საზღვაო გემი იზაბელა რომელიც 24 იანვარს ბათუმიდან შავი ზღვის ქალაქებში ხუთდღიან კრუიზში გაემგზავრა, მოულოდნელად ერთი საათის წინ ბათუმში დაბრუნდა. წინასწარი პროგრამის თანახმად გემი ქალაქ სოჭიდან სტამბულის პორტში უნდა შესულიყო, მაგრამ ორგანიზატორებმა პროგრამა შეცვალა.
გემზე ტურისტული კომპანიების, მასმედიის წარმომადგენლები და ტურისტებიც იმყოფებიან.
"გურია ნიუსი" გემზე მყოფ ერთერთი ტურისტული კომპანიის წარმომადგენელს დაუკავშირდა, რომლის ინფორმაციით, საკრუიზო მოგზაურობის ჩაშლის მიზეზი არაორგანიზებულობაა.
"ჯერ გემმა ბათუმის პორტიდან გასვლა დააგვიანა, მერე პროდუქტების დატვირთვა დროულად არ მოხერხდა, საწვავის ჩასხმა პრობლემა შეიქმნა. სოჭში გვიან ღამით ჩავედით და ფაქტიურად ქალაქის დათვალიერება ვერ მოვახერხეთ ნორმალურად.
სტამბულის პორტში გემის შესვლაზე კი საერთოდ უარი განაცხადეს. ყოველივე ამის გამო უკმაყოფილება გამოვთქვით და ამიტომ ახლა გვთავაზობენ, რომ გემი ბათუმის პორტში იქნება და იმ გასართობ ღონისძიებებს დავესწროთ, რომელიც წინასწარ იყო დაგეგმილი". – განაცხადა ტურისტული კომპანიის წარმომადგენელმა "გურია ნიუსთან" საუბარში.
აჭარის ტურიზმის დეპარტამენტში აცხადებენ, რომ ისინი ამ შემთხვევაში არ მონაწილეობდნენ აღნიშნულ პროექტში და საქმის კურსში არ არიან. კრუიზს კერძო კომპანია ახორციელებს და ტურიზმის დეპარტამენტი როგორც სხვა უწყებების წარმომადგენლები მიწვეული იყო პრეზენტაციაზე. დეპარტამენტის წარმომადგენლის სოფიო გუჯაბიძის თქმით, მათ ხელთარსებული ინფორმაციის თანახმად პრობლემები დაგვიანებამ გამოიწვია, რის გამოც პროგრამა აირია.
ამ დროისათვის გურიანიუსი საკრუინგო მოგზაურობის ქართულ მხარის, კომპანია ჯემინის წარმომადგენლებთან დაკავშირებას ცდილობს. თუმცა, ჯერჯერობით არ ხერხდება.
