საქართველოს პრემიერ-მინისტრის, ირაკლი ღარიბაშვილის ინფორმაციით, ხელისუფლება "მაესტროს" საქმიანობაში არ ერევა:
_ "მაესტროს" საქმიანობაში ხელისუფლება არ ერევა და არ მაქვს ამის სურვილი, რაღა მაინცდამაინც "მაესტრო", თუ ჩარევაა სხვაგან ჩავერეოდით. ერთადერთი ტელევიზია, რომელიც ასოცირდებოდა ხელისუფლებასთან იყო მეცხრე არხი, რომელიც დაიხურა საპრეზიდენტო არჩევნებამდე 1 თვით ადრე. ყველა არის გაოცებული, არავის არ ჯერა, მაგრამ ეს არის რეალობა. ჩვენ რომ გვქონდეს ტელევიზია, ის ქაოსი და ის დაძაბული ფონი, რაც ხდება დღეს მედიასაშუალებებში, არ იქნებოდა. თუ არის კონტროლირებადი მედია და ტელევიზია, იქ რეალურად სხვანაირად იქნებოდა ყველაფერი, _ განაცხადა ღარიბაშვილმა.
მისივე თქმით, ტელევიზიები მიზანმიმართულად ქმნიან ქაოს და დაძაბულობას:
_ ეს არის თავისუფალი მედიის დამსახურება. ჩვენ ამაში პასუხისმგებლობა გვაქვს მოხსნილი. ჩვენ შევპირდით მოსახელობას, რომ მედია გათავისუფლდებოდა, ხელისუფლების ჩარევისგან, ხელისუფლების ზეწოლისგან. ჩვენ არ ვართ ხელისულება, რომელმაც დამოუკიდებელი ტელკომპანია "იმედი" შტურმით აიღო 2007 წელს, დაარბიეს და ჟურნალისტები სცემეს. ჩვენ ვართ ხელისუფლება, რომელიც არის ტოლერანტული, მიუხედავად იმისა, მოგვწონს თუ არ მოგვწონს, ეს მათი უფლებაა. ეს არის თავისუფალი მედიის მთავარი მახასიათებელი, _ განაცხადა პრემიერ-მინისტრმა და დასძინა, რომ მედია რომ თავისუფალია, ამას პირველი არხის მუშაობა მოწმობს:
_ პირველ არხზე აბსოლუტური დამოუკიდებლობაა. ყველაზე კრიტიკული შეკითხვები პირველი არხის ჟურნალისტმა დამისვა. ასეთია ჩვენი არჩევანი, ეს არის ჩვენი დანაპირები, რომ მედია იყოს თავისუფალი, _ აღნიშნა მთავრობის მეთაურმა.
