რამდენიმე წუთის წინ, "პრაიმ ტაიმის" პრე-კლუბში საყდრისის დაცვის კომიტეტის წევრებმა, ნინო საღინაძემ, ანა მიქაუტაძემ და ირაკლი მამალაძემ კომიტეტში არსებულ შიდა დაპირისპირებაზე ისაუბრეს და განაცხადეს:
"ვაგრძელებთ ბრძოლას! სხვებისგან განსხვავებით არ ვეგუებით საყდრისის დანგრევას."
საყდრისის დანგრევაზე პასუხისმგებლობას ხელისუფლებასთან ერთად "პატრიოტთა ალიანსის ლიდერს“ ლიდერ ირამ ინაშვილსაც აკისრებენ.
"გურია ნიუსი" უცვლელად გთავაზობთ ირაკლი მამალაძის განცხადებას:
"საზოგადოებრივი კომიტეტი საზოგადოებრივ საწყისებზე შეიქმნა. შესაბამისად, ჩვენ გვინდოდა, რომ ამ პროცესებში ყოფილიყო პოლიტიკური პარტიების მინიმალური ჩართულობა, მაგრამ სამწუხაროდ მოხდა ასე და ესეც არის ერთ-ერთი მიზეზი იმისა, რომ საყდრისი დაინგრა. ძალიან ცუდად შემოიჭრა ამ პროცესებში "პატრიოტთა ალიანსი" და ირმა ინაშვილი.
მე, ნინო მიქიაშვილის გულწრფელობაში ეჭვი არ მეპარება, მაგრამ მან დიდი როლი ითამაშა იმაში, რომ "პატრიოტთა ალიანსის“ წევრები შემოსულიყვნენ ბანაკში, რომელიც საყდრისის გადარჩენის კომიტეტმა გააკეთა. სწორედ ამის გამო მოხდა ის, რომ ჩვენ დავკარგეთ ბევრი მხარდამჭერი. კერძოდ საპატრიარქოს ორგანიზაცია "დავითიანი" და "მწვანე მუშტი" . თუმცა, დღეს ისევ მოხდა ამ ძალების კონსოლიდაცია და ვებრძვით იმას, რაც საყდრისის გარშემო ხდება, მაგრამ ვაი რომ გვიანია.
მინდა მოვუწოდო თუ "პატრიოტთა ალიანსი" არ აფარებს ხელისუფლებას ხელს და თუ არ არის მასთან გარიგებული, როგორც ამბობს ირმა ინაშვილი, გამოათრიოს კულტურის მინისტრი კაბინეტიდან.
როგორც ის აცხადებს და გვადანაშაულებს , თითქოს ჩვენ ჩავერთეთ ცუდად და შევუწყვეთ ხელი საყდრისის ნგრევას. ეს არის აბსურდი! ბოლო პერიოდი ავირჩიეთ სამართლებრივი ბრძოლა. ჩვენ ვიყავით სასამართლოზე დამოკიდებული, რადგან ჩვენი ფინანსური რესურსით ადგილზე ვერ გავაგრძელეთ ვერანაირი აქტივობა.
ჩვენ ვიბრძოდით თბილისიდან, მოვიგეთ ორი პროცესი და მთლიანად მათ ხელში იყო ყველაფერი. ბოლო დროს ისინი აკონტროლებდნენ ადგილზე სიტუაციას. ადგილზე იყო ნინო მიქიაშვილი და ბოლნისის რაიონის "პატრიოტთა ალიანსი". ძალიან სამწუხაროა, რომ მათ თვალწინ აფეთქდა საყდრისი და ისიც კი არ გააკეთეს, როცა აფეთქება მოხდა, ჩვენთვის დილით მაინც შეეტყობინებინათ, რათა ჩავსულიყავი და მოგვეხდინა რეაგირება.
ჩვენ ვაგრძელებთ ბრძოლას, სხვებისგან განსხვავებით არ ვეგუებით საყდრისისი დანგრევას."
"გურია ნიუსმა" მამალაძის ბრალდებებთან დაკავშირებით "პატრიოტთა ალიანსის“ ლიდერთან ირმა ინაშვილთან სცადა დაკავშირება. მას ტელეფონი გამორთული აქვს.
