“ნატვრის ხის” დაბრუნება

12 იანვარს, კინოთეატრ “ამირანში” თენგიზ აბულაძის რესტავრირებული ფილმის “ნატვრის ხის” ჩვენება გაიმართა. ღონისძიებას საქართველოს პრემიერ-მინისტრი ირაკლი ღარიბაშვილი, ესტონეთის პრემიერ-მინისტრი ტაავი რიივასი, საქართველოს კულტურისა და ძეგლთა დაცვის მინისტრი მიხეილ გიორგაძე და საქართველოს ეროვნული კინოცენტრის ხელმძღვანელი ნანა ჯანელიძე დაესწრნენ.

კლასიკადქცეული “ნატვრის ხის” აღდგენა და ციფრულ მატარებელზე გადატანა, თენგიზ აბულაძის 90 წლის იუბილესთან დაკავშირებით, თენგიზ აბულაძის მემორიალური მუზეუმის ინიციატივითა და ეროვნული კინოცენტრის ფინანსური მხარდაჭერით განხორციელდა. ფილმს რესტავრაცია, ფერებისა და ხმის კორექცია ესტონეთში ჩაუტარდა. ფასისა და ხარისხის გათვალისწინებით, შეირჩა ყველაზე ოპტიმალური კომპანია Digital Center, რომელიც დაფუძნებულია ესტონეთის კინოცენტრის, კინოარქივისა და კინოს უნივერსიტეტის მიერ. ის არის ევროპის მასშტაბით უახლესი ტექნოლოგიების ბაზის მქონე ერთ-ერთი წამყვანი კომპანია.

კინომემკვიდრეობის დაცვა ეროვნული კინოცენტრის ერთ-ერთი პრიორიტეტია. მისი მხარდაჭერით ქართველი კლასიკოსების ფილმების აღდგენა ეტაპობრივად წლების მანძილზე ხორციელდება. 2014 წელს ასევე რესტავრაცია ჩაუტარდა ელდარ შენგელაიას ფილმს „ცისფერი მთები“. ფილმი წარდგენილი იყო კანის კინოფესტივალზე სექციაში Cannes Classic.

ბოლო წლების განმავლობაში კინოცენტრის მხარდაჭერით აღდგენილია 7 ქართული ფილმი.