არასამთავრობო ორგანიზაცია "ახალგაზრდა ადვოკატები" პრეზიდენტის ადმინისტრაციის პრესსამსახურის საპასუხოდ, თითქოს ორგანიზაციის მიმართვა არ მიუღიათ პრეზიდენტთან შეხვედრაზე დასასწრებად, "გურია ნიუსს" მიმართვის ტექსტს უგზავნის.
მიმართვაში დასტურდება, რომ "ახალგაზრდა ადვოკატების" ხელმძღვანელი, არჩილ კაიკაციშვილი, პრეზიდენტის ადმინისტრაციის უფროსის, დავით პატარაიას საქართველოს უზენაესი სასამართლოს თავმჯდომარის კანდიდატურის არჩევის პროცესში ჩართვას სთხოვს.
როგორც ცნობილი გახდა, პრეზიდენტ გიორგი მარგველაშვილთან შეხვედრაზე 15 იანვარს, მხოლოდ კოალიცია "დამოუკიდებელი გამჭვირვალე მართლმსაჯულებისთვის" წარმომადგენლები დაუშვეს. ეს ფაქტი კი "ახალგაზრდა ადვოკატებმა" გააპროტესტეს.
"პრეზიდენტისთვის სასურველი უნდა გამხდარიყო შეხვედრაზე იმ ორგანიზაციების მიწვევა, რომელსაც სასამართლო სისტემაში საქმიანობის და მართლმსაჯულების საკითხებზე მუშაობის გამოცდილება გააჩნია.
სააშკარაოზე გამოაქვთ სასამართლოს პრობლემები. ამიტომაც, "პრეზიდენტის კარზე", ორგანიზაციების შერჩევა დაუშვებელია მხოლოდ იმის მიხედვით, თუ ვინ არის ასეთი ცალკეული ორგანიზაციების დონორები, პარტნიორები და ხელმძღვანელები. ჩვენ ასეთი მიდგომები გვაშორებს თავისუფალ აზროვნებასთან და გვაახლოვებს "ერთიანი ნაციონალური მოძრაობის" მმართველობის სტილთან. პრეზიდენტი ცდება, როდესაც საქართველოს უზენაესი სასამართლოს თავმჯდომარის კანდიდატურის განხილვის პროცესში, ქვეყანაში ახალგაზრდა სამართლის სპეციალისტებს ისტიტუციური დიალოგის მიღმა ტოვებს. პრეზიდენტი საუბრობს სამოქალაქო საზოგადოების გაძლიერებაზე, მაგრამ საზოგადოებას არ მოუსმენია კონკრეტული ხედვა, თუ რას გვთავაზობს პრეზიდენტი ინსტიტუციათა დამოუკიდებლობისთვის", _ აღნიშნავდნენ "ახალგაზრდა ადვოკატები".
ორგანიზაციის პროტესტს პრეზიდენტის ადმინისტრაციაში გუშინვე უპასუხეს.
"არასამთავრობოთა კოალიციის მხრიდან, სადაც 33 არასამთავრობო ერთიანდება, იყო მომართვა და შესაბამისად პრეზიდენტი შეხვდა მათ, ანუ არასამთავრობოთა კოალიციას. დანარჩენი არასამთავრობოების მხრიდან ასეთი მომართვა არ ყოფილა, შესაბამისად შეხვედრაც არ დაგეგმილა", _ განმარტავდა "გურია ნიუსთან" პრეზიდენტის ადმინისტრაციის პრესსამსახურის წარმომადგენელი თიკო მჟავანაძე.
თუმცა დღეს, როდესაც ვუთხარით, რომ მსგავსი მიმართვა პრეზიდენტის ადმინისტრაციის ხელმძღვანელის სახელზე "ახალგაზრდა ადვოკატების" ხელმძღვანელმა არჩილ კაიკაციშვილმა 13 იანვარს დაწერა, თიკო მჟავანაძემ გვიპასუხა:
"თქვენს გამოცემას გუშინაც ვუთხარით, რომ ეს პრეზიდენტს ერთ კონკრეტულ კოალიციასთან ჰქონდა შეხვედრა. სხვა არასამთავრობო ორგანიზაციებმაც დამირეკეს, მაგრამ ვინაიდან მხოლოდ ამ არასამთავრობოების გაერთიანებასთან იყო შეხვედრა, სხვებს თანხმობა არ ვუთხარით. მომავალში კიდევ გაგრძელდება კონსულტაციები. ახლა კონკრეტულად ვერ გეტყვით, ვისთან შეიძლება გაიმართოს კონსულტაციები და ვისთან არა. მაგრამ პროცესი გრძელდება",_ გვითხრა თიკო მჟავანაძემ.
არასამთავრობო ორგანიზაცია "ახალგაზრდა ადვოკატების" განცხადებას
ადამიანის უფლებებისა და მართლმსაჯულების საკითხებში პრეზიდენტის მრჩეველი კახა კოჟორიძეც გამოეხმაურა და აღნიშნა, რომ არასამთავრობო ორგანიზაციები ჩვენს ქვეყანაში ძალიან ბევრია და გიორგი მარგველაშვილი ყველას ვერ შეხვდება.
"2011 წლიდან არსებობს კოალიცია "დამოუკიდებელი გამჭვირვალე მართლმსაჯულებისთვის", რომელიც 30-ზე მეტ ორგანიზაციას აერთიანებს.
საქართველოს პრეზიდენტმა შესთავაზა შეხვედრა ამ კოალიციის ყველა წევრ ორგანიზაციას. დღეს თქვენ ნახეთ როგორი ფართო შეხვედრა იყო. ძალიან ბევრი არასამთავრობო ორგანიზაცია არსებობს და უნდა გავითვალისწინოთ ობიექტური რეალობა, რომ სამწუხაროდ პრეზიდენტი ყველა არასამთავრობო ორგანიზაციას ვერ შეხვდება. ყოველშემთხვევაში, ამ ეტაპზე ასე გადაწყდა იმიტომ, რომ ფიზიკურად ვერ დაიტევს ის დარბაზი, სადაც იყო შეხვედრა. თუმცა, მომავალში, ალბათ, შესაძლებელია სხვა ორგანიზაციებსაც შეხვდეს, მაგრამ ჩვენ არ გვინდა, რომ პრეზიდენტის ადმინისტრაციამ და უშუალოდ პრეზიდენტმა შერჩევითად იმოქმედოს. ამიტომ, შესთავაზა შეხვედრა იმ გაერთიანებას, რომელიც ამდენი წელია მართლმსაჯულების თემაზე სისტემურად მუშაობს და პრაქტიკულად, ყველა იმ ორგანიზაციას აერთიანებს, რომელიც ამ თემაზე მუდმივად მუშაობს. თუ სხვებიც არიან, ალბათ დავფიქრდებით, რა ფორმატით შეიძლება შეხვედრა", _ განაცხადა კოჟორიძემ.
