“ამ ქმედებით, რაც ხელისუფლებამ ჩაიდინა, ოჯახის კიდევ ერთი წევრი მეღუპება”

ჩოხატაურის მუნიციპალიტეტში ადგილობრივი თვითმმართველობის მოხელეთა შესარჩევი კონკურსი გუშინ დასრულდა. კონკურსანტებს შედეგები ჯერჯერობით ოფიციალურად არ ჩაბარებიათ, თუმცა, გასული კანდიდატების ვინაობა უკვე ცნობილია.

როგორც გვითხრეს, შერჩეული კანდიდატების უმრავლესობა გამგეობის მოქმედი თანამშრომელია. თუმცა, აღმოჩნდა გამონაკლისიც. როგორც "გურია ნიუსმა" გაარკვია ჩოხატაურის მუნიციპალიტეტის გამგეობის სოციალური განყოფილების ხელმძღვანელის პოსტზე ვერ მოხვდა თემურ ბენდელიანი, რომელმაც ტესტირების შედეგად 42 ქულა მიიღო. ჩვენი ინფორმაციით ბენდელიანს კომისიის 5 წევრიდან ხმა არცერთმა არ მისცა.

_ ეს ყველაფერი ჩოხატაურის გამგებელმა, ირაკლი კუჭავამ და კომისიის თავმჯდომარემ, მინდია ჟღერიამ გააკეთეს. მათ არ უნდოდათ რომ მემუშავა. ჩემნაირი პატიოსანი ადამიანი არ სჭირდებათ სამსახურში, მაგრამ ამას ასე არ დავტოვებ. ერთ დღეს ვაძლევ და შემდეგ ჩემი სიმართლის დასამტკიცებლად სამართლებრივად ვიბრძოლებ, _ გვითხრა ბენდელიანმა, რომელსაც თანამდებობაზე არ არჩევის გამო ჯანმრთელობის პრობლემები შეექმნა:

_ ახლა სახლში ვარ და ვწევარ. იმედია გართულებები არ მექნება. თუმცა, რთულია ასეთ უსამართლობას და მიზანმიმართულ ქმედებებს ემოციის გარეშე შეხვდე, _ გვითხრა ბენდელიანმა.

თემურ ბედნელიანის მეუღლის, ნათია ანდღულაძის თქმით ადგილობრივმა ხელისუფლებამ მისი მეუღლე პირადი შეხედულებების გამო გაათავისუფლა:

_ არ უნდოდათ თემურისნაირი ადამიანი სამსახურში. 62 წლის კაცმა 42 ქულა აიღო ტესტირებაზე. ეს ყველაფერი თავისი ცოდნით და ნიჭით მოახერხა და რატომღაც გასაუბრებაზე ჩაიჭრა. მაგ შენობაში ძმა მომიკლეს (ნათია ანდღულაძის ძმა, ბონდო ანდრულაძე 2008 წლის მოწვევის საკრებულოს დეპუტატი და ლეგალიზაციის კომისიის თავმჯდომარე იყო. ე.წ. ბახმაროს სკანდალის აგორებებიდან რამდენიმე დღეში ბონდო ანდღულაძე გულის შეტევით გარდაიცვალა. ავტ). ახლა ვატყობ, რომ ოჯახის მეორე წევრსაც მიკლავენ. არ ვიცი რა უნდა გავაკეთო. სტუდენტი შვილები მყავს, ოქროს მედალზე დაამთავრეს სკოლა. იმის გამო, რომ ვიღაცეებს ჩემი ქმარი არ ესიმპატიურებოდათ სწავლა უნდა შევაწვეტინო. ჩემი ოჯახის შემოსავლი ახლა მხოლოდ ჩემი მწირი ხელფასია, რომელიც წამლის ფულად არ მყოფნის. ჩემი მეუღლის ჯანმრთელობა საკმაოდ მძიმეა. ცოტა ხნის წინ სტენდირება გაუკეთდა გულზე. სასწრაფოსაც ხშირად ვიძახებთ. ეს მარტივი გადასამოწმებელია. ამ ქმედებით, რაც ხელისუფლებამ ჩაიდინა, ოჯახის კიდევ ერი წევრი მეღუპება და მე ვერაფერს ვაკეთებ, _ გვითხრა ანდღულაძემ.

ჩოხატაურის მუნიციპალიტეტის გამგებელი, ირაკლი კუჭავა ამბობს, რომ ის კომისიის მუშაობაში არ ჩარეულა:

_ ირაკლი კუჭავა არ ერეოდა არა თუ კომისიის მუშაობაში, მთლიანად გაემიჯნა ამ პროცესს. ეს იცის ყველამ, ვისაც ამის დანახვა უნდა. რაც შეეხება ბატონ თემურ ბენდელიანს, ამ დილით, ჩემი ინიციატივით შევხვდი მასაც და მის მეუღლესაც. ვუთხარი, რომ ისევ გამოცხადდება ვაკანსიები, მანამდე კი, რაც ჩემზე იქნება დამოკიდებული დავეხმარებოდი. ქალბატონმა ნათიამ მადლობაც კი გადამიხადა ასეთი დამოკიდებულებისათვის. ეს არის სიმართლე, _ აღნიშნა "გურია ნიუსთან" საუბრისას ირაკლი კუჭავამ.

საკონკურსო/საატესტაციო კომისიის თავმჯდომარე, მინდია ჟღერია ამბობს, რომ კომისიის მუშაობაში არავინ ჩარეულა:

_ კომისიამ იმუშავა კანონის ფარგლებში. ბატონი თემურის პასუხებმა ვერ დააკმაყოფილა კომისია და ამიტომ შეირჩა სხვა კანდიდატი, რომელიც ახალი სახეა. დარწმუნებით შემიძლია გითხრათ, რომ პირადი ინტერესი არავის არავის მიმართ არ ჰქონია, _ აღნიშნა ჟღერიამ.