(გურია ნიუსი, ლანჩხუთი) _ სამშაბათს, ლანჩხუთის საკრებულოს მორიგი სესია გაიმართა, რომელიც ხმაურისა და შეხლა-შემოხლის ფონზე მიმდინარეობდა. “ბუნტის თავი” ფრაქცია “ლანჩხუთის” წევრი დავით წულაძე გახლდათ. ოპოზიციონერი უკვე მერამდენე სესიაა, რაც ბიუჯეტში ცვლილებების დამტკიცებას აპროტესტებს. ამჯერადაც ასე იყო _ მისი პროტესტი საახალწლო ღონისძიებებისთვის 10 ათასი ლარის დამატებამ გამოიწვია: _ ისე ნუ გამომიყვანთ, რომ წინააღმდეგი ვიყო და ბავშვებს შევძულდე, მაგრამ როცა ამ წლის ბიუჯეტს ვამტკიცებდით ერთი წლის წინ, მაშინ არ იცოდით, რომ წლის ბოლოს ახალი წელი მოვიდოდა? _ იკითხა დავით წულაძემ და იქვე დასძინა, რომ ასე ყოველ სესიაზე ბიუჯეტის შეცვლა გამართლებული არააო. მას ამაოდ უხსნიდა საკრებულოს თავმჯდომარე, ნეტავ, ყოველ თვეში გვქონდეს ბიუჯეტის ცვლილების საშუალება ზრდის ხარჯზეო, მაგრამ ოპოზიციონერი პასუხს რატომღაც საფინანსო სამსახურიდან ითხოვდა. წულაძეს გამგებელიც გაეხუმრ-გაეპასუხა: _ დავით, გასული წლის ბოლოს კი არა, 2009 წელსაც ვიცოდით, 2011 წელი რომ დადგებოდაო. დარბაზში უმრავლესობის წევრებმა ჩურჩული დაიწყეს _ წულაძე ჟურნალისტების დასანახად ახმაურდაო.
თითქოს ოპოზიციონერის დაშოშმინება მოახერხეს, როცა მმართველი გუნდის წევრმა, მერაბ წილოსანმა ოპოზიციონერს კიდევ ერთხელ განუმარტა, რომ “არ არის საჭირო ტყუილის თქმა, ყველა საკითხი განხილულია კომისიებსა და ბიუროზე”. საუბრისას მას შელაპარაკება მოუხდა ლევან ჩხაიძესთან. სამწუხაროდ, არ ისმოდა თუ რაზე დავობდნენ საკრებულოს წევრები, თუმცა, ლამის იყო საქმე ხელით შეხებამდეც მივიდა: _ რა უნდა გავიხსენო ჩემი წარსულიდან?! კარგი კაცის სახელი მაქვს, როცა საჭირო იყო, ყაჩაღებს ვებრძოდი. შეხედეთ, რა მდგომარეობაშია ქალაქის ბაზარი? ან მიმდებარე ტერიტორია. ქალაქში არ დადიხართ, _ ჩხაიძე წილოსანს უტევდა. ამ უკანასკნელმა კი, შენი წარსული როდის ვახსენეო, უპასუხა. სიტუაცია ისევ დაიძაბა, მოჩხუბრებს კოლეგები ამშვიდებდნენ, ჩიტიძე ვითარების დასაწყნარებლად ყვირილზეც გადავიდა. საბოლოოდ, ვითარება იმით განიმუხტა, რომ ჩხაიძემ პროტესტის ნიშნად სესია დატოვა _ ასეთი დეპუტატობაც თქვენ გქონდეთ და კარგად მეყოლეთო. მას წულაძეც მიჰყვა.
