7 ნოემბერს, ჩოხატაურის მუნიციპალიტეტის გამგებელი, ლელა იმედაშვილი დაბის გამგებელთან, გოჩა ჯინჭარაძესთან და ჟურნალისტებთან ერთად, ჩოხატაურში მცხოვრებ იმ ადამიანებს ეწვია, რომლებიც სოციალურად დაუცველები არიან და გამგეობის დახმარებას საჭიროებენ.
გამგებლის თქმით, ამ ადამიანებს მუნიციპალიტეტი ამ ეტაპზე შეშით დაეხმარება:
_ მინდა ჩემთან ერთად წამოხვიდეთ, თქვენი თვალით ნახოთ, ვისთვის ვაპირებთ შეშის მიცემას და ბოლოს ერთად შევჯერდეთ. ჩემთვის თქვენი აზრი ძალიან მნიშვნელოვანია, _ გვითხრა გამგებელმა.
ლიანა რამიშვილი კერძო ბინაში 85 წლის დედასთან და ვაჟიშვილთან ერთად ცხოვრობს. იგი ონკოლოგიური ავადმყოფია და საწოლიდან დამოუკიდებლად ადგომა არ შეუძლია. ოჯახის შემოსავალი სოციალური დახმარება _ 42 ლარი და პენსიაა. ღარიბულად მოწყობილ ბინაში ძლიერ ცივა, ოჯახს კი გათბობის საშუალება არ გააჩნია. იმედაშვილი რამიშვილების ოჯახს შეშით მომარაგებას იმავე დღისთვის დაპირდა.
შემდეგ საერთო საცხოვრებელს ვეწვიეთ. უკიდურესი გაჭირვება შენობაში შესვლისთანავე იგრძნობა. ნარგიზა ჩხაიძე ფანჯრებზე ცელოფანაფარებულ ერთ ოთახში ორ შვილთან ერთად ცხოვრობს. როგორც გვითხრა, პატარა საწოლი, სადაც შვილებთან ერთად სძინავს, ავარიული სახურავის გამო სველდება. მათი შემოსავალი მხოლოდ სოციალური დახმარებაა. ამ ოჯახსაც ძალიან უჭირს. გამგებლის თქმით, ჩხაიძეები შეშას დაუყონებლივ მიიღებენ, ხოლო ქალბატონი ნარგიზა დასუფთავების სამსახურში დასაქმდება.
_ ადრე ვმუშაობდი მეეზოვედ. მერე დეკრეტში გავედი და სამსახურში აღარ დამაბრუნეს, ადგილი არ გვაქვსო, _ აღნიშნა ჩხაიძემ.
ნანი ქანთარია და კატუშა ბერძენიშვილიც იმავე საერთო საცხოვრებელში ცხოვრობენ. მათაც უჭირთ, აწვიმთ და სცივათ. გამგებელი შეშის გაგზავნას მათაც დაპირდა.
თალიკო მეფარიშვილის სახლში მისულებს, რომელსაც შეშის თხოვნის განცხადება ჰქონდა დაწერილი, დაპობილი და გამზადებული შეშა დაგვხვდა. როგორც მასპინძელმა განმარტა, შეშას გასათბობად ვერ იყენებს, რადგან ეს შეშა სახლს ქარისგან და წვიმისგან იცავს. იმედაშვილმა მას ცელოფანის შეძენაში დახმარება აღუთქვა:
_ ქალბატონო თალიკო, ზამთრის სამყოფი შეშა გაქვთ. ნუ გაიყინებით, რადგან ეს შეშა ქარს და წვიმას ნამდვილად ვერ შეაკავებს. მე პირადად გამოგიგზავნით ცელოფანს, რომელსაც სახლის ამ მხარეს ააკრავთ. თქვენ კი ცეცხლი დაანთეთ და გათბით, _ უთხრა მეფარიშვილს გამგებელმა.
მარტოხელა ქალბატონს, მანანა შანიძეს გასათბობად ფიჩხები ჰქონდა მომარაგებული. მისი თქმით, დაბის გამგებელი ყველანაირად გვერდში უდგას და შეშასაც ყოველ წელს უგზავნიან. შანიძემ შეშის გაგზავნის პირობა წლეულსაც მიიღო.
ცუცუნია ნინიძეს, რომელიც ასევე მარტოხელაა და დამოუკიდებლად სიარული არ შეუძლია, გამგებლის სტუმრობა ისე გაუხარდა, რომ ცრემლები ვერ დამალა. შეშის მიღების პირობამ კი ძალიან გაახარა:
_ არ ვიცოდი, ეს ზამთარი როგორ უნდა გამეტანა, _ აღნიშნა ნინიძემ.
შეშის გაგზავნას ექვსი შვილის დედას, იამზე ბერძენიშვილსაც დაჰპირდნენ, რომელიც ყოფილი სასტუმროს შენობის ორ ოთახში ცხოვრობს. ბერძენიშვილის განმარტებით, მრავალშვილიანი ოჯახის რჩენას სოციალური დახმარებით და მცირე ხელფასით ახერხებს.
გამგებელი ბოლოს ოლღა უბილავას ოჯახს ეწვია. ქალბატონ ოლღას, რომელიც ობოლ შვილიშვილებს მარტო ზრდის, ცოტა ხნის წინ სახლი დაეწვა და ახლა სხვის ოჯახშია შეკედლებული. მათ სოციალური დახმარებაც მოეხსნათ:
_ საცხოვრებელი რომ შევიცვალეთ, დახმარება გაგვიჩერეს, _ თქვა უბილავამ და აღნიშნა, რომ მათთვის ყველაზე დიდი პრობლემა უბინაობაა.
ლელა იმედაშვილის თქმით, ჩოხატაურის მუნიციპალიტეტის გამგეობა, შეძლებისდაგვარად ყველა გაჭირვებულს დაეხმარება:
_ სამწუხაროდ, ძალიან ბევრი სოციალურად გაჭირვებული ოჯახი ცხოვრობს ჩოხატაურში და ეს ძალიან მაწუხებს. ყველაფერს გავაკეთებ იმისთვის, რომ მათ ყოფა მცირეოდენ მაინც შევამსუბუქო, _ გვითხრა გამგებელმა.
