ლანჩხუთის მუნიციპალიტეტის გამგებლობის ყოფილმა კანდიდატმა "პატრიოტთა ალიანსიდან", ბორის ჭყონიამ გასულ ხუთშაბათს პრესკონფერენცია გამართა. თემა სრულიად აპოლიტიკური იყო. მისი თქმით, შეიქმნა "ლანჩხუთის აღორძინებისა და განვითარების ფონდი", რომელსაც სათავეში, წარმოშობით ლანჩხუთელი, "ერთი ძალიან კარგი ადამიანი" უდგას. მისი მიზანია, დაეხმაროს ხალხს, ნებისმიერ შეჭირვებულს დაუდგეს გვერდში.
"ეს ფონდი არ არის რაიმე სახის მოგებაზე ორიენტირებული. მოვიდა დრო და გაჩნდა აუცილებლობა, გვერდში დავუდგეთ ადამიანებს. ხალხი დაიღალა ერთმანეთის ლანძღვა-გინების მოსმენით. ვისაც შესაძლებლობა აქვს, სხვასაც უნდა დაეხმაროს, ქვეყანა წინ უნდა წავიდეს. უნდა განვითარდეს სოფლის მეურნეობა, სხვა სფეროები, უნდა შეიქმნას სამუშაო ადგილები, ხალხს უნდა მიეცეს შრომის, საკუთარი უნარისა და შესაძლებლობების გამოვლენის საშუალება. ეს არ იქნება ჩვენი ბოლო შეხვედრა, შემდეგ შეხვედრებზე უფრო დავკონკრეტდებით და ფონდის კონკრეტულ მიმართულებებზეც მაშინ ვისაუბრებთ.
ჩვენი მიზნები კეთილია და ყოველგვარ ანგარებას მოკლებული. ვიმუშავებთ გამჭვირვალედ. ნებისმიერი მსურველისთვის ჩვენი კარი ღია იქნება. ფონდმა უკვე გაიარა რეგისტრაცია და ოფიციალურად დაფუძნდა. სულ მალე კი ფონდს საკუთარი ოფისი ექნება ჟორდანიას ქუჩაზე და შემდგომ შეხვედრასაც, ალბათ, იქ გავმართავთ", _ თქვა ბორის ჭყონიამ.
