"ერთიანი ნაციონალური მოძრაობის" ინფორმაციით, თავდაცვის მინისტრმა მინდია ჯანელიძემ, პირველ მოადგილედ ბურჯანაძის პარტიის მმართველი საბჭოს წევრი ლევან ღირსიაშვილი დანიშნა. პარტიის მიერ ოფიციალურად გავრცელებული ინფორმაციის თანახმად, ის ფაქტი, რომ ნატოსთან ურთიერთობები იმ პარტიის წარმომადგენელს ჩააბარეს, რომელიც ოფიციალურად გამოდის საქართველოს ნატოში ინტეგრაციის წინააღმდეგ, უკიდურესი შეშფოთების საგანია.
_ ერთიანი ნაციონალური მოძრაობა გამოთქვამს შეშფოთებას ღიად კოლაბორაციონისტული, ოკუპანტ სახელმწიფოსთან ოფიციალურ ალიანსში მყოფი პოლიტიკური ძალის წარმომადგენლების საქართველოს მთავრობაში მაღალ თანამდებობებზე დანიშვნის ტენდენციასთან დაკავშირებით.
ახალმა და, ჯერ ჯერობით საზოგადოებისთვის სრულიად უცნობმა, თავდაცვის მინისტრმა მინდია ჯანელიძემ, საკუთარ პირველ მოადგილედ სწორედ ქ-ნი ბურჯანაძის პარტიის მმართველი საბჭოს წევრი ლევან ღრსიაშვილი დანიშნა. ის ფაქტი რომ იმ პარტიის წარმომადგენელს რომელიც ოფიციალურად გამოდის საქართველოს ნატოში ინტეგრაციის წინააღმდეგ, ჩააბარეს სწორედ ნატოსთან ურთიერთობები ჩვენი უკიდურესი შეშფოთების საგანია. ცნობისათვის, ბ-ნმა ღირსიაშვილმა საზღვარგარეთ საკუთარი სამსახური 2013 წელს მიატოვა სწორედ იმისათვის რათა ბურჯანაძის პარტიის წინასაარჩევნო კამპანიაში მიეღო მონაწილეობა.
ამასთან, სამწუხაროდ, ბ-ნი ღირსიაშვილი არ არის მაღალ თანამდებობაზე დანიშნული ბურჯანაძის პარტიის ერთადერთი წარმომადგენელი. ამავე პარტიის დარბაზის წევრი ვახტანგ ყოლბაია აფხაზეთის დევნილი მთავრობის მინისტრთა საბჭოს თავმჯდომარეა. იგივე პარტიის წარმომადგენელი ზაზა სოფრომაძე ჯანდაცვის მინისტრის მოადგილეა ხოლო თეიმურაზ მურღულია გარემოს დაცვის მინისტრის მოადგილე.
საქართველოს ამომრჩეველმა ხმა 2012 წლის საპარლამენტო არჩევნებში არა ნინო ბურჯანაძეს – ვლადიმიტ პუტინის ოფიციალურ თანამოაზრეს – არამედ ბიძნა ივანიშვილს მისცა მის მიერ გაცემული საარჩევნო დაპირებების შესასრულებლად. აუცილებელია საქართველოს მთავრობამ გააკეთოს განმარტება იმასთან დაკავშირებით თუ რასთან გვაქვს საქმე – ოკუპანტის ოფიციალური პარტნიორის ფარულ ხელისუფლებაში მოსვლასთან თუ ამ პოლიტიკურ ძალასთან ქართული ოცნების დე-ფაქტო შერწყმასთან, _ აღნიშნულია პარტიის მიერ გავრცელებულ განცხადებაში.
