წეროვანში კომპაქტურად ჩასახლებული დევნილები, ბუნებრივი აირის გადასახადზე დაგროვილი დავალიანების განულებას ითხოვენ.
მოქალაქეები ამბობენ, რომ მათ სწორედ ამ დაპირების გამო მისცეს ხმა „ქართულ ოცნებას“, რადგან ოჯახებს ძველი დავალიანების გადახდა არ შეუძლიათ.
თუმცა, აღსანიშნავია, რომ მთავრობის შეცვლის შემდეგ, წეროვანში კომპაქტურად ჩასახლებული დევნილების ინდივიდუალური გამრიცხველიანება მოხდა. ამასთან, მათ საერთო მრიცხველის დროს დაგროვილი დავალიანებები, რაც 2013 წლის პირველ მარტამდე ჰქონდათ დაგროვილი, დევნილთა და განსახლების სამინისტრომ სრულად აუნაზღაურა.
ამავდროულად, იმ დევნილებს, რომელთა სოციალური ქულა 70 000-ზე ნაკლებია, სამინისტრო ყოველწლიურად 200 ლარს ურიცხავს და ამ თანხის გამოყენება მათ მხოლოდ კომუნალური გადასახადებისთვის შეუძლიათ.
აღსანიშნავია ისიც, რომ ზამთარში, 4 თვის განმავლობაში, წეროვანის დასახლებაში მცხოვრები ყველა დევნილი 50 ლარიან ვაუჩერს იღებს და ეს სოციალურად დაუცველ დევნილებსაც ეხებათ (ანუ, 200+50).
როგორც "გურია ნიუსთა" წეროვანში მცხოვრები დევნილი, ნუნუ მღებრიშვილი ამბობს, მართალია სამინისტრომ მათ 2013 წლის გაზაფხულზე დაგროვილი დავალიანებები გადაუხადა, მაგრამ ვინაიდან ეს ერთხელ მოხდა, მოსახლეობა ჩათვალა, რომ შემდეგშიც ასე გაგრძელდებოდა, თავად არ გადაიხადეს და ამიტომ ისევ დაგროვდა დავალიანება.
ამასთან, მღებრიშვილის თქმით, დევნილებისთვის გამოყოფილი 50 ლარიანი ვაუჩერი გვიან აისახა ანგარიშზე. ანუ, მოსახლეობამ გაზის ქვითარი მანამ მიიღო, ვიდრე მათ ანგარიშებზე ეს 50 ლარი აისახებოდა.
თუმცა, როგორც ახალგორის საკრებულოს თავმჯდომარე, თამაზ ბალაშვილი ამბობს, შექმნილი გაუგებრობა მარტივად მოგვარდება და ნოემბრის გადასახადს აღნიშნული ვაუჩერის თანხმა, 50 ლარი, აუცილებლად გამოაკლდება.
რაც შეეხება 2013 წლის გაზაფხულის შემდგომ დაგროვილ დავალიანებებს, რომლის განულებასაც წეროვანში ჩასახლებული დევნილები ითხოვენ, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროში ამბობენ, რომ აღნიშნული მოთხოვნა ვერ დაკმაყოფილდება.
"ამ დავალიანებას მათ ვერავინ ვერ გაუნულებს. ერთადერთი ამ სიტუაციაში რისი გაკეთებაც შევძელით ისაა, რომ სამინისტრომ უშუამდგომლა „სოკართან“ და ძველი დავალიანების დაფარვა დევნილებს 15-15 ლარის ოდენობით ეტაპობრივად მოუწევთ.
ამასთან, მათ აქვთ 50 ლარიანი ვაუჩერები, ხოლო სოციალურად დაუცველებისთვის ამ 50 ლარიან ვაუჩერს ემატება ყოველწლიური 200 ლარიანი ვაუჩერიც.
ჩვენ გასულ წელს როცა მათ გამრიცხველიანობა გავუკეთეთ, დაგროვილი დავალიანება გავუნულეთ კიდეც. ახლა იგივეს გაკეთება აბსურდია", _ უთხრა "გურია ნიუსს" სამინისტროს საზოგადოებასთან ურთიერთობის სამსახურის ხელმძღვანელმა, დალი გოგალაძემ.
