"ჩვენი მთავრობა მზად არის, შემოგთავაზოთ მაქსიმალურად კომფორტული პირობები საქართველოში თქვენი ბიზნესის საწარმოებლად", – ამ სიტყვებით მიმართა საქართველოს პრემიერ-მინისტრმა ირაკლი ღარიბაშვილმა საქართველო-ესტონეთის ბიზნესფორუმის მონაწილეებს.
საქართველოს მთავრობის მეთაურმა ბიზნესფორუმი ესტონელ კოლეგა ტაავი რიივასთან ერთად გახსნა. ორ ქვეყანას შორის სავაჭრო და ეკონომიკური თანამშრომლობის პოტენციალის სრულად ათვისება და საქართველოში არსებული სტაბილური საინვესტიციო გარემო ფორუმის ძირითადი თემები იყო.
_ საქართველოში არსებობს თავისუფალი, სამართლიანი და გამჭვირვალე ბიზნესგარემო; · 2015 წელს საქართველოში ეკონომიკური ზრდა 5 პროცენტს მიაღწევს; Heritage Foundation-ის ბოლო მონაცემებით, საქართველო 22-ე ადგილზეა მსოფლიოში თავისუფალი ეკონომიკის მქონე ქვეყნების სიაში;
2014 წელს „Fitch" და „Moody's" მიხედვით საქართველოს პოზიციები სტაბილურიდან პოზიტიურამდე გაუმჯობესდა, ხოლო „გლობალური კონკურენტუნარიანობის ინდექსში" ქვეყანა 19 საფეხურით დაწინაურდა; კორუფციის რისკების მიხედვით, საქართველო მე-11 ადგილზეა და უსწრებს ბევრ განვითარებულ ქვეყანას; მთავრობის ეკონომიკური პოლიტიკის შედეგად, 2012-2014 წლებში საქართველოდან ექსპორტი გაიზარდა 24 პროცენტით; ექსპორტი ევროკავშირთან გაიზარდა 70 პროცენტით; ღრმა და ყოვლისმომცველი თავისუფალი სავაჭრო სივრცის შესახებ შეთანხმების ამოქმედებით საქართველო ინვესტორებს შესთავაზებს სათანადო ბიზნესგარემოს, შესანიშნავ ადგილმდებარეობას და წვდომას 900-მილიონიან ბაზარზე; თურქეთთან და აზერბაიჯანთან ერთად ხორციელდება უმნიშვნელოვანესი ენერგო- და სატრანსპორტო პროექტები – ბაქო-თბილისი-ყარსის სარკინიგზო მაგისტრალი და სამხრეთის ბუნებრივი აირის დერეფანი – „შაჰდენიზის გაზსადენი"; შავ ზღვაზე აშენდება ღრმაწყლოვანი პორტი, რომლის გამტარუნარიანობა წელიწადში 100 მილიონი ტონა იქნება; საქართველოში დაარსდება ყოველწლიური, მაღალი დონის კონფერენცია, სახელწოდებით -„თბილისის აბრეშუმის გზის ფორუმი"; ქვეყანაში არსებობს საპარტნიორო ფონდი, ასევე თანაინვესტირების კერძო ფონდი, რომლის ბიუჯეტი 6 მილიარდია, _ აღინიშნა ფორუმზე.
პრემიერმა ის უპირატესობები შეაჯამა, რომლებსაც საქართველო ინვესტორებს ბიზნესის წარმოებისა და განვითარების კუთხით სთავაზობს.
"ეს არის სტაბილური მაკროეკონომიკური გარემო მყარი სუვერენული ბალანსითა და ძლიერი, კონსერვატიული საბანკო სექტორით; ლიბერალური საგადასახადო სისტემა დაბალი გადასახადების ექვსი ფიქსირებული ტიპით; 4განვითარებული და მუდმივად მზარდი სატრანსპორტო ინფრასტრუქტურა ვაჭრობის, ლოგისტიკისა და წარმოებისათვის, რაც მოიცავს მულტიმოდალურ სახმელეთო, საზღვაო და საჰაერო კომუნიკაციებს; სტაბილურად და კონკურენტული ტარიფებით მოწოდებული ენერგორესურსები; კვალიფიციური და კონკურენტულად განფასებული სამუშაო ძალა", – განაცხადა ირაკლი ღარიბაშვილმა.
ორი ქვეყნის სავაჭრო-ეკონომიკური ურთიერთობების და ბიზნესკონტაქტების გაუმჯობესების შესახებ ისაუბრა ესტონეთის მთავრობის მეთაურმა.
აავი რიივასმა აღნიშნა, რომ არსებობს გამოუყენებელი შესაძლებლობები და ბიზნესფორუმის ჩატარება არის ნაბიჯი სწორი მიმართულებით.
"საქართველოს და ესტონეთს ბევრი საერთო აქვთ და უპირველეს ყოვლისა, ეს არის ეკონომიკური წარმატების მიღწევის სურვილი. მნიშვნელოვანია, შევქმნათ მჭიდროდ დაკავშირებული ბიზნესქსელები და ვეძებოთ ახალი საექსპორტო ბაზრები. განვითარებული ეკონომიკური და ბიზნესურთიერთობები ბაზრების დივერსიფიცირების საშუალებას გვაძლევს", – აღნიშნა ტაავი რიივასმა.
ბიზნესფორუმის ფარგლებში საქართველოსა და ესტონეთის პრემიერ-მინისტრებმა ხელი მოაწერეს შეთანხმებას "მგზავრებისა და ტვირთების საერთაშორისო საავტომობილო ტრანსპორტირების შესახებ".
