ხელმძღვანელები თუ გვეყოლებიან? ჩვენ სულით და გულით ვეპატიჟებით: ვალერის, თამაზს, ლელას, ალეკოს, პაატას (ავთანდილ მექვაბიშვილი აქვე მეზობლად ცხოვრობს და შინაურთა რიგებში იქნება, ალბათ).
რომ არ მოვიდნენ? არ მგონია, ასე საჯარო მოპატიჟებაზე, რომელიმეს მაინც არ გაუჩნდეს სურვილი, თანაც, მათ ხომ ხალხი, საკუთარი ამომრჩევლები ეპატიჟებიან?! ეპატიჟებიან შრომაში ჩაბმულნიც და უსაქმურებიც, პენსიონერებიც და პენსიის მომლოდინენიც; რაც მთავარია, ეპატიჟებიან მოსწავლეები და ბაღის აღსაზრდელები, უფრო პატარებიც _ ეზოში, უფრო სწორად, გუბეებში მოფართქალე ბავშვებიც.
დაწყების და გაგრძელების დრო გითხარით! ზეიმის დასასრული? ეს ჟიურიზე იქნება დამოკიდებული _ უფრო სწორად, გუბერნიის და მუნიციპალიტეტის ხელმძღვანელებზე.
ჰო, ამ წერილის წერისას ერთი აღმოჩენაც გავაკეთე: წაიკითხეთ სიტყვა _ გუბერნიის? ხომ ხედავთ, ჩვენი ზეიმის აღმნიშვნელი სიტყვა “გუბე” როგორი თანამდებობის დასაწყისი ყოფილა?!
მოპატიჟების წერილს ვამთავრებთ!
გეპატიჟებით ყველას, ყველას, ყველას!
ხომ მობრძანდებით, “გუბე-რნიის ზეიმის” საპატიო სტუმართა რიცხვს ხომ შეგვავსებინებთ და შეემატებით?
“გუბეების ზეიმის” დიასახლისი: ეთერ ქადეიშვილი, ოზურგეთი
