საქართველოს თავდაცვის მინისტრი მინდია ჯანელიძე აცხადებს, რომ ქართულ შეიარაღებულ ძალებში არ ყოფილა არც ერთი ფაქტი, როდესაც ქართველმა ოფიცრებმა დატოვეს ქვეყანა და სხვა ქვეყნის შეიარაღებულ ძალებში სამსახური დაიწყეს. თუმცა, ყოფილი პრეზიდენტი მიხეილ სააკაშვილი ამბობს, რომ ქართველ ოფიცრებს, რომლებიც უკრაინის შეიარაღებულ ძალებში იმსახურებენ, უკრაინის მოქალაქეობას ჰპირდებიან. მოლაპარაკებები კი რამდენიმე ყოფილ თანამდებობის პირთან უკვე დაწყებულია.
"ვერ დამისახელებთ ვერც ერთ ფაქტს, როდესაც ჩვენი შეიარაღებული ძალების ოფიცერმა დატოვა სამსახური და გაემგზავრა სხვა ქვეყანაში. ქართველი ოფიცრები მსახურობენ ჩვენი შეიარაღებული ძალების შემადგენლობაში, ისინი აგრძელებენ სამსახურს, იცავენ ქვეყანას", _ განაცხადა მინდია ჯანელიძემ პრეზიდენტის განცხადების საპასუხოდ.
სააკაშვილის კი ამბობს, რომ "რამდენიმე ყოფილ თანამდებობის პირს ბოლო დღეებში უკრაინაში გაესაუბრნენ, სხვადასხვა თანამდებობებზე. არ ვიცი, რა გადაწყვეტილება იქნა მიღებული“.
ექსპრეზიდენტის მიერ გავრცელებული ინფორმაცია, ყოველგვარ საფუძველს მოკლებულია, _ აცხადებენ საქართველოს თავდაცვის სამინისტროში, თუმცა იმასაც ამბობენ, რომ უკრაინაში იმყოფება საქართველოს რამდენიმე მოქალაქე, რომლებიც წლების წინ მსახურობდნენ საქართველოს შეიარაღებულ ძალებში და ამჟამად, შეიარაღებული ძალების შემადგენლობაში არ ირიცხებიან.
"ჩვენი ოფიცრები, სხვა ქვეყნის მოქალაქეობის მიღების სანაცვლოდ არ შეწყვეტენ საკუთარი სამშობლოს, საზოგადოების უსაფრთხოების დაცვას. ისინი იცავდნენ და ყოველთვის დაიცავენ საქართველოს.
ყოფილი პრეზიდენტი ცდილობს, შეცდომაში შეიყვანოს შეიარაღებული ძალების შემადგენლობა და საზოგადოება. ყოფილი უმაღლესი მთავარსარდლის მოწოდება არის უპასუხისმგებლო, გაუმართლებელი პროპაგანდა, რომელიც მიმართულია საკუთარი ქვეყნისა და სახელმწიფო ინსტიტუტების წინააღმდეგ“, _ აღნიშნულია თავდაცვის სამინისტროს განცხადებაში, რომელიც უწყებამ დღეს გაავრცელა.
ექსპრემიერის განცხადებას "უპასუხისმგებლო“ და "რეალობისგან მოკლებული“ უწოდა პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილმაც.
"თუ ასეთი მოწადინებულია მიხეილ სააკაშვილი, რომ ქართველმა ოფიცრებმა იბრძოლონ, მაშინ თავად რომ მისცეს მაგალითი, ცუდი არ იქნებოდა. ფიზიკურადაც მომზადებულია და ნამსახურებიც არის უშიშროების ჯარებში. თუ რამის სურვილი აქვს რომ წვლილი შეიტანოს უკრაინის საბრძოლო მოქმედებებში, თავად წავიდეს. უპასუხისმგებლო კაცია და შესაბამისად, მისი განცხადებაც უპასუხისმგებლოა“, _ ამბობს სესიაშვილი.
სახედრო ექსპერტი ირაკლი ალადაშვილი "გურია ნიუსთან“ საუბრისას ამბობს, რომ დღეს უკრაინელების მხარეზე ისედაც იბრძვის არაერთი ქარველი ოფიცერი, მაგრამ ისინი რეზერვში არიან და საქართველოს შეიარაღებულ ძალებში აღარ მსახურობენ.
"თუ ვინმე დღეს მსახურობს ქართულ არმიაში, მაგრამ სურს რომ წავიდეს და უკრაინელების გვერდით იბრძოლოს, მაშინ, მან უნდა დატოვოს შეიარაღებული ძალები, გააუქმოს კონტრაქტი და დაკარგოს საქართველოს მოქალაქეობა. რადგან უკრაინა ორმაგ მოქალაქეობას არ ითვალისწინებს. მაგრამ, არა მგონია, რომ ხალხი ბევრი ისეთი აღმოჩნდეს, ვინც ამ გადაწყვეტილებას.
რამდენიმე პიროვნება, რომლებიც უკვე მსახურობენ უკრაინის შეიარაღებულ ძალებში არც მალავენ თავიანთ ვინაობას, ისინი ყოფილი ოფიცრები არიან.
მათ შორისაა ვიცე პოლკოვნიკი ირაკლი ქურასბედიანი, რომელიც 2008 წლის აგვისტოს ომამდე საკმაოდ დიდი თანამდებობა ეკავა, ის იყო შეიარაღებული ძალების გენშტაბში დაზვერვის დეპარტამენტის უფროსი, მაგრამ ომამდე თავად სააკაშვილის ხელისუფლების დროს ჩამოაქვეითეს“, _ ამბობს ალადაშვილი.
