საფინანსო-საბიუჯეტო კომიტეტის სხდომაზე "საქართველოს 2015 წლის სახელმწიფო ბიუჯეტის შესახებ“ კანონპოექტიდან გამომდინარე კანონპროექტები მეორე მოსმენით, მუხლობრივად განიხილეს.
საკანონმდებლო ინიციატივები კომიტეტის წევრებს ფინანსთა მინისტრის მოადგილემ, გიორგი კაკაურიძემ გააცნო. საკითხი შეეხებოდა "საქართველოს საბიუჯეტო კოდექსში ცვლილების შეტანის შესახებ“ კანონპროექტს და მისგან გამომდინარე ტექნიკური ხასიათის ცვლილებებს.
მომხსენებელმა წარმოდგენილ პროექტებზე დეტალური ინფორმაცია წარმოადგინა და დასმულ შეკითხვებზე დამატებითი ინფორმაცია წარმოადგინა. მანვე დეპუტატებს „საქართველოს საგადასახდო კოდექსში“ ცვლილების შეტანის თაობაზე“ კანონპროექტი გააცნო, რომლის მიხედვითაც, 2015 წლის 1 იანვრიდან თამბაქოს ნაწარმზე, ალოს ლუდზე, ეთილის სპირტსა და ალკოჰოლურ სასმელებზე აქციზის განაკვეთი იცვლება.
მთავრობის მიერ საკანონმდებლო ინიციატივის წესით მომზადებული კანონპროექტები: "საქართველოს საგადასახადო კოდექსში ცვლილების შეტანის შესახებ“, "საქართველოს ადმინისტრაციულ საპროცესო კოდექსში ცვლილების შეტანის შესახებ“ და "კომერციული ბანკების საქმიანობის შესახებ“ საქართველოს კანონში ცვლილების შეტანის თაობაზე“ წარმოადგინა ფინანსთა მინისტრის მოადგილემ, ლაშა ხუციშვილმა. აღნიშნული კანონპროექტებიც მეორე მოსმენით, მუხლობრივად იქნა განხილული. უკანონო შემოსავლის ლეგალიზაციასა და ტერორიზმის დაფინანსების აღკვეთის სფეროში საერთაშორისო სტანდარტებთან ქართული კანონმდებლობის ჰარმონიზაციას შეეხებოდა „უკანონო შემოსავლის ლეგალიზაციის აღკვეთის ხელშეწყობის შესახებ“ საქართველოს კანონში ცვლილების შეტანის თაობაზე“ კანონპროექტი, რომელიც ფინანსთა მონიტორინგის სამსახურის უფროსმა, მიხეილ როინიშვილმა წარმოადგინა. სხდომის დასასრულს კომიტეტის თავმჯდომარემ, დავით ონოფრიშვილმა დეპუტატებს მესამე მოსმენით განსახილველად, „საქართველოს საგადასახადო კოდექსში ცვლილების შეტანის თაობაზე“ კანონპროექტი გააცნო, რომლის მიმართაც სხდომაზე რედაქციული ხასიათის შენიშვნები არ გამოთქმულა.
კომიტეტის წევრებმა ცალ-ცალკე კენჭი უყარეს წარმოდგენილ კანონპროექტებს და მხარი დაუჭირეს მათ პლენარულ სხდომაზე გატანას.
