24 ოქტომბერს, ოზურგეთის მუნიციპალიტეტის სოფელ მერიაში, ამერიკული ჰიბრიდული სიმინდის მოსავლის ასაღებად ადგილობრივი ხელისუფლების წარმომადგენლები, ჟურნალისტებთან ერთად წავიდნენ. ადგილზე მისულთ, დათესილ ფართობს და მოსავალს თუ ერთმანეთს შევადარებთ, საპიარე ბევრი არაფერი დახვედრიათ, რადგან სულ 8 ჰექტარზე დათესილი ფართობიდან, როგორც გაირკვა, 3 ჰექტარზე მოვიდა მოსავალი. ხელისუფლება და ფერმერი კი მიიჩნევენ, რომ ესეც ხეირია (?!)
სოფელ მერიაში, ფერმერ დავით სურგულაძის ფართობში, პირობითად რომ ვთქვათ, მიუხედავად სამი მერვედი მოსავლის მიღებისა, იგი მაინც ამბობს, რომ უკმაყოფილო არ არის. სავარაუდოდ, სურგულაძე ასე “დაარიგეს”..
მუნიციპალიტეტის საკრებულოს თავმჯდომარე ალეკო მამეშვილი, გამგებლის მოადგილე სოფლის მეურნეობის საკითხებში ლაშა ღლონტი და ადგილობრივი მედიის წარმომადგენლები ადგილზე მისვლისას დარწმუნდნენ, რომ დათესილი 8 ჰექტარი ფართობიდან 5 ჰექტარზე მოსავალი ვერ მიიღეს.
_ ფერმერებს არ უვლიათ სიმინდის ყანებში ისე სტაბილურად, როგორც ჟურნალისტები დადიან! _ ეს რეპლიკა გამგებლის მოადგილეს, ლაშა ღლონტს ეკუთვნის.
მართლაც, მერიის ამ ფართობში, გაზაფხულზე, თესვის პროცესს ჟურნალისტები ესწრებოდნენ, დროდადრო კი ამერიკული სიმინდის აღმოცენების და განვითარების ამბებსაც აშუქებდნენ.
ახლა, როცა ჯერი მოსავალზე მიდგა და სახეირო ბევრი არაფერია, პატრონი მაინც ჯიუტობს:
_ ალბათ, ადგილმდებარეობის გამო მოხდა ასე. სულ 8 ჰექტარი მქონდა დათესილი, 5 ჰექტარზე მოსავალი მცირეა, სამ ჰექტარზე კი, ასე, 30 ტონა სიმინდი იქნება. მომავლისთვის აუცილებლად გავითვალისწინებ რჩევებს. ზედმეტი ტენიანობის და უამინდობის გამო, წყალი დადგა საყანე ფართობში, სიმინდის თესლი არ ამოვიდა, არც კი გაღვივებულა _ იგი წყალმა დაალპო. ძირითადი სანიაღვრე არხები გაყვანილია, კიდევ სჭირდება ფართობს მოწესრიგება, მინდა სამომავლოდაც ვცადო, _ თქვა სურგულაძემ, თუმცა, მის ნათქვამს დამაჯერებლობა ნამდვილად აკლდა.
როგორც შევიტყვეთ, სურგულაძე სიმინდის მოყვანის გარდა, სხვა სამეურნეო საქმიანობას არ აწარმოებს. ამიტომაც გაჩნდა კითხვა, თუ რა უნდა მოუხერხოს მან 30 ტონა სიმინდს. მას შენახვა, გაშრობა და დამუშავება სჭირდება, ამის პირობები კი სურგულაძეს არ აქვს. მუნიციპალიტეტის გამგებლის მოადგილე სოფლის მეურნეობის საკითხებში, ლაშა ღლონტი ასე აკვალიანებს სურგულაძეს:
_ გასაშრობად სიმინდი აბაშაში უნდა წაიღოს. იქ გააშრობენ და შეინახავენ. იქვე მივა კლიენტი და შეისყიდის უკვე გამზადებულ პროდუქტს. ფერმერს მაინც დარჩება მოგება, რომ სამომავლოდ ისევ მოიყვანოს ეს კულტურა, _ გვითხრა მან.
_ რა ღირს ერთ ჰექტარზე დასათესი ამერიკული ჰიბრიდის თესლი?
_ ერთი ჰექტრისთვის ღირს 250 ლარი.
_ სიმინდის ტრანსპორტირება აბაშაში და იქ შენახვა ფერმერისთვის რამდენად მომგებიანი იქნება?
_ წინასწარ ვერ გეტყვით, რა რაოდენობის სარგებელი იქნება, მაგრამ ფერმერი მოგებას აუცილებლად ნახავს, რაც სამომავლოდ ხელს შეუწყობს მის საქმიანობას. 30 ტონა მოსავლისგან დარჩება გამშრალი და დამუშავებული 28 ტონა სიმინდი, _ თქვა ღლონტმა.
