პარლამენტარებმა გარემოს და ბუნებრივი რესურსების დაცვის კომიტეტის დღევანდელ სხდომაზე "ნარჩენების მართვის კოდექსის" პროექტი საბოლოო – მესამე მოსმენით განიხილეს და პარლამენტის პლენარულ სხდომაზე მის გატანას ერთხმად დაუჭირეს მხარი.
კანონპროექტი გარემოს დაცვისა და ბუნებრივი რესურსების მინისტრის მოადგილემ მაია ბითაძემ წარადგინა და განაცხადა, რომ ავტორებმა გაიზიარეს კომიტეტის შენიშვნები კანონპროექტის ცალკეული მუხლების ამოქმედების ვადების დაზუსტების თაობაზე. სხვა არსებითი ხასიათის შენიშვნები არ გამოთქმულა და, შესაბამისად, პროექტში ცვლილებებიც არ შესულა. გარემოს დაცვისა და ბუნებრივი რესურსების კომიტეტის თავმჯდომარემ გიორგი ცაგარეიშვილმა იმედი გამოთქვა, რომ კოდექსის ამოქმედების ვადები მკაცრად ინება დაცული.
რედაქციული ხასიათის ცვლილებები არ განუცდიათ "ნარჩენების მართვის კოდექსის" პროექტის თანმდევ კანონპროექტებს და კომიტეტმა მათაც ერთხმად დაუჭირა მხარი.
"ამ კოდექსის მიღება იმითაა მნიშვნელოვანი, რომ აღნიშნული მიმართულებით ქვეყანაში არანაირი სამართლებრივი რეგულაციები არ გვქონია. კომიტეტმა სამინისტროსთან ერთად თითქმის ორი წელი იმუშავა კოდექსის პროექტზე და იმედს ვიტოვებ, რომ როდესაც სრულად მოხდება კანონმდებლობის იმპლემენტაცია, მის შედეგებს ქვეყნის თითოეული მოქალაქე საკუთარ თავზე იგრძნობს", – განაცხადა გიორგი ცაგარეიშვილმა.
მისი თქმით, ეს კანონმდებლობა იმის გარანტიას იძლევა, რომ ევროკავშირის გარემოსდაცვითი მოთხოვნების საფუძველზე მნიშვნელოვნად შეიცვლება საქართველოს ნარჩენების მართვის სექტორი. წარმოდგენილი კანონპროექტით რეგულირდება ნარჩენების მართვის სფერო. პროექტით განისაზღვრება ნარჩენების მიმართ განსახორციელებელი პრევენციები, მათი ხელახალი გამოყენება და ნარჩენების უსაფრთხო გზით გადამუშავების რეგულაციები. კანონპროექტი ითვალისწინებს ასევე ადმინისტრაციულ პასუხისმგებლობას კოდექსის პროექტში გათვალისწინებული ვალდებულებების შეუსრულებლობისათვის.
კოდექსის ამოქმედება მომავალი წლის 15 იანვრიდან იგეგმება, გარდა მისი ზოგიერთი ნორმისა.
კომიტეტში დღესვე საბოლოო – მესამე მოსმენით განიხილეს პარლამენტის წევრ მალხაზ წერეთლის საკანონმდებლო ინიციატივა – კანონპროექტი "ბუნებრივი რესურსებით სარგებლობისათვის მოსაკრებლების შესახებ" საქართველოს კანონში ცვლილების შეტანის თაობაზე" და მხარი დაუჭირეს. კანონპროექტის მიღების მიზეზია სასარგებლო წიაღისეულზე კერძოდ, მანგანუმზე კანონმდებლობით დადგენილი მოსაკრებლის ადეკვატური და სამართლიანი ოდენობის განსაზღვრა.
შეგახსენებთ, რომ "ნარჩენების მართვის კოდექსის" მიხედვით, გარემოს დანაგვიანებაზე სანქციები მკაცრდება. ფეხით მოსიარულეთათვის ეს ჯარიმა 80 ლარი იქნება, სახლიდან ნარჩენების გადაყრისთვის – 100, მანქანიდან გადაგდების შემთხვევაში კი 120 ლარი.
თუ ნაგვის ოდენობა ორ კილოგრამს აღემატება, ჯარიმის ოდენობაც გაიზრდება. 50 ლარით კი ის მოქალაქეები დაჯარიმდებიან, რომლებიც საკუთარი შინაური ცხოველების ფეკალიებს ქუჩაში დატოვებენ.
