რა ვიცით და საიდან ვიგებთ, რა ხდება ჩვენს გარშემო, ახლო და შორეულ საზღვარგარეთში, სადაც განვითარებული მოვლენები, როგორც წესი, ჩვენზეც აისახება ხოლმე?!
არაფერი ან ძალიან ცოტა და ხშირად არასწორი!
ინფორმაციის წყაროდ რჩება სხვადასხვა ქვეყნის საინფორმაციო საშუალებები, რომელთაც საკუთარი პოლიტიკური და პროპაგანდისტული მიზნები აქვთ.
ამოიკითხავენ ხოლმე ჩვენი ექსპერტები ამ ინფორმაციებს და არიგებენ ინტერვიუებს, მაგრამ ეს უფრო ტყემლის ხიდან ბლის კურკების სროლას ჰგავს. თუმცა, ამათაც რა ქნან?!
კარგ შემთხვევაში აისბერგის წვერს ძლივს ვხედავთ, რომელიც მატყუარაა, დანარჩენი დაფარული რჩება.
ბოლოს როდის წაგიკითხავთ რეალურ ვითარების ცოდნაზე (!) დაფუძნებული ანალიტიკური სტატია საზღვარგარეთ მიმდინარე პროცესებზე, უკრაინაზე, თურქეთზე, ირანზე, სომხეთზე, აზერბაიჯანზე, თუნდაც რუსეთზე. რა განწყობებია მოსახლეობაში, როგორი ბალანსია პოლიტიკურ ძალებს შორის, რა არის მოსალოდნელი?
სამწუხაროდ ასეთივე მწირი ინფორმაციები აქვთ პოლიტიკოსებსაც. მსოფლიო იყოფა ცუდ და კარგ, მტრულ და მეგობრულ ქვეყნებად და მორჩა.
ისევ უცხოელების სტატიებიდან თუ გავიგებთ ხოლმე რამეს, მაგრამ ისინი, ცხადია, საკუთარი მიზნებიდან და ხედვებიდან გამომდინარე წერენ.
დღეს ისე ჩანს, ყოველთვიური ჟურნალი უცხოეთის საკითხებზე თავს ვერ შეინახავსო, თუმცა, ჯერ არც დამწერი ჩანს ვინმე.
არადა ცდად ნამდვილად ღირს, ძალიან დიდი პოტენციალი გვაქვს ქართული დიასპორის სახით, მათში უდაოდ მოიძებნებიან ადამიანები, რომელთაც პულსზე ხელი უდევთ და შესწევთ ანალიზის უნარი.
ბნელში მყოფი იძულებულია, რასაც ჩასძახებენ, ის დაიჯეროს და ამოიძახოს…
