დეპუტატი მერს: “თქვენ უკვე მიეჩვიეთ, რომ თავდაცვის მაგივრად თავდასხმა განახორციელოთ”

ქალაქ ოზურგეთის მუნიციპალიტეტის საკრებულოს სხდომის ბოლო ნაწილი ჯერ დეპუტატმა თამარ ნადირიძემ დატოვა და შემდეგ კი ნათია შარაშენიძემ. ორივე მათგანმა  ქალაქ ოზურგეთის მერის კრიტიკა დაიმსახურა.
“გურია ნიუსი“ გთავაზობთ საკრებულოს სხდომაზე ბეგლარ სიორიძის გამოსვლის მეორე ნაწილს.
ბეგლარ სიორიძე: აუცილებლად უნდა დაგისვათ შეკითხვა, რაც მედიის საშუალებით თქვით.
ნათია შარაშენიძე:_ გეუბნებით, დაკითხვას მიწყობთ.
ბეგლარ სიორიძე:_ კეთილი ინებეთ, დაწყნარდით და გვიპასუხეთ.
სოფო ჭანტურია, ქალაქ ოზურგეთის მერის მრჩეველი: დაკითხვა რა შუაშიa აქ? თქვენ თვითონ ვერ ერკვევით, რამდენი ბენზინი არის დახარჯული. დააკონკრეტეთ.
ნათია შარაშენიძე: _ მე ვერ ვერკვევი? თქვენ ხართ კომპენტეტური პირი ამ საკითხებში?
სოფო ჭანტურია:_ თქვენ იმაშიც ვერ ერკვევით, რომ მანქანას ოთხი საბურავი აქვს.
ნათია შარაშენიძე:_ თქვენ იცით, რამდენ ბენზინს ხარჯავს მერი და თანამდებობის პირები? ამის აღრიცხვა ყოველ დღე ხდება?
ბეგლარ სიორიძე: _ თქვენ “გურიის მოამბის“ გადაცემაში გააკეთეთ განცხადება, რომ თურმე მერიამ უკანონოდ ჩაატარა ტესტირება.
_ მე სიტყვა უკანონოდ  არ მითქვამს.
_ თქვენს ციტირებას ვახდენთ… თქვენ ნებისმიერ კონკურსანტს აყენებთ შეურაცხყოფას, რომ აპლიკანტებს გქონდათ ის კითხვები დარიგებული, რომლებზეც მათ უნდა გაეცათ პასუხი ტესტირების დროს. ჩვენ სპეციალურად მოვიწვიეთ იუსტიციის სამინისტრო, რომ მაქსიმალურად ობიექტურად ჩატარებულიყო ტესტირება. ტესტირება ჩატარდა ქალაქ ბათუმის იუსტიციის სახლში. მაინტერესებს, თქვენ, ამავე დროს, იუსტიციის სახლის ობიექტურობასაც აყენებთ ეჭვქვეშ თუ მარტო აპლიკანტებთან დაკავშირებით გაქვთ ეს კითხვები.
ნათია შარაშენიძე:_ კითხვა არის ეს?
_ მოდი, მეორე კითხვასაც დაგისვამთ, მესამესაც… თქვენ ამბობთ, რომ ეს კონკურსი ჩატარდა სრული კანონის დარღვევით და ქალაქის მერიაში დასაქმდნენ ჩემი ნათესავები და მეგობრები. იქნებ დამისახელოთ ერთადერთი ჩემი ნათესავი, ვინ მუშაობს ქალაქ ოზურგეთის მერიაში. მეთანხმებით თუ არა, ადამიანი, რომელიც ტყუილს ამბობს არის მატყუარა, მეთანხმებით?
ნათია შარაშენიძე: _ ბატონო ბეგი, რას მეუბნებით, ახლა მატყუარას მიწოდებთ?
ბეგლარ სიორიძე:_ გეკითხებით!
ნათია შარაშენიძე:_ თქვენ უკვეთ მიეჩვიეთ, რომ თავდაცვის მაგივრად თავდასხმა განახორციელოთ. _ თქვა ნათია შარაშენიძემ და მან პროტესტის ნიშნად დარბაზი დატოვა.
ბეგლარ სიორიძე: „საწვავი დახარჯული არის შემდეგნაირად, საკრებულომ დახარჯა სულ 11 207 ლარის საწვავი, მერიამ კი 12 128 ლარის საწვავი და სახანძრო სამსახურმა კი 4 431 ლარის საწვავი. რაც შეეხება ქალაქის მერს, მას აქვს ლიმიტი სულ 450 ლარის საწვავი ერთ თვეში. რაც შეეხება საბურავებს, რომელიც გადახდილია თურმე ქალაქის მერის სამსახურებრივი მანქანისთვის 1800 ლარი. ეტყობა, ქალბატონმა ნათიამ არ იცის, რომ მანქანას ოთხი საბურავი აქვს და ერთი საბურავით არ დადის. 1800 ლარი ოთხი საბურავის ღირებულებაა და არა ერთის. აქედან გამომდინარე, მე კიდევ ერთხელ დავრწმუნდი ამ ადამიანების გულწრფელობაში. ასევე, ძალიან კარგად დავრწმუნდი იმაში, რომ ასეთი ცრუ განცხადებები მიაწოდონ საზოგადოებას და შეიყვანონ შეცდომაში, რასაც კატეგორიულად არ დაუშვებს ქალაქის მერია და ქალაქის საკრებულო. დარწმუნებული ბრძანდებოდეთ, რაც აქამდე ხდებოდა, პირადად მე და ჩვენი სამსახური ხმას არ იღებდა ასეთ შეურაცხმყოფელ განცხადებებზე, დღეიდან ეს ასე არ გაგრძელდება და მიიღებს ყველა ის ადამიანი პასუხს, ვინც ცრუ ინფორმაციას გაავრცელებს!
მე ბოდიში მოვიხადე საზოგადოების წინაშე იმისთვის, რომ ერთ-ერთ ჟურნალისტს, როგორიც არ უნდა იყოს ის ჟურნალისტი, არ ვუპასუხე კორექტულად. კეთილი ინებეთ ყველამ და რასაც დააშავებთ და შეგნებულად დააშავებთ, იმაზე ბოდიში მოიხადეთ იმისთვის, რომ ჩაიდინეთ შეცდომა და არ უნდა მოქცეულიყავით ასე“, _ თქვა ბეგლარი სიორიძემ.