რამაზ ნიკოლაიშვილის განცხადებით, ბახმაროში მომავალ სეზონზე ასულ დამსვენებელს განახლებული ინფრასტრუქტურა დახვდება:
_ ბახმარო ჩვენთვის ძალიან მნიშვნელოვანია. დღეს რამდენიმე სერიოზული სპეციალისტი გვყავდა იქ აყვანილი. ესენი არიან არქიტექტორები, რომლებიც ამ ზონის განვითარებაზე იზრუნებენ, მომდევნო თვეების განმავლობაში გარკვეული პროექტებიც გვექნება და ასევე სპეციალისტების ჯგუფი, რომლებმაც ძველი პროექტი ახალს შეადარეს. ჩვენ სპეციალური დანადგარებისთვის ფული გადავრიცხეთ და მშენებლებიც ავიყვანეთ ბახმაროში. ვნახეთ რამდენიმე ადგილი, სადაც ეს დანადგარი უნდა დამონტაჟდეს, რომლის საშუალებით ბახმაროს თვისებებზე, თოვლის ხარისხზე, ქარის სიჩქარეზე დეტალური ინფორმაციის მიღება იქნება შესაძლებელი. ეს ის ჯგუფია, რომელიც მუშაობდა, როგორც ბაკურიანზე, ასევე სვანეთზე. გამოცდილები არიან და შესაბამისად, მიმაჩნია კარგ პროექტს მივიღებთ, რომელიც საბოლოო ჯამში მოგვცემს საშუალებას, ბახმარო არ იყოს მარტო სეზონური კურორტი და მან ოთხივე სეზონზე მთელი დატვირთვით იმუშაოს. უკვე გვაქვს იმის წინაპირობა, რომ სათხილამურო გზის სიგრძე ორი კილომეტრი იქნება. ეს სათხილამურო გზა ზუსტად იქ ჩამოდის, სადაც კომპლექსის აშენებას ვფიქრობთ. პირველ ეტაპზე გვინდა, რომ გავაკეთოთ სასტუმრო რამდენიმე ათეულ ნომერზე, რომლის მშენებლობასაც, სავარაუდოდ, მომავალი წლის აგვისტოში დავამთავრებთ. ასევე გაკეთდება მაღაზია, ტუალეტები, ღია ამფითეატრი, კინოთეატრი, აფთიაქი _ ერთი სიტყვით ყველაფერი ის, რაც პირველ ეტაპზე აუცილებელია და რომელიც ადამიანებს მეტი კომფორტის მიღების საშუალებას მისცემს. რაც შეეხება სხვა ინფრასტრუქტურას, გეტყვით რომ საგზაო დეპარტამენტმა გარკვეული თანხები გზის მოწესრიგებისთვის უკვე ჩადო ბიუჯეტში. წყლის კომპანიამ მიიღო დავალება და სწავლობს ადგილებს, თუ სად შეიძლება დამატებითი წყლის მიღება ჭაბურღილების მეშვეობით. პირადად ვესაუბრე ენერგეტიკის მინისტრს და მივიღე წინაპირობა იმისა, რომ ელექტროენერგიის მიწოდება ბახმაროში პრობლემა არ იქნება. იწყება ის, რაც ყველაზე მნიშვნელოვანია ყველა გურულისთვის და ზოგადად იმ ადამიანისთვის, რომელიც ერთხელ მაინც ყოფილა ბახმაროში. ეს არის პირადად პრეზიდენტის დავალება. მას კონტროლზე ჰყავს ეს საკითხი აყვანილი და ჩვენ პირადად მოვახსენებთ, თუ რას ვაკეთებთ გურიაში ამ მიმართულებით. ყველას ეგონა ეს არ გაკეთდებოდა, მაგრამ ჩვენთვის ბახმარო ძალიან მნიშვნელოვანია და პირველი ნაბიჯები გადადგმულია. ამას მოყვება სხვა ბევრი რამ _ იქნება სპორტული მოედნები, გასართობი დაწესებულებები. ერთი სიტყვით, ყველაფერს გავაკეთებთ იმისთვის, რომ ადამიანებმა თავი, რაც შეიძლება კომფორტულად იგრძნონ. რაც შეეხება ტრასას, რომელზეც ზემოთ ვისაუბრე, შემდგომი პერსპექტივაა და ამ სეგმენტსაც განვავითარებთ. სწორედ ამიტომ ვატარებთ ძვირადღირებულ კვლევებს. არ გვინდა ამ სეზონის დაკარგვა. ბახმაროში სამშენებლო სეზონი პატარაა და დასაკარგი დრო არ გვაქვს. სამშენებელო კომპანია უკვე აყვანილია, ტოპოგადაღება უკვე დასრულებულია და პირველადი დოკუმენტაცია, რომელიც კვლევების შეჯერების საშუალებას მოგვცემს, მზადაა, _ აღნიშნა ნიკოლაიშვილმა და დაინტერესდა, ამ საკითხთან დაკავშირებით რა შეკითხვები ჰქონდათ ჟურნალისტებს. როგორც აღმოჩნდა ყველაზე ცნობისმოყვარეები ჩვენ აღმოვჩნდით და მინისტრმაც ჩვენს შეკითხვებს გულუხვად უპასუხა.
_ ბატონო რამაზ, ჩვენ გვაქვს რამდენიმე შეკითხვა…
_ კი ბატონო, ოღონდ არ მკითხოთ, ქალბატონო ნატო, ამერიკის შეერთებული შტატების ადმინისტრაციამ ეს გადაწყვეტილება რატომ მიიღო (როგორც ჩანს ნიკოლაიშვილს ჯონ ბასთან ჩვენ მიერ ჩაწერილი ინტერვიუ კარგად ჰქონდა წაკითხული და ამ საკითხზეც ყურადღება ამიტომ გაამახვილა. ავტ.) ისიც არ მკითხოთ, რეგიონებზე რას ვფიქრობ, იმიტომ, რომ მე უკვე აღვნიშნე, რეგიონებზე რასაც ვფიქრობ (ეს კომენტარი ივანიშვილის ბრიფინგზე ჩვენს მიერ დასმულ შეკითხვას მოჰყვა. ავტ.)…
_ კარგია, რომ ჩვენს სტატიებს გულდასმით ეცნობით…
_ დიახ, ვკითხულობ, ძალიან ბევრ ვკითხულობ, იმიტომ, რომ გურია ჩემთვის არის კუთხე, რომელიც ძალიან მიყვარს და მგონი, რომ ეს დავამტკიცე. ყველაფერს ვაკეთებ, რომ ყველაფერი უფრო კარგად იყოს და უფრო მეტიც _ მთელ თავისუფალ დროს გურიას დავუთმობ, რომელიც ჩემი სამშობლოა. მიხარია, რომ ჩემი სურვილები და მთავრობის დავალება გურიასთან მიმართებაში დადებითად გადაწყდა. რაც შეეხება იმას, რომ ყველაფერი კარგად ვიცი _ “ვიცი” რას ნიშნავს? მე ვარ რეგიონალური განვითარებისა და ინფრასტრუქტურის მინისტრი და თქვენს მიერ დასმული კითხვის არსიც იმაში იყო, თუ როგორ მდგომარეობაშია რეგიონები. რეგიონები მეც მადარდებს და იმიტომაც ვარ რეგიონში დღეს.
_ ბახმაროსთან დაკავშირებით, ბევრი შეკითხვა და პრობლემა არსებობს. ამ ეტაპზე, როგორც საჯარო რეესტრს, ასევე ლეგალიზაციის კომისიას, შეჩერებული აქვს კურორტზე უძრავი ქონების დარეგისტრირება მიუხედავად იმისა, რომ არსებობს შესაბამისი დოკუმენტაცია და პრეზიდენტის 525-ე ბრძანებულება, რომლის თანახმადაც მიწები უნდა დაკანონდეს. თუმცა, ეს ბრძანებულება კარგა ხანია, გაურკვეველი მიზეზების გამო არ სრულდება…
_ ქალბატონო ნატო, არ იდარდოთ თქვენ მაგ საკითხთან დაკავშირებით. მინდა გითხრათ ერთი რამ _ ჩოხატაურის მოქალაქე ხართ და მე თქვენ ადრეც მოგიწოდებდით, რომ უფრო სახელმწიფოებრივად გეზრუნათ და ონკანები არ გაგეხსნათ, რომელშიც წყალი მოდის(?!). მინდა პირადად, კარგად განგიმარტოთ თქვენ, რომ გურიისთვის მთავარია განვითარდეს კურორტი. შესაძლებელია, ნებისმიერ საკითხზე აიღოთ სხვადასხვა აქცენტები. ჩვენი აქცენტი არის იმაზე, რომ გვქონდეს განვითარების სტრატეგია, იყოს ბიუჯეტში ჩადებული თანხები და დაიწყოს განვითარება, აღმშენებლობა, შეიქმნას სამუშაო ადგილები, რომელიც ძალიან მნიშვნელოვანია და ჩვენ ყველა კომპანიას ამას ვთხოვთ. თუ ტექნიკურად შეუძლებელია ადამიანი მოიძებნოს გურიაში, რომელსაც კონკრეტული საქმის გაკეთება არ შეუძლია, მაგას ვერაფერს ვუზამთ, მაგრამ რაც მოიძებნება, ყველა ადგილობრივი დასაქმდება, დავიწყებთ კურორტის განვითარებას. ის, რაზეც თქვენ საუბრობთ, თავისთავად მნიშვნელოვანია, რადგან ბევრ ადამიანს ეხება. დამერწმუნეთ, როცა მშენებლობა დაიწყება, ბუნებრივია, ბევრს გაუჩნდება სურვილი ბახმაროში ჰქონდეს ქონება _ ზოგს გაახსენებდა, რომ ბაბუამისმა დაუტოვა. ეს ბუნებრივია. ჩვენც ეს გვინდა, რომ ბახმაროში ბევრი ადამიანი ავიდეს, თავისი თანხები დახარჯოს. ბევრ მდიდარ გურულს რაღაც შენობები აქვს და დარწმუნებული ვარ, რომ განავითარებენ. თუმცა, კიდევ მინდა გითხრათ, რომ ის მიწა, რომელზეც შენობა უდგათ, დაუკანონდებათ. ეს არ ნიშნავს იმას, რომ ნახევარი ბახმარო გადაეცემა ვიღაცას. ეს ტექნიკური საკითხია, რომლის შესახებაც მე სწორი პასუხი არ მაქვს, მაგრამ დარწმუნებული ვარ, ის სამსახურები, რომლებსაც ეხებათ კონკრეტული გადაწყვეტილების მიღება, თემას სწორად და კანონიერად მიუდგებიან. ჩვენ ვიწყებთ არაფრიდან, კურორტიდან, რომელზეც არც ერთ მთავრობას თითიც არ დაუდია და ვფიქრობთ, რომ მივიღებთ შედეგს _ აი, ეს არის მნიშვნელოვანი. ამის პასუხისმგებელი გურული ხალხის წინაშე პირადად მე ვარ იმიტომ, რომ მაქვს პრეზიდენტის მხარდაჭერა. ამ კურორტის განვითარების ინიციატორი ნამდვილად პრეზიდენტი იყო და პლაგიატი არ ვარ, რომ მე დავიბრალო. ყველაფერს გავაკეთებ მოკლე დროში და ხარისხიანად, რომ გურულებმა მიიღონ კურორტი. აუცილებელია, ისეთი ადამიანებიც ჩამოვიდნენ, რომლებსაც იქ სახლი არ აქვთ. მე, მაგალითად, ზოგიერთებისგან განსხვავებით, ამ ზოგიერთებში ჩინოვნიკებიც არიან, იქ არ მაქვს ერთი კვადრატული სანტიმეტრი მიწაც, მაგრამ იმედს ვიტოვებ, რომ მექნება საშუალება მივიდე, ავიღო ნომერი და დავისვენო ბახმაროში ჩემს ოჯახთან ერთად. თქვენ უნდა იყოთ მოწადინებული და გთხოვთ, რომ იყოთ ჩართული იმ პროცესებში, რომლის გახორციელება დაიწყება ბახმაროში. ეს ყველაფერი გამჭვირვალე იქნება. ერთმანეთს ხელი შევუწყოთ და არ შევუშალოთ ამბიციით _ მე თქვენ არ გგულისხმობთ, ზოგადად ვამბობ _ რომელიც ვიღაცის ინტერესს ეხება. რა ვიცი, ხან იძახოდით აკანონებენო, ხან იძახდით რატომ არ აკანონებენო. ხან ვიღაცამ მიითვისაო. ხომ არავინ არის ისეთი, ვისაც არ უნდა ეკუთვნოდეს იქ ქონება? თუ თქვენ ეს ინფორმაცია გაქვთ, შეგიძლიათ მიმართოთ სამართალდამცავებს. მით უმეტეს, თქვენი გაზეთი კითხვადია და დარწმუნებული ვარ, ყველაფერი სწორად და კარგად იქნება ასახული. ამიტომ გთხოვთ, რომ აქცენტები აიღოთ განვითარებაზე, გეგმაზე და დამატებითი ინფორმაცია მიიღოთ. კარგად მინდა, გურულებს ესმოდეთ, რომ საქართველოს მთავრობას არ ენანება არაფერი გურიისთვის და უნდა, მისი ყველაზე ღირსეული კურორტი ღირსეულად განავითაროს. ამ კურორტს ერთ-ერთი ყველაზე საუკეთესო არქიტექტორები აკეთებენ; მათ სერიოზული გამოცდილება აქვთ ასეთ საკითხებზე მუშაობისა; სერიოზული ჯგუფი შეიქმნა და ამ ჯგუფში გუბერნატორიც არის ჩართული. ქალბატონ ლელას (ჩოხატაურის მუნიციპალიტეტის გამგებელი, ლელა იმედაშვილი. ავტ) ვთხოვეთ და დავავალეთ, რომ აქტიურად ჩაერთოს. მიგვაჩნია, რომ დადგა დრო, საქართველოს კურორტებს მიეხედოს.
_ ჩვენ ძალიან ბევრი კვლევა გვინახავს, რომლებიც ადასტურებენ, რომ ბახმარო ჯანმრთელობისთვის ძალიან მნიშვნელოვანი კურორტია. არსებობს ბევრი სამედიცინო ისტორია, რომელიც მოწმობს, რომ სწორედ ბახმაროში განიკურნენ ადამიანები სხვადასხვა დაავადებისგან. ამ კუთხით თუ მიმდინარეობს მუშაობა და თუ კეთდება შესაბამისი კვლევები?
_ აბსოლუტურად ყველა ძველი კვლევა მოვიძიეთ, სანამ ამ საქმეს შევუდგებოდით. იქ არის არამარტო ქარის სიჩქარეზე და თოვლის ხარისხზე საუბარი, არამედ ბახმაროს კლიმატის დადებით თვისებებზე ადამიანის ჯანმრთელობისთვის. თუმცა, ეს ყველაფერი მოხდა წინა წლებში. ამიტომ, თავისთავად, ბუნებრივიცაა, რომ კურორტის განვითარებას მოყვება სამკურნალო თვისებების ფუნდამენტალური შესწავლა. კიდევ ერთხელ ვიმეორებ, რომ შეიქმნა სამთავრობო ჯგუფი, რომლებიც იზრუნებს, მაქსიმუმი წამოიღონ ამ კურორტიდან და გამოიყენონ ადამიანების სასიკეთოდ.
ნიკოლაიშვილის თქმით, ბახმაროს პარალელურად, გურიის კიდევ ერთი მნიშვნელოვან კურორტის, ურეკის ინფრასტრუქტურის მოწესრიგებაც დაიწყება:
_ ურეკი შავი ზღვის სანაპიროზე ძალიან მნიშვნელოვანი კურორტია. ჩვენ მივიღეთ კურორტების დაგეგმარების და მაქსიმალური ეფექტის მიღების გარკვეული გამოცდილება. ამის ნათელი მაგალითია ანაკლია, რომელიც მიმაჩნია, რომ უნიკალური კურორტია შავი ზღვის სანაპიროზე. ბათუმში გავახორციელეთ მნიშვნელოვანი პროექტები. ამიტომ ჩვენ გვინდა, რომ ამავე ტიპის კონცეფცია შევიმუშაოთ ურეკში, სად ის ადამიანები იმუშავებენ, რომლებმაც ანაკლიაზე იმუშავეს. მინდა ვთხოვო გუბერნატორს, რომ ყველა ინფორმაცია, რომელიც ამ საკითხებთან დაკავშირებით იქნება, თქვენც მოგაწოდოს. აზიის განვითარების ბანკის დახმარებით ურეკში ჩვენ მთლიანად შევცვლით წყლის და კანალიზაციის სისტემას, რომელიც დიდი ხანია აწუხებს ურეკელებს. გზები გავაკეთეთ, შიდა გზებსაც მივხედავთ, დავიწყებთ ბულვარის მშენებლობას და საბოლოო ჯამში ეს უნდა მივაბათ ერთიან ზოლს. ურეკში ზამთარშიც ვიმუშავებთ, რადგან ტემპერატურის ზღვარი გვაძლევს ამის საშუალებას. მიმაჩნია, რომ ეს ორი პროექტი გურიისთვის ძალიან მნიშვნელოვანია. ამასთანავე, ბევრი ადგილობრივი დასაქმდება. როცა ვიყავი გურიის გუბერნატორი, ამაზე ვერც კი ვიოცნებებდი, რადგან მაშინ ქვეყანას ამის შესაძლებლობა არ ჰქონდა. ახლა მეტ-ნაკლებად გამოჩნდა და ყველა გურული ნახავს, რომ ყველაფერს გულწრფელად ვაკეთებთ, იმიტომ, რომ ეს ქვეყანას სჭირდება, _ აღნიშნა ნიკოლაიშვილმა.
