ოზურგეთის მუნიციპალიტეტის გამგებელი: ჩვენი მთავარი ამოცანაა, ხალხის გვერდით ვიდგეთ

დაბა ურეკის კულტურის ცენტრში, ოზურგეთის მუნიციპალიტეტის გამგებელი, მერაბ ჭანუყვაძე ადგილობრივი ხელისუფლების წარმომადგენლებთან ანგარიშით წარსდგა.
შეხვედრა გურიის გუბერნატორის მოვალეობის შემსრულებელმა, ქეთი მოისწრაფეშვილმა გახსნა.

"დღეს არაოფიციალურად ხდება ჩვენი საქმიანობის ანგარიშის წარდგენა. უბრალოდ გადავწყვიტეთ, რომ 14 იანვარს კალანდას შევკრებილიყავით ერთად. ანგარიშიც საკრებულოს წინაშე აუცილებლად წარვდგები და უფრო დეტალურად ვისაუბრებ იმ პროექტებზე, რომლის განხორციელება მოხდა 2014 წლის აგვისტოდან დღემდე და რა იგეგმება 2015 წელს. ის პროექტები, რომელიც დაწყებულიყო იყო მინდა ვთქვა, რომ დასრულებულია და ახალი პროექტების დაწყების დრო მოვიდა.

ჩვენი შეხვედრა ურეკში დაიგეგმა და ეს არის სიმბოლური. მინდა ჩემი ანგარიში ურეკის განვითარების შესახებ დავიწყო. ურეკი იქნება ერთ-ერთი წარმატებული კურორტი, რომელიც უამრავი დამსვენებელი ჩამოვა. წლების განმავლობაში აქ არ ყოფილა დიდი ყურადღება, როგორც ამ ბოლო პერიოდში არის. 2014 წელს დაახლოებით 120 000 ტურისტი იყო ჩამოსული ურეკში. 60 000 000 ლარი იხარჯება აზია ბანკის და მუნიციპალური განვითარების ფონდის მიერ, სამწლიანი პროექტის განხორციელება დაწყებულია – კანალიზაციის სისტემა, წყალი, გაზი, შემოვლითი გზა, დასუფთავება და მოუწესრიგებელი სანაპირო ზოლი, ეს ის პრობლემებია, რომელიც 2015 წლის გაზაფხულზე მოწესრიგებული იქნება", _ აღნიშნა ჭანუყვაძემ.

მისივე თქმით,  სტიქიის მოვლენების სალიკვიდაციო სამუშაოების ჩასატარებლად მთავრობამ 6 000 000 ლარი გამოყო.

"ჩვენ მზად ვიქნებით და ვართ, ყველა იმ ადამიანს, რომელსაც აქვს განცდა იმისა, რომ თითქოს ჩვენ მათ ყურადღებას არ ვაქცევთ ან კიდევ პირიქით, არასდროს მუნიციპალიტეტში თითოეული ჩვენთაგანის ყოფნის პერიოდში ვერცერთი ადამიანი ვერ შეძლებს იმას, რომ რომელიმე მათგანი დარჩეს უყურადღებოდ. ეს არის ჩვენი მთავარი ამოცანა, რომ ვიდგეთ ხალხის გვერდით, ვიყოთ და ვასრულებდეთ იმ მოვალეობას, რომელიც გვაქვს დაკისრებული. როგორც საჯარო მოხელეებს, ამ შემთხვევაში, თითოეული ჩვენგანის განცდა და ყოველდღიურობა იქნება ხალხზე დამოკიდებული.

ოზურგეთის მუნიციპალიტეტის გამგეობა ხელისუფლებაში მოსვლის დღიდან მუნიციპალიტეტის განვითარებისთვის სხვადასხვა მიმართულებით აქტიურად მუშაობს. მუნიციპალიტეტის სტრატეგია ადგილობრივი ინფრასტრუქტურის მოწყობას, მოსახლეობის სოციალური პირობების გაუმჯობესებას, საზოგადოებრივი უსაფრთხოების უზრუნველყოფას, ჯანსაღი ცხოვრების წესის დანერგვას და სკოლამდელი განათლების ხელშეწყობას მოიცავს.

მუნიციპალიტეტის ეკონომიკური განვითარებისთვის აუცილებელ პირობას ინფრასტუქტურული პროექტების განხორციელება წარმოადგენს, შემუშავდა სტრატეგიული განვითარების სამწლიანი გეგმა, რომელშიც აქცენტი სწორედ ინფრასტრუქტურული პროექტებზე კეთდება.

ექვსი სამუშაო თვის განმავლობაში გამგეობის შესაბამისი სამსახურების მიერ სხვადასხვა პროექტის ფარგლებში შესრულებულ იქნა, გეგმით გათვალისწინებული რამდენიმე მნიშვნელოვანი ინფრასტუქტურული პროექტი.

სოფლის მხარდამჭერი პროგრამით 28 თემში, 1 347 000 ლარის ღირებულების სამუშაოები განხორციელდა. სულ რეგიონალური ფონდიდან დაფინანსებულ ინფრასტურქტურულ პროექტებზე 4 მილიონ 100 ათასი ლარი დაიხარჯა", – განაცხადა მერაბ ჭანუყვაძემ.

ასევე, ურეკში გაიმართა საანგარიშო ვიდეორგოლის საპრეზენტაციო ჩვენება, რომელიც მუნიციპალიტეტის მიერ 2014 წლის 2 აგვისტოდან დღემდე სხვადასხვა მიმართულებით განხორციელებულ და მიმდინარე პროექტებს ასახავს. შეხვედრაზე ასევე სიტყვით გამოვიდნენ ოზურგეთის მაჟორიტარი დეპუტატი ზვიად კვაჭანტირაძე და  ოზურგეთის მუნიციპალიტეტის საკრებულოს თავმჯდომარე დავით დარჩია.