ციხე გისოსების გარეშე და პატიმრები, რომლებსაც სახლში წასვლის უფლება აქვთ

თავისუფლების შეზღუდვის დაწესებულებაში, რომელიც მსჯავრდებულებს საზოგადოებაში რეინტეგრაციისთვის, რეაბილიტაცისა და გათავისუფლებისთვის ამზადებს ამჟამად 15 მსჯავრდებულია, თუმცა ის 75-100 პატიმარზეა გათვლილი.

აქ მსჯავრდებული გათავისუფლებისთვის ემზადება. პატიმრობაზე, ნარკოტიკზე, ალკოჰოლზე დამოკიდებულებას იხსნის, გადის ინტენსიურ რეაბილიტაციას და პროფესიული გადამზადებას.

დაწესებულება თბილისში, გლდანში მდებარეობს და 2014 წლის 3 ივნისს გაიხსნა.

თავისუფლების შეზღუდვის დაწესებულება გამიჯნულია სასჯელაღსრულების დეპარტამენტის სტრუქტურისგან, ის პრობაციის სააგენტოს დაქვემდებარებაშია.

დღეს მედიასაშუალებების წარმომადგენლებს საშუალება ჰქონდათ, დაწესებულება სამინისტროს წარმომადგენლებთან ერთად, თავად დაეთვალიერებინათ.

დაწესებულების ტერიტორიაზე განთავსებულია საცხოვრებელი კომპლექსი, სარეაბილიტაციო ცენტრი, სპორტული მოედნები, ღია ეზო, შეხვედრების ოთახი, სასადილო, საკონფერენციო დარბაზი, მაღაზია, კომპიუტერული კლასი, მოსასვენებელი ოთახი და ბიბლიოთეკა, რომლით სარგებლობაც მსჯავრდებულებს დღის განმავლობაში შეუზღუდავად შეუძლიათ.

დაწესებულებას ექიმი დილის 10-დან საღამოს 6-მდე ემსახურება. 4 დღეში ერთხელ კი, მორიგე ექიმი 24-საათიან რეჟიმში მუშაობს. პატიმრებს ყოველ 2 კვირაში გეგმიური შემოწმება უტარდებათ.

მსჯავრდებულებს შაბათ-კვირას დაწესებულების დატოვების და ოჯახებში წასვლის უფლებაც აქვთ. ის მსჯავრდებულები კი, რომლებიც საპატიო მიზეზის გარეშე დაწესებულებაში არ გამოცხადდებიან, საპატიმროებს უბრუნდებიან. ასეთი ჯერჯერობით ორი შემთხვევა იყო.  

მსჯავრდებულებს შესაძლებლობა აქვთ, ადგილზე შეისწავლონ ელექტრიკოსის, მეფილე-მომპირკეთებლის, ბუღალტრის, კომპიუტერული ინჟინრის, სტილისტის, მემინანქრის პროფესიები, დასაქმდნენ და თვეში 260-ლარი ხელფასის სახით მიიღონ.

მსჯავრდებულები უკვე დასაქმებული არიან დაწესებულებაში არსებულ მაკარონის საამქროში. უახლოეს პერიოდში კი ტერიტორიაზე პურის საცხობი და ხის საამქრო გაკეთდება.

მსჯავრდებულების საქმეებზე ადგილობრივი საბჭოები ინდივიდუალურად მუშაობენ. დაწესებულებაში მოსახვედრად აუცილებელია, განსაკუთრებით მძიმე დანაშაულის შემთხვევაში მსჯავრდებულს 2/3 უნდა ჰქონდეს მოხდილი, ნაკლებად მძიმე დანაშაულის შემთხვევაში 1/3, მძიმე დანაშაულის შემთხვევაში კი  – ნახევარი. თუ ეს ვადა ამოწურულია პატიმარს დადებითი დახასიათება აქვს, შეუძლია ადგილობრივ საბჭოს მიმართოს, თანხმობა განაცხადოს თავისუფლების შეზღუდვის დაწესებულებაში გადასვლაზე, საწარმოში მუშაობაზე და სარეაბილიტაციო საქმიანობაში ჩართულობაზე.

"გურია ნიუსთნ“ საუბრისას პრობაციის სააგენტოს ხელმძღვანელი გიორგი არსოშვილი ამბობს, რომ ამ დაწესებულებაში გადმოსვლის ერთ-ერთი პირობაა, მსჯავრდებულმა თანხმობა განაცხადოს სარეაბილიტაციო – პროფესიულ საქმიანობაში ჩართვაზე და დასაქმდეს.

უნდა აღინიშნოს ისიც, რომ დაწესებულება არ არის შემოსაზღვრული მავთულხლართით და სხვა ციხეებისგან განსხვავებით დაცვის განსაკუთრებული ზომებიც არ აქვთ.

სასჯელაღსრულებისა და პრობაციის მინისტრი გიორგი მღებრიშვილი ამბობს, რომ დაწესებულება, რომელიც ხიდის ფუნქციას ასრულებს მსჯავრდებულებსა და დანარჩენ საზოგადოებას შორის, სამხრეთ კავკასიაში ანალოგი არ აქვს.

ცნობისთვის, სამინისტროს 2015 წლის ბიუჯეტში უკვე გაწერილია, რომ მსგავსი დაწესებულების მშენებლობა დასავლეთ საქართველოში, თერჯოლაში დაიწყება. 2016 წელს კი, მისი გახსნა იგეგმება. რაც შეეხება ქალი და არასრულწლოვანი მსჯავრდებულებისთვის მსგავსი დაწესებულების მოწყობას, ეს მომავალი წლის ბიუჯეტში გაწერილი არ არის.