ჟურნალისტთა ქსელი გენდერული თანასწორობისათვის მიერ გავრცელებული ინფორმაციით, ამერიკის შეერთებული შტატების პრეზიდენტმა ბარაკ ობამამ წლის უკანასკნელი პრესკონფერენციაზე უჩვეულო მეთოდს მიმართა – მან მხოლოდ ქალი ჟურნალისტების კითხვებს უპასუხა. ერთ-ერთი მედია საშუალების წარმომადგენლის განცხადებით, ჟურნალისტები წინასწარ გააფრთხილეს, რომ პრეზიდენტის პრესსამდივნოს სურდა იმ ადამიანებისთვის აღარ მიეცათ კითხვების დასმის საშუალება, რომლებიც ამას რეგულარულად აკეთებდნენ.
ობამამ ქალი ჟურნალისტებისათვის უპირატესობის მინიჭებას პრესკონფერენციის დასასრულსაც გაუსვა ხაზი. როდესაც იგი დარბაზის დატოვებას აპირებდა, ერთ-ერთმა მამაკაცმა ჟურნალისტმა მას კითხვა დაუსვა პრეზიდენტის საახალწლო რეზოლუციის შესახებ. ობამამ მამაკაცი ჟურნალისტის კითხვაზე პასუხის ნაცვლად, რადიოს კორესპონდენტ აფრილ რაიანს მაქცია ყურადღება და მის შეკითხვას უპასუხა.
ქალმა ჟურნალისტებმა პრეზიდენტების პერსკონფერენციბზე დასწრების უფლება მხოლოდ 60-იან წლებში მიიღეს. პირველი ქალი ჟურნალისტი, რომელმაც მოახერხა, რომ ამერიკის პრეზიდენტის ყურადღება მიეპყრო იყო ჰელენ ტომასი, რომელიც გასულ წელს გარდაიცვალა. იგი ჯონ კენედის პრეზიდენტობიდან მოყოლებული, ამერიკის პრეზიდენტების მიერ გამართულ პრესკონფერენციებზე ყოველთვის პირველ რიგში იკავებდა ადგილს. 1962 წლამდე ქალებს არც კი ჰქონდათ უფლება დასწრებოდნენ თეთრი სახლის კორესპონდენტების სადილს. მხოლოდ ტომასმა მოახერხა ამ წესის შეცვლა, თუმცა ჟურნალისტთა კორპუსში მაინც მამაკაცები დომინირებდნენ.
