ლანჩხუთის მუნიციპალიტეტის გამგეობამ, ერთი თვის წინ, არაკომერციული იურიდიული პირების რეორგანიზაცია მოახდინა და ამის ერთ-ერთი შედეგი ახალი ა(ა)იპ-ის შექმნა იყო.
ორ ა(ა)იპ-ის _ "აგრობიზნესცენტრისა" და "ტურიზმის განვითარების ცენტრის" გაერთიანებას, ორი შტატითა და ორი მუნიციპალური ავტობუსით _ შპს "ლანჩხუთი-სერვისი" შეემატა და ამის ნაყოფი ახალი ა(ა)იპ-ი, "საგარეო, ეკონომიკური კავშირურთიერთობების, ინვესტიციების, ტრანსპორტის, ტურიზმის და მეწარმეობის განვითარების ცენტრი" აღმოცენდა.
ახალი ა(ა)იპ-ის შექმნას ლანჩხუთის საკრებულოს დეპუტატთა მხრიდან არაერთგვაროვანი შეფასება მოჰყვა.
"ამ ა(ა)იპ-ის დაფინანსება, სულ რაღაც 135 ათასი ლარია. აქედან, 90%-ზე მეტი თანამშრომელთა სახელფასო ფონდია და რა საქმე უნდა გააკეთოს, რა პროგრამები უნდა განახორციელოს უფულოდ?" _ იკითხა ბიუროს სხდომაზე საკრებულოს "ეკონომიკის, ქონების მართვისა და ბუნებრივი რესურსების საკითხების" კომისიის თავმჯდომარე გიორგი ჩახვაძემ.
კოლეგას, "საფინანსო-საბიუჯეტო" კომისიის თავმჯდომარე ალეკო სარიშვილიც დაეთანხმა.
"კომისიის სხდომაზე ჩვენ ვერ დავინახეთ ის ხედვა და პროგრამები, რომლითაც სამომავლოდ ამ ცენტრმა რომ უნდა იმუშაოს", _ თქვა ჩახვაძემ.
ფრაქცია "თავისუფალი დემოკრატების" ლიდერი, ელგუჯა ჩხაიძე ჩიბათში ჩაის გადასამუშავებელი საწარმოს ფუნქციონირებითაც დაინტერესდა.
"ვინმემ იკითხა, რა ხდება იქ, რაა შემოსავალი და რაა გასავალი?უნდა ვიცოდეთ ეს, თუ არა?"_ იკითხა ჩხაიძემ.
შეკითხვებზე პასუხის გაცემა გამგებელმა, ზაზა ურუშაძემ ითავა:
"თავის დროზე ჩვენი ჩანაფიქრი ამ სამი სფეროს _ ტრანსპორტის, ტურიზმის და სოფლის მეურნეობის ერთად თავის მოყრა და მართვა იყო. უამრავი რამაა გასაკეთებელი ამ მხრივ. თუნდაც, ავიღოთ ტრანსპორტი. ყველა მუნიციპალიტეტში, სადაც ვიკითხე, ეს საკითხი დალაგებულია, ჩვენთან კი სრული განუკითხაობაა. გაურკვეველია, ვინ რა ხაზზე დადის და რა მარშრუტით, მძღოლები თვითნებობენ და სადამდისაც უნდათ, იქამდე მიდიან. აი, მაგალითად, ვერ მივაღწიეთ იმას, ჯაპანამდე რომ აქვთ მარშრუტი, ბოლომდე მივიდნენ და ხალხი შუა გზაზე არ დატოვონ. ამ ახალმა ცენტრმა ეს საკითხები უნდა დაალაგოს და უკვე მივეცი კიდეც შესაბამისი დავალება. ველოდები კონკრეტულ ეფექტურ წინადადებებს.
ტურიზმს რაც შეეხება, წესით, ამ სფეროს აქეთ უნდა შემოჰქონდეს ბიუჯეტში თანხები და არა, პირიქით. ჩვენ, უბრალოდ, ხელი უნდა შევუწყოთ ტურიზმის განვითარებას და უფრო მეტი ტურისტის მოზიდვა შევძლოთ. კონკრეტული გეგმები გვაქვს ზღვისპირა ზოლში მუნიციპალური პლაჟის კეთილმოსაწყობად, სადაც ინფრასტრუქტურა უნდა მოვაწესრიგოთ და დამსვენებლებს უკეთესი პირობები შევუქმნათ", _ თქვა ურუშაძემ.
გამგებელმა წუხილი გამოთქვა სოფლის მეურნეობის განვითარების კუთხით ფერმერთა დაინტერესებაზეც.
"ამ ა(ა)იპ-ის ერთ-ერთი მთავარი მიზანი ფერმერთა ხელშეწყობაა. რამდენჯერ განვაცხადე, თუ რაიმე ბიზნეს-გეგმის გაკეთება სურს ვინმეს, მოვიდეს, დაეხმარებიან, ყველაფერს გაუმზადებენ, მაგრამ არავინ არ ჩანს ჯერ. ასეთი პასიურობით კი არაფერი გამოვა", _ დასძინა ურუშაძემ.
