ოზურგეთის მუნიციპალიტეტის ყოფილი საავადმყოფოს შენობაში მცხოვრებლებმა ელექტროენერგიის ჩაჭრის გამო საპროტესტო აქცია გამართეს და გზა გადაკეტეს.
როგორც “გურია ნიუსს“ აქციის ერთ-ერთმა მონაწილემ მანანა ბურკაძემ აღნიშნა, ადგილობრივი ხელისუფლების წარმომადგენლებმა აღნიშნული პრობლემის შესახებ იციან, თუმცა, რეაგირებას ხვალ დილამდე ვერ მოახდენენ.
“გაგვაგებინეთ ერთი 21 -ე საუკუნეში შუქი რომ არ გექნება ესაა ცხოვრება? ხომ შეიძლება დაკვაალიანონ, ჩვენ ადამიანები არ ვართ? იყო ქალაქის მერიც მოსული, მისი მოდგილეც და ვიცე მერიც, ყველა წარმომადგენლები, ხვალ მოვალთ დილას 9 საათზე და გადავწყვეტთ რა ვქნათო, ვაცლით ხვალამდე, რას გვიპირებენ, ამაზე მეტი საშინელება შეიძლება იყოს რამე?“ _ ამბობს ბურკაძე.
“წყალი და გაზი ჩვენ არ გვაქვს, არც შუქი? პირველყოფილი ადამიანებით ვართ, დაგვეხმაროს ხელისუფლება! გარეთ ვერ გაგვაგდებენ ეს კი ვიცით, გათბობის საშუალება ჩვენ არ გვაქვს, ფიზიკურად ვმუშაობთ, ვისთან დავდივართ სად რას ვაკეთებთ არ ვიცით, რომ უბრალოდ ვიცოცლოთ! წავალათ და დავუჯდებით მაგათ სახლში!“ _ ამბობს აქციის მონაწილე მარინა ხურციძე.
“ძალიან მძიმე მდგომარეობაა. კანალიზაციაც არ არის. არჩევნების დროს მოვიდნენ და გვითხრეს, რომ ის პრობლემები, რომელიც არის ყოფილი საავადმყოფოს შენობაში, მოაგვარებდნენ. შუქი არ არის, წყალი არ გვაქვს, ეს არის მთავარი პრობლემა, აქ ყველას გვიჭირს. დახმარება ვის არ ვთხოვეთ, მაგრამ შედეგი არ ჩანს, ჩვენი პრობლემა ისევ მოუგვარებელია“ _ ამბობდნენ საავადმყოფოს ეზოში შეკრებილნი.
“გურია ნიუსი“ კომენტარისთვის ქალაქ ოზურგეთის ვიცე-მერს ალეკო ბურჭულაძეს დაუკავშირდა, თუმცა მან სატელეფონო ზარებს არ უპასუხა.
ქალაქ ოზურგეთის მერის მოადგილე კობა დუნდუა კი, “ გურია ნიუსთან“ ამბობს, რომ აქცია უკვე დაშლილია და ამ ადამიანების პრობლემაც მოგვარებულია.
კობა დუნდუა: “აქცია დაიშალა, ჩვენ მოვაგვარეთ ყველაფერი და ავიდნენ ისინი სახლში“.
_ ბატონო კობა, იქ ვიყავით და აქცია ისევ გრძელდება…
_ ჩვენ რომ ამოვედით ყველა შენობაში იყო შესული, შუქი ყველას ჩაერთვება, ზოგს ახლა ჩაურთეს, ზოგს ხვალ ჩაურთავენ, მაგათ “ლევად“ ჰქონდათ დენი შეყვანილი, ეს ხომ არ შეიძლება? ამიტომ მოხდა ჩაჭრა, _ გვითხრა დუნდუამ.
