"საქართველოს სოლიდარობის ფონდმა" 2014 წლის საქმიანობის შემაჯამებელი ანგარიშის პრეზენტაცია და ფონდის მხარდამჭერი ორგანიზაციების სიმბოლური დაჯილდოების ცერემონია გამართა.
ღონისძიება მთავრობის ადმინისტრაციის უფროსის მოადგილემ, სოლიდარობის ფონდის მუდმივმოქმედი კომისიის თავმჯდომარემ ნინო კობახიძემ გახსნა.
"7 თვის თავზე ჩვენ შევძელით სოლიდარობის ფონდში მობილიზება გაგვეკეთებინა მილიონ შვიდასი ათასი ლარისთვის, რაც დაახლოებით 40 ათასი საჯარო მოხელის დონაციას გულისხმობს, სახელმწიფო სტრუქტურისა და 14 კერძო კომპანიის პარტნიორობის მეშვეობით. ეს ციფრები არაფერს ნიშნავს იმ შედეგთან შედარებით, რომელსაც მივაღწიეთ ამ 7 თვის მანძილზე. ეს გახლავთ 58 ბავშვისთვის დაფინანსებული მკურნალობა და მათი ძვირადღირებული მედიკამენტებით უზრუნველყოფა. ვფიქრობ, სოლიდარობა და ერთმანეთის გვერდით დგომა ბევრ პრობლემას გადაგვიჭრის,"-აღნიშნა ნინო კობახიძემ.
მან მადლობა გადაუხადა როგორც სახელმწიფო უწყებებს, ისე საბანკო სექტორსა და კერძო კომპანიებს "სოლიდარობის ფონდის" მხარდაჭერისთვის.
ნინო კობახიძის განცხადებით, ფონდის საქმიანობა გამჭვირვალეა და საზოგადოების მიერ გაღებული ყოველი თეთრი ბავშვებისა და ახალგაზრდების ჯანმრთელობაზე ზრუნვას ხმარდება.
"პრემიერ-მინისტრმა პირადად გადაუხადა მადლობა 40 000-ს საჯარო მოხელეს. მათ პირადი ელექტრონულ ფოსტით მიუვიდათ პრემიერის მადლობა, რაც არის ერთგვარი სტიმული ამ ადამიანებისთვის,"-დასძინა კობახიძემ.
როგორც პრეზენტაციაზე აღინიშნა, "სოლიდარობის ფონდის" საქმიანობას 240-ზე მეტი საჯარო უწყების 40,000-ზე მეტი თანამშრომელი შემოუერთდა. ფონდმა უკვე გააფორმა თანამშრომლობითი მემორანდუმები 14 კერძო კომპანიასთან. არსებული დახმარებით, ფონდში საერთო ჯამში 1,701,000 ლარის მობილიზება მოხდა და 1,198,000 ლარით დამტკიცდა 58 ბავშვისა და ახალგაზრდის დიაგნოსტიკისა და მკურნალობის ხარჯები. ფონდის დაფინანსებით 18 ბავშვი უკვე გაემგზავრა ან გეგმავს საზღვარგარეთ სამკურნალოდ გამგზავრებას, მათ შორის განსაკუთრებით ძვირადღირებული ძვლის ტვინის ტრანსპლანტაციის ჩასატარებლად.
"2014 ჩვენთვის უმნიშვნელოვანესი წამოწყებისა და პირველი წარმატებებების წელი იყო, რაც მხოლოდ ხალხის, ათი ათასობით ადამიანის თანადგომით გახდა შესაძლებელი. ჩვენ ერთად უკვე გადავჭერით საქართველოში 22 წლამდე ონკოლოგიური დაავადებების მქონე ბავშვების, ახალგაზრდებისა და მათი ოჯახების ფინანსური პრობლემა და დიდი იმედი გვაქვს, რომ ეს მხოლოდ დასაწყისი იქნება. ათასობით სხვა მძიმე სენით დაავადებული ბავშვი და ოჯახი ელოდება ფონდის მხარდაჭერას, რაც მხოლოდ თითოეული ჩვენთაგანის ჩართულობით იქნება შესაძლებელი," – განაცხადა ფონდის ხელმძღვანელმა მარიამ ჯაშმა.
დღევანდელ ღონისძიებაზე "სოლიდარობის ფონდმა" 40 ორგანიზაციას განსაკუთრებული წვლილისთვის „სოლიდარობის ჯილდო" გადასცა. ასევე, მადლობის სერტიფიკატები გადაეცათ 43 საჯარო უწყების წარმომადგენლებს, ფონდის მუდმივმოქმედი კომისიის წევრებსა და დამკვირვებლებს 2014 წელს გაწეული მნიშვნელოვანი მხარდაჭერისათვის.
დღესვე გაიმართა „სოლიდარობის ფონდის" ვებ-გვერდის პრეზენტაცია.
"საქართველოს სოლიდარობის ფონდი" პრემიერ-მინისტრ ირაკლი ღარიბაშვილის ინიციატივით გასული წლის ივნისის თვეში დაფუძნდა. ფონდი საქმიანობის ანგარიშს საზოგადოებას მუდმივად წარუდგენს.
