18 დეკემბერს, ოზურგეთის მუნიციპალიტეტის საკრებულოს რიგგარეშე სხდომა შედგა, რომლის დღის წესრიგი შვიდი საკითხით იყო წარმოდგენილი. სხდომას 35 დეპუტატი ესწრებოდა. საკრებულოს თავმჯდომარე დავით დარჩიამ ახალი წლის ადრიანი მილოცვით დაიწყო და დეპუტატებს განუცხადა, რომ 2015 წლის ბიუჯეტის დამტკიცება ამ წლის 25 დეკემბერს მოხდება, გასვლითი სხდომა ჩატარდება დაბა ურეკში, ახლა კი წინა წლის ბიუჯეტში მომხდარ ცვლილებებს კიდევ ერთხელ მიმოიხილავდნენ.
პირველი საკითხის ირგვლივ, "ოზურგეთის მუნიციპალიტეტის 2014 წლის ბიუჯეტის დამტკიცების შესახებ" _ ოზურგეთის მუნიციპალიტეტის საკრებულოს 2014 წლის 13 აგვისტოს N 3 დადგენილებაში ცვლილების შეტანის თაობაზე, საფინანსო სამსახურის უფროსმა გია მამაკაიშვილმა ისაუბრა. მან თქვა, რომ შემოსავლების და გადასახდელების ნაწილში ბუჯეტი 120,0 ათასი ლარით გაიზარდა. თანხის სხვადასხვა რაოდენობით შემცირდა გამგეობის და საკრებულოს საწვავ-საპოხი მასალების ხარჯი, საკრებულოს შტატგარეშე მომუშავეთა, კავშირგაბმულობის, ახალგაზრდული პროგრამების დაფინანსების, კომუნალური, კომპიუტერული პროგრამების შეძენის და განახლების, სამხედრო აღრიცხვის და გაწვევის სამსახურის შრომის ანაზღაურების ხარჯები. გაზრდილია ინფრასტრუქტურული, მრავალშვილიანი ოჯახების ხარჯები. ასევე, გაიზარდა მუნიციპალიტეტის გამგეობის არაფინანსური აქტივები _ 50,0 ათასი ლარით და მუნიციპალიტეტის საკრებულოს არაფინანსური აქტივები _ 40,0 ათასი ლარით.
გია მამაკაიშვილმა ისაუბრა გამგეობისა და საკრებულოსთვის ახალი ავტომობილების შეძენის თაობაზე, რადგან ძველ მანქანებს მუდამ შეკეთება და რემონტი სჭირდება. ასევე, ისაუბრა ადმინისტრაციულ შენობაში სველი წერტილების მოგვარების აუცილებლობაზე.
დეპუტატებმა საყვედური გამოთქვეს მარად მოუგვარებელ პრობლემაზე, რასაც გამგეობის შენობაში კანალიზაციის საკითხი ჰქვია.
ლელა ნაცვალაძემ განმარტა, რომ სანამ კანალიზაციის პრობლემა არ მოგვარდება, მუდამ ასე იქნება, აკეთებენ და მაინც გაუკეთებელია. რემონტი კი, როგორც კეთდებოდა, კარგად ვიცით. სოფელ მაკვანეთის დეპუტატმა ნუგზარ კალანდარიშვილმა საახალწლოდ სოფლის ცენტრებში ნაძვის ხეების ელემენტარული მორთვა მოინდომა. დეპუტატთა ნაწილი არ დაეთანმხმა ამ აზრს, მათი აზრით, ჯერ სოფლის ცენტრები უნდა განათდეს და მერე უნდა მოხდეს ნაძვის ხის მორთვა. ზოგი ხუმრობის ხასიათზეც დადგა, ვიყიდოთ "სასროლები", ლეკიანში ყველა სოფელს აქვს საყანე ფართობები, ჩავიდეთ იქ და ერთად შევხვდეთ ახალ წელს, _თქვა გურიანთის გამგებელმა ბონდო ღლონტმა. დიმიტრი კვერღელიძემ აღნიშნა, რომ ამაში პრობლემას ვერ ხედავს, ევროპის ქვეყნებში მილიარდები იხარჯება სახალწლო განწყობისთვის და ჩვენ ეს 15 ათას ლარამდე თუ დაგვიჯდება. შესაძლებელია, რაღაცით ადამიანები გავახაროთო.
რაც შეეხება ახალი მანქანების შეძენას, ზოგმა მეორადის შეძენა სჯობსო, _ რჩევა არ დაიშურა, საბოლოოდ, შეთანხმდნენ, რომ უმჯობესია ახალი მანქანების შეძენა. 50 ათასი ლარი გამგეობისთვის, ხოლო 40 ათასი ლარი საკრებულოსთვის მანქანების შესაძენად უნდა დაიხარჯოს.
საბოლოოდ, ცვლილებას კენჭი ერთხმად უყარეს.
დღის წესრიგის მეორე საკითხს კი, "ოზურგეთის მუნიციპალიტეტის 2014 წლის სახელმწიფო შესყიდვების გეგმის დამტკიცების შესახებ" _ ოზურგეთის მუნიციპალიტეტის საკრებულოს 2014 წლის 13 აგვისტოს N14 განკრგულებაში ცვლილების შეტანის თაობაზე, შესყიდვების სამსახურის უფროსმა, ამირან გირკელიძემ ისაუბრა და შენიშვნის სახით აღნიშნა, რომ გეგმაში წარმოდგენილი არ არის მანქანების შეძენის ხარჯები და ასევე, სოფლებში ახალი წლის აღსანიშნავად საჭირო თანხის გამოყოფის შესახებ. ამიტომ, როგორც კი იქნება წარმოდგენილი, გავითვალისწინებო. დეპუტატებმა მეორე საკითხს ამირან გირკელიძის შენიშვნის შემდეგ უყარეს კენჭი.
დღის წესრიგის მეოთხე საკითხმა, "ოზურგეთის მუნიციპალიტეტის გამგეობის თანამდებობის პირთა და გამგეობის მოხელეთა თანამდებობრივი სარგოების ოდენობების განსაზღვრის შესახებ" _ ოზურგეთის მუნიციპალიტეტის საკრებულოს დადგენილების მისაღებად საჯარო ადმინისტრაციული წარმოების დაწყების თაობაზე, გამგებლის მოადგილემ, არჩილ ყაზაიშვილმა ისაუბრა. მან თქვა, რომ რანგირების მიხედვით, თითქმის, ერთნაირია საკრებულოსა და გამგეობის თანამდებობის პირთა თუ თანამშრომელთა ხელფასები.
დეპუტატმა ბონდო ღლონტმა იხუმრა _ ჩვენ მთლად წყალწაღებულები ვართ, ეს 500 ლარი გვაქვს და რამდენი სირბილი გვიხდება. ურეკში რომ წავალთ გასვლით სხდომაზე, მაშინ მაინც მოგვიმატეთ რაიმეო. დავით დარჩიამ დაიფიცა კიდეც, რომ ამ საკითხზე უკვე საუბარი იყო.
თანამდებობის მიხედვით, მუნიციპალიტეტის გამგებლის ხელფასი იქნება 2650 ლარი, პირველი მოადგილის _ 2250 ლარი, მოადგილის _ 2100 ლარი და სამსახურის უფროსის 1680 ლარი. საკრებულოს თავმჯდომარის ხელფასი, ისევე, როგორც გამგებლის, 2650 ლარი უნდა იქნეს. აღნიშნული ცვლილებების განსახილველად მესამე საკითხის საჯარო ადმინისტრაციული წარმოების დაწყებას დეპუტატებმა კიდევ ერთხელ უყარეს კენჭი.
დეპუტატებმა, ასევე, დაჩქარების წესით უყარეს კენჭი დანარჩენ საკითხებს, რომელიც მშენებლობის სანებართვო მოსაკრებლის შემოღების და სანებართვო მოსაკრებლის გადახდის ინსტრუქციის დამტკიცებას, 2014 წლის ბიუჯეტის შესრულების 9 თვის გეგმის მიმოხილვას და ოზურგეთის მუნიციპალიტეტის გამგეობის მიერ, სახელმწიფო შესყიდვის გამარტივებული შესყიდვის საშუალებით გახორციელებას შეეხებოდა.
