ამჯერად, საქმე ახალ ფაზაშია შესული. როგორც ჩანს, უახლოეს მომავალში, საპროცესო გარიგებების გრძელ სიას კიდევ ერთი სისხლის სამართლის საქმე შეემატება. პროკურატურას დასაზუსტებელი მხოლოდ პირობების დეტალები დარჩა. ამის შესახებ სასამართლო პროცესზე სახელმწიფო ბრალმდებელმა, ემზარ ღარიბაშვილმა განაცხადა. საზოგადოების დიდი ინტერესიდან გამომდინარე, შევეცდებით დეტალურად გესაუბროთ ამ პროცესზე განვითარებული მოვლენების შესახებ.
გიორგი ტაკიძის მეგობრები და ოჯახის წევრები, პროცესის დაწყებამდე, ნახევარი საათით ადრე შეიკრიბნენ. მათ აშკარად ეტყობოდათ, რომ განაჩენის მოლოდინში იყვნენ. შეგახსენებთ, რომ წინა პროცესი ბრალდებული მხარის მიერ საპროცესო გარიგებაზე გამოთქმული ინიციატივის გამო გადაიდო. არადა, 20 სექტემბერს გამართულ პროცესზე, გიორგი ტაკიძის ადვოკატი მირდატ ქამადაძე ჩვენთან საუბრისას ამბობდა, რომ მისი დაცვის ქვეშ მყოფ პირს არანაირი დანაშაული არ ჩაუდენია და არც ის და არც მისი დაცვის ქვეშ მყოფი არ ეთანხმებოდნენ პროკურატურის მიერ წარმოდგენილ არც ერთ მტკიცებულებას, რომელიც საქმეში იდო. მისივე თქმით, ბრალდების მხარეს ერთადერთი მტკიცებულება გააჩნდა მერაბ კურდღელაშვილის ჩვენების სახით. თუმცაღა, იქვე დასძინა, რომ რაღაც ეტაპისთვის საპროცესო შეთანხმებაზე საუბარსაც არ გამორიცხავდა.
როგორც ჩანს, ვითარება შეიცვალა და საპროცესო გარიგების ეტაპიც დადგა. რა პირობებს სთავაზობს დაცვის მხარე პროკურატურას და რამდენად თანახმაა ეს უკანასკნელი, ამის შესახებ ინფორმაცია, ჯერჯერობით, გასაიდუმლოებულია. თუმცა, სასამართლო პროცესის დაწყებამდე, გიორგი ტაკიძის ერთ-ერთმა ახლობელმა განაცხადა, რომ საუბარი იყო 20 000 ლარის გადახდასა და სასჯელის ზომად 8-წლიანი პატიმრობის შეფარდებაზე. ამ ინფორმაციის დაზუსტება ადვოკატთან გადავწყვიტეთ, რომლის სრულ კომენტარსაც დეტალურად შემოგთავაზებთ.
საპროცესო გარიგების დადების შემთხვევაში, გიორგი ტაკიძე დუმილის უფლებას დაარღვევს და ბუნებრივია, ბრალის აღიარებაც მოუწევს სრულად თუ არა, ნაწილობრივ მაინც. აქამდე ის დუმილის უფლებით სარგებლობდა, მეორე ბრალდებული, ოზურგეთის მუნიციპალიტეტის დასუფთავების სამსახურის ყოფილი უფროსი, მერაბ კურდღელაშვილი კი ბრალს სრულად აღიარებდა.
რაც შეეხება კურდღელაშვილს, მას საკმაოდ დაძაბულ სიტუაციაში უხდება პროცესებზე სიარული და გამონაკლისი არც იმდღევანდელი პროცესი იყო. გიორგი ტაკიძის ოჯახის წევრებისა და მეგობრების გვერდით ჩავლა, მისთვის, ფაქტობრივად, სირცხვილის კორიდორის გავლის ტოლფასია. “არც კი შეგრცხვეს, არ შეგაწუხოს ნამუსმა და კაცობამ, ისე ჩამიარე გვერდით”, _ ასეთი რეპლიკით შეხვდა მის გამოჩენას გიორგი ტაკიძის დედა. რეპლიკა არც წინა პროცესზე დაუკლიათ მისთვის: _ “ჩემი შვილი როცა გამოვა ციხიდან, კაცად მაინც დარჩება, სხვამ იკითხოს, თორემ…”
ასეთი დამოკიდებულება კურდღელაშვილისადმი, როგორც ჩანს, მის მიერ პირველსავე დღეებში დანაშაულის აღიარებითაა გამოწვეული, რის შემდეგაც ის გირაოს სანაცვლოდ გაათავისუფლეს. მან სასამართლოზეც დაადასტურა, რომ ბრალს სრულად აღიარებდა და აბსოლუტურად ყველაფერში ეთანხმებოდა ბრალდების მხარეს.
28 ოქტომბრის სასამართლო სხდომაზე, მოსამართლე ლელა ნოზაძემ განაცხადა, რომ წინა პროცესი საპროცესო გარიგების დადების მოტივაციით გადაიდო და სახელმწიფო ბრალმდებელს ჰკითხა, მზად იყვნენ თუ არა მხარეები კონკრეტულ პირობებზე სასაუბროდ. პროკურორმა ემზარ ღარიბაშვილმა თქვა, რომ მისთვის დაცვის მხარის პირობების შესახებ ცნობილი იყო, მაგრამ მოსაფიქრებლად კიდევ გარკვეული პერიოდი სჭირდებოდათ და 10-დღიანი ვადა ითხოვა. მოსამართლემ დააკმაყოფილა მისი შუამდგომლობა და პროცესი გადადო.
ტაკიძის სასამართლო პროცესი იმითაც არის გამორჩეული, რომ ყველა მხარე (აღარაფერს ვამბობთ პროკურატურაზე) თავს არიდებს მედიასთან ურთიერთობას.
ჩვენ შევეცადეთ გარკვეული ინფორმაცია მიგვეღო გიორგი ტაკიძის დედისგან, რომელმაც განგვიცხადა, რომ ის ძალიან მადლობელია ჟურნალისტების მუშაობის, რომლებიც აშუქებენ მისი შვილის საქმეს და განსაკუთრებულ მადლობას გაზეთ “გურია ნიუსს” უხდის ობიექტურობისთვის: “სხვას ვერაფერს გეტყვით. მეტი მე თვითონაც არაფერი ვიცი. აქ რომ მოვდივარ, მაშინ თუ გავიგებ რამეს…”
სამწუხაროდ, მეტი კითხვის დასმის საშუალება არც მოგვეცა, რადგან როგორც კი შენიშნეს, რომ ქალბატონს ვესაუბრებოდით, იმ მოტივით, თითქოს, მას ტელეფონზე ურეკავდნენ, ზრდილობიანი ჟესტით სთხოვეს გვერდით გასვლა.
ჩვენ რამდენიმე კითხვის დასმა გიორგი ტაკიძის ადვოკატისთვის, მირდატ ქამადაძისთვის მოვახერხეთ:
_ ბატონო მირდატ, ისევე როგორც გიორგი ტაკიძის სხვა ახლობლებს, თქვენც შორს გიჭირავთ თავი მედიასთან ურთიერთობისგან. ვერ გვეტყვით, რა არის ამის მიზეზი?
_ საქმე იმაში გახლავთ, რომ ეს ჩემზე არ არის დამოკიდებული. მე კლიენტთან შეთანხმებით ვმოქმედებ და ამითაა განპირობებული ჩემი დუმილიც, თორემ კომენტარს თავს ნამდვილად არ ვარიდებ.
_ ანუ თვითონ გიორგი ტაკიძეს არ სურს მისი საქმის შესახებ საუბარი?
_ დიახ, მას არ სურს, სანამ საქმე საბოლოოდ არ გადაწყდება და რაიმე სახის განაჩენი არ გამოვა.
_ მაგრამ ის ყოფილი სახელმწიფო მოხელე და საჯარო პირია. ბუნებრივია მედიის დიდი ინტერესიც ამ პროცესის მიმართ.
_ გასაგებია, მაგრამ ეს მისი გადასაწყვეტია. ვინც არ უნდა იყოს, ვალდებული ვარ, მისი ინტერესები დავიცვა. თანაც სასამართლო პროცესი დახურული არ არის და ნებისმიერ ჟურნალისტს შეუძლია დასწრება და გაშუქება. კიდევ ერთხელ გეტყვით, რომ შეფასებებისგან თავს ჩემი დაცვის ქვეშ მყოფის ინტერესებიდან გამომდინარე ვიკავებ.
_ საპროცესო გარიგების დადება თქვენი ინიციატივა იყო?
_ რა თქმა უნდა. თქვენ ახლა მაინც კომენტარის ჩამორთმევას ცდილობთ, არა?
_ დიახ. თანაც საპროცესოს შესახებ ახლა ოფიციალურად გაცხადდა და პროკურორმაც დაადასტურა. როგორც გავიგეთ, საუბარია 8-წლიან სასჯელსა და 20 000 ლარზე.
_ არა, ეგ არ არის სწორი ინფორმაცია, ძალიან ცუდი პირობები გცოდნიათ. გაცილებით უკეთესს პირობებზეა საუბარი.
_ მაშინ რატომ არ თანხმდებით და რატომ გადაიდო პროცესი?
_ იმიტომ, რომ კიდევ უფრო უკეთესი შედეგი გვინდა.
როგორც ჩანს, შემდეგ პროცესზე ყველაფერი გაირკვევა და განვითარებული მოვლენების შესახებაც ასევე დეტალურად გესაუბრებით.
კიდევ ერთხელ შეგახსენებთ, რომ ოზურგეთის მუნიციპალიტეტის გამგებელი გიორგი ტაკიძე, საქართველოს მთავარი პროკურატურის ანტიკორუფციული დეპარტამენტის თანამშრომლებმა საკუთარ სახლში, 4 აგვისტოს, დილის საათებში აიყვანეს. ოფიციალური ინფორმაციით, მას დიდი ოდენობით ქრთამის აღება და 180 000 ლარის მითვისებაში თანამონაწილეობა ედება ბრალად. ქრთამის მიღების სანაცვლო, როგორც ამას დასუფთავების სამსახურის ყოფილი ხელმძღვანელი, მერაბ კურდღელაშვილი აღიარებით ჩვენებაში ამბობს, 1 100 000 ლარის მომსახურების შესყიდვაზე ხელშეკრულების გაფორმების ლობირება იყო. თუმცა, ჩვენს მიერ მოპოვებული ინფორმაციის თანახმად, არავითარი ხელშეკრულება არ არსებობს. საინტერესოა, რომ ოზურგეთის გამგეობიდან გამოთხოვილი და მიღებული ოფიციალური ინფორმაციაც ამას ადასტურებს: “ოზურგეთის მუნიციპალიტეტის მიერ, 2010-2011 წლებში, სახელმწიფო შესყიდვა დასუფთავების მომსახურების შესყიდვაზე არ გახორციელებულა. შესაბამისად, არ გაფორმებულა არავითარი ხელშეკრულება. რაც შეეხება ქალაქის დასუფთავებაზე გაწეულ ხარჯებს, იგი ჩასმულია მუნიციპალიტეტის ბიუჯეტში და სუბსიდიის სახით ერიცხებოდა აიპ “ოზურგეთის დასუფთავების სამსახურს”.
ოზურგეთის მუნიციპალიტეტის ყოფილი გამგებლის გია ტაკიძეს სასამართლო პროცესი ამ წლის 11 ნოემბერს, 11 საათზე არის ჩანიშნული.
