დღეს, ქალაქ ოზურგეთის საკრებულოს სხდომა გაიმართა, რომელიც საკრებულოს თავმჯდომარეს გელა კობალაძეს მიჰყავდა.
დეპუტატებმა საკრებულოს სხდომაზე დღის წესრიგით გათვალისწინებული 7 საკითხი განიხილეს და დაამტკიცეს.
პირველი საკითხი ქალაქ ოზურგეთის მუნიციპალიტეტის 2014 წლის დამტკიცებულ ბიუჯეტში ცვლილებებისა და დამატებების შეტანის შესახებ შეეხებოდა. აღნიშნულ საკითხთან დაკავშირებით ისაუბრა მერიის საფინანსო – საბიუჯეტო სამსახურის უფროსმა მარიკა ნაცვალაძემ.
"ქალაქ ოზურგეთის მუნიციპალიტეტის წლის ბიუჯეტი 2014 წლის 18 აგვისტოს #3 დადგენილების შესაბამისად დამტკიცდა 8 მილიონ 206, 8 ათასი ლარის ოდენობით. განხორციელებული ცვლილებების შემდეგ ბიუჯეტის მოცულობამ 11 თვის მონაცემებთ 8 მილიონ 399, 2 ათასი ლარი შეადგინა.
საქართველოს მთავრობის 2014 წლის 30 დეკემბრის # 2551 განკარგულებით სტიქიის შედეგების სალიკვიდაციო ღონისძიებების განხორციელებისთვის ქალაქ ოზურგეთის მუნიციპალიტეტის 1 მილიონ 340, 0 ათასი გამოეყო, პირველი ეტაპის სამშენებლო სამუშაოების განსახორციელებლად 1 278, 0 ლარი, ხოლო საპროექტო დოკუმენტაციის მომზადების მიზნით – 62 ათასი ლარი.
ქალაქ ოზურგეთის მუნიციპალიტეტის 2015 წლის 1 იანვრის მდგომარეობით საბიუჯეტო სახსრების ნაშთმა შეადგინა 1 მილიონ 985, 8 ათასი ლარი. შესაბამისად 2015 წლის საბიუჯეტო ვალდებულება შემდეგნაირად გადანაწილდა:
საქართველოს მთავრობის 2014 წლის 13 იანვარს #34 განკარგულების შესაბამისად საქართველოს რეგიონებში განსახორციელებელი პროექტების ფონდიდან ადგილობრივი თვითმმართველი ერთეულებისათვის თანხის გამოყოფის შესახებ – ნარჩენი თანხა – 108 ათასი 400 ლარი.
2014 წლის 30 დეკემბრის # 2551 განკარგულებით სტიქიის შედეგების სალიკვიდაციო ღონისძიებების განხორციელებისთვის – 1მილიონ 349 ათასი ლარი.
ქალაქ ოზურგეთის მუნიციპალიტეტის საკუთარი შემოსავლების ნაშთი – 537 ათას 400 ლარი, სადაც 281 ათას 0 ლარი მიმართულია ინფრასტრუქტურული სამუშაოების განხორციელებისათვის, ხოლო 220 ათასი ლარი მიიმართება არაფინანსური აქტივების ზრდის მუხლში – სატრანსპორტო საშუალებების შესაძენად", – აღნიშნა საკრებულოს სხდომაზე მარიკა ნაცვალაძემ.
საკრებულოს სხდომაზე ასევე განიხილეს ქალაქ ოზურგეთის მერისა და საკრებულოს თავმჯდომარის თანამდებობრივი სარგოების 2750 ლარით განსაზღვრის შესახებ, ასევე საკრებულოს თანამდებობის პირთა და აპარატის მოხელეთა თანამდებობრივი სარგოს ოდენობა და მერიის თანამდებობის პირთა და მერიის მოხელეთა თანამდებობრივი სარგოების ოდენობის განსაზღვრის შესახებ დადგენილების მიღების თაობაზე.
აღნიშნულ საკითხს მხარი არ დაუჭირა და საკრებულოს სხდომა პროტესტის ნიშნად დატოვა დეპუტატმა ნათია შარაშენიძემ.
