"საკონსტიტუციო სასამართლოს თავმჯდომარე, გიორგი პაპუაშვილი აჭარაში, "ვარდების რევოლუციის" შემდეგ, უკანონოდ ქონებაჩამორთმეულის სახლში ცხოვრობს", _ "ახალგაზრდა ადვოკატების" კვლევას, სადაც აღნიშნულზეა საუბარი, ევროსაბჭო ეხმაურება.
"თქვენი კვლევა და სამართლებრივი ანალიზი, აჭარის რეგიონში უკანონოდ ქონებაჩამორთმეულების საქმეზე, ხელს უწყობს ქვეყანაში დამკვიდრებული ნების საწინააღმდეგოდ, ხელისუფლებისათვის ქონების გადაცემის პრაქტიკის შეცნობას, რომლის გამოც, მოქალაქეების მიერ გასაჩივრების რაოდენობა ასობით გაიზარდა 2012 წლის ხელისუფლების ცვლილებების შემდეგ. დაზარალებული მოქალაქეები მიუთითებდნენ თავიანთ საჩივრებში, რომ მათ ქონება იძულებისა და ზეწოლის გზით ჩამოართვეს. წარსულ უსამართლობაზე ადეკვატური პასუხის გაცემა და მისი მოგვარება არის ნამდვილად ერთ-ერთი გამოწვევა, რომელსაც სჭირდება ადეკვატური პასუხი, რეაგირება საქართველოს მთავრობის მხრიდან, რომელმაც საჯაროდ განაცხადა, რომ "სამართლიანობის აღდგენა" და დაუსჯელობის სიდრომის წინააღმდეგ ბრძოლა, არის მისი პრიორიტეტული მიმართულება. ეს არ არის მარტივი ამოცანა და ისეთი პროფესიულ ორგანიზაციას, როგორსაც თქვენ წარმოადგენთ, შეუძლია ითამაშოს მნიშვნელოვანი როლი ამ მიმართულებით, დამოუკიდებელი სამართლებრივი ანალიზის წარმოდგენით" – ნათქვამია "ახალგაზრდა ადვოკატების" მიმართ, ევროსაბჭოს რუსეთის, აღმოსავლეთ პარტნიორობისა და ცენტრალური აზიის რეგიონის დირექტორატის განყოფილების უფროსის, დირკ შუბელის წერილში.
საქმე ისაა, რომ "ახალგაზრდა ადვოკატების" მიერ გამოქვეყნებული კვლევის თანახმად, საქართველოს საკონსტიტუციო სასამართლოს თავმჯდომარე, გიორგი პაპუაშვილი აჭარაში, "ვარდების რევოლუციის" შემდეგ, უკანონოდ ქონებაჩამორთმეულის სახლში ცხოვრობს.
უფრო კონკრეტულად კი, "ახალგაზრდა ადვოკატების" თქმით, 2004 წელს, როლანდ ბლადაძეს ქონება ნების საწინააღმდეგოდ წაართვეს, ხოლო 2007 წელს, ექს-პრეზიდენტმა მიხეილ სააკაშვილმა, ჩამორთმეული ქონება სიმბოლურ ფასად – 1000 ლარად, საქართველოს საკონსტიტუციო სასამართლოს თავმჯდომარეს გადასცა.
როლანდ ბლადაძის სადავო სახლს, იგი ბათუმში, გორგილაძის 37 ნომერში მდებარეობს. აღნიშნული საცხოვრებელი გიორგი პაპუაშვილს 2006 წელს პრეზიდენტის ბრძანებულებით, სიმბოლურ ფასად, 1 000 ლარად გადაეცა.
მანამდე კი აჭარის "ვარდების რევოლუციის" შემდეგ, 2004 წელს, საქმე აღიძრა როლანდ ბლადაძის წინააღმდეგ, რომელიც სარფის საბაჟო გამშვები პუნქტის უფროსის მოადგილედ მუშაობდა.
ბლადაძეს ბრალი სახელმწიფო ქონების მითვისება-გაფლანგვაში ედებოდა, რის გამოც კუთვნილი ქონება ჩამოართვეს. მათ შორის, კონფისკაციას დაექვემდებარა აღნიშნული ბინაც.
საკონსტიტუციო სასამართლოს საზოგადოებასთან ურთიერთობის სამსახურის ხელმძღვანელი, ზვიად სირაბიძე "გურია ნიუსთან" ამბობს, რომ გიორგი პაპუაშვილს ქონება არავისთვის ჩამოურთმევია და აღნიშნული სახლი მას, წინა მთავრობამ, სიმბოლურ ფასად გადასცა.
"ამ საკითხზე უკვე კომენტარის გაკეთებაც არ ღირს, რადგან ათასჯერ ვუპასუხეთ მათ. ყველამ კარგად იცის, რომ ბატონ გიორგის ეს სახლი სახელმწიფომ სიმბოლურ თანხად გადასცა. მოახდინა მათი ნორმალური პირობების მქონე სახლებში შეყვანა და ამ ადამიანებმა უნდა უჩივლონ სახელმწიფოს და არა გიორგის, რადგან მას არავისთვის არ ჩამოურთმევია ქონება", _ განმარტავს "გურია ნიუსთა" სირაბიძე.
