ბიძინა ივანიშვილის განცხადების შემდეგ, ძალიან მალე “ნაციონალურმა მოძრაობამ” “კეთილი ნებით” თანამდებობები დაატოვებინა თბილისის საკრებულოს დეპუტატებს, “თავისუფალი დემოკრატების” ორ წევრს _ ზურაბ აბაშიძესა და ვიქტორ დოლიძეს. საინტერესოა, რას ფიქრობენ ამ ფაქტის შესახებ გურული ოპოზიციონერები.
“თავისუფალი დემოკრატების” ლიდერი და გურიის რეგიონული კოორდინატორი თემურ სალუქვაძე “გურია ნიუსთან” საუბარში ამბობს, რომ აგონიურ და ამავე დროს, კომიკურ მდგომარეობაში მყოფი ხელისუფლებისგან საზოგადოება რაიმე საზრიანს აღარ უნდა ელოდოს: _ აბაშიძე და დოლიძე საკრებულოში გამოირჩეოდნენ აქტიურობით. ისინი მუშაობდნენ 24-საათიანი რეჟიმით, ხვდებოდნენ ათასობით ადამიანს და ეხმარებოდნენ მათ თავიანთი პრობლემების მოგვარებაში. ეგრეთ წოდებულმა, “ნაციონალურმა მოძრაობამ” ვერ აიტანა ირაკლი ალასანიას პარტიის _ “თავისუფალი დემოკრატების” წევრების აქტიურობა და მათზე განახორციელა პოლიტიკური ანგარიშსწორება. ვიქტორი და ზურაბი, რა თქმა უნდა, ისევ აქტიურად გააგრძელებენ თბილისის მოსახლეობასთან შეხვედრებს და ყველა ბერკეტს გამოიყენებენ, რათა დახმარება გაუწიონ დედაქალაქის მოსახლეობას. რაც შეეხება “ნაციონალურ მოძრაობას”, ის მყარად დგას პოლიტიკური მოუსავლეთის გზაზე და გზაც დაგვილოცნია, _ გვითხრა სალუქვაძემ.
რესპუბლიკური პარტიის წევრი, მარინა სუნგულია კი ამ ფაქტს შემდეგნაირად ხსნის: _ ყველას კარგად ახსოვს, ადგილობრივი თვითმმართველობის არჩევნების დასრულების შემდეგ, უგულავასა და ალასანიას შეხვედრა, როცა ალასანიამ მასთან ალიანსში მყოფი სხვა ოპოზიციური პარტიებისგან განსხვავებით, არჩევნების სამართლიანად ჩატარება აღიარა და უგულავას გამარჯვება მიულოცა. სწორედ ამ შეხვედრის შემდეგ აირჩია თბილისის საკრებულოს “ნაციონალური მოძრაობის” ფრაქციამ თანამდებობებზე დეპუტატები ალასანიას პარტიიდან.
ის ფაქტი, რომ ოპოზიციური პარტიიდან ირჩევენ თანამდებობებზე, კარგი პრეცედენტია და დემოკრატიისთვის მისაღები მოვლენაა, მაგრამ არა “ნაციონალებისთვის” _ მათ ხომ მხოლოდ პარტიული ინტერესები ამოძრავებთ?! ამიტომ, მაშინ ყველას გაუჩნდა საფუძვლიანი ეჭვი ამ ორი პარტიის ინტერესთა თანხვედრისა და გარკვეული წესების შეთანხმების შესახებ. მას შემდეგ, რაც ბიძინა ივანიშვილის პოლიტიკაში გამოჩენამ პოლიტიკურ ძალთა პოლარიზების კონტურები გამოკვეთა და მან “თავისუფალი დემოკრატები” საპარტნიოროდ მიიწვია, ალასანია, როგორც ჩანს, არჩევანის წინაშე დადგა _ გაეგრძელებინა ხელისუფლებასთან თანამშრომლობა მიღებული თამაშის წესებით და შეენარჩუნებინა თანამდებობები, თუ მიეღო ივანიშვილის წინადადება და მკვეთრად გამიჯვნოდა ნაციონალურ მოძრაობას. მან მეორე გზა აირჩია და ხელისუფლების ადეკვატურმა რეაქციამაც არ დააყოვნა _ როგორც აირჩიეს, ისე გადაირჩიეს თანამდებობებიდან აბაშიძე და დოლიძე.
საინტერესოა ის, რომ ხელისუფლების, ალასანიასა და ოპოზიციის სხვა წარმომადგენელთა კონსულტაციების შემდეგ, ალიანსის პარტიული სიის პირველი ნომერი, რესპუბლიკელი თინა ხიდაშელი “თამაშგარე” მდგომარეობაში აღმოჩნდა _ მან ვერც საკრებულოში და ვერც ფრაქციებში თანამდებობა ვერ მიიღო და აქტიური მოღვაწეობა გააგრძელა, როგორც დამოუკიდებელმა დეპუტატმა. ცხადია, რომ ხელისუფლებას არანაირად არ “აწყობდა” პრინციპულ და უკომპრომისო რესპუბლიკელისთვის დამატებითი ბერკეტების მიცემა, რაც მათ თავიანთი ნებით ჩააბარეს “ახალ მემარჯვენეებსა” და “თავისუფალ დემოკრატებს”. თამაშის ასეთი წესი ბევრ მუნიციპალიტეტში ჩამოყალიბდა, მათ შორის ოზურგეთშიც. გახსოვთ, ალბათ, “ნაციონალური მოძრაობის” რაიონული ლიდერი, კოტე ბერიძე როგორი სიმპათიით მიესალმა “თავისუფალი დემოკრატებისა ” და მისი ლიდერის, თემურ სალუქვაძის გამოჩენას პოლიტიკაში. სამაგიეროდ, თავისი ღვარძლი ვერ დამალა რესპუბლიკელი ტიფო მიქატაძის მიმართ. თუ რატომ იყო ნაციონალ-ბოლშევიკური ხელისუფლებისთვის მისაღები და სასიხარულო თემურ სალუქვაძისა და მისი გუნდის პოლიტიკური გაცოცხლება, ამაზე მხოლოდ ერთმნიშვნელოვანი პასუხი შეიძლება არსებობდეს. ეს დამოკიდებულებები დადასტურდა კიდეც ოზურგეთში ადგილობრივი არჩევნების პირველივე დღიდან, ჩვენი, ორი პარტიის _ რესპუბლიკელებისა და “თავისუფალი დემოკრატების” ერთ პოლიტიკურ ალიანსში ყოფნის დროს და გრძელდება დღემდე _ მათ თავი დაგვამახსოვრეს, როგორც არასანდო პარტნიორებმა. ხელისუფლება კი, ვფიქრობ, რომ მათ მიმართ ინარჩუნებს ძველებურ კმაყოფილებას, _ ამბობს მარინა სუნგულია.
