„გაერთიანებული დემოკრატიული მოძრაობა“ იური ვაზაგაშვილის გარდაცვალებასთან დაკავშირებით განცხადებას ავრცელებს.
"ქვეყანაში არსებული მდგომარეობა სახიფათო ზღვარს მიუახლოვდა და ამის მიზეზია ათასობით გამოუძიებელი საქმე, მათ შორის ისეთი გახმაურებული საქმე, როგორიც ე.წ კორტების საქმეა, რომელიც დღემდე სრულად გამოუძიებელია და დამნაშავეები არ არიან დასჯილნი. უფრო მეტიც, ბატონი იურის ბოლოდროინდელი საჯაროდ გაკეთებული განცხადებები, სადაც ის პირდაპირ ასახელებდა მისი შვილის მკვლელების გვარებს, რომლებიც დღემდე თავისუფლებაზე არიან, ნაწილი მათგანი კი განაგრძობს მუშაობას არ აჩენს ეჭვს, რომ ბატონ იურის აფეთქება იყო წინასწარ დაგეგმილი.
მომხდარი საზარელი დანაშაული, რომელიც იქნა დაგეგმილი და შესრულებული ყველაზე ცინიკური და მზაკვრული ფორმით – შვილის საფლავზე დაგეგმილი მამის მკვლელობა, ცდება კრიმინალური შემთხვევის კვალიფიკაციას, თუნდაც მკვლელობის კვალიფიკაციას და სახელმწიფოებრივ მნიშვნელობას იძენს. ქვეყანა დადგა მეტად შემაშფოთებელი რეალობის წინაშე, მას ვინც ბოლომდე იბრძოლებს საკუთარი სიმართლის დასამტკიცებლად და მოითხოვს დამნაშავეების დასჯას, თავისუფლად დაუგეგმავენ ტერაქტს.
„გაერთიანებული დემოკრატიული მოძრაობა“ ხაზგასმით აღნიშნავს, რომ თუ იური ვაზაგაშვილის საქმე არ იქნა უმოკლეს ვადაში გამოძიებული, ქვეყანაში შედეგები უმძიმესი იქნება. თუ ხელისუფლება რეალურად დაინტერესებულია ჭეშმარიტების დადგენით, მან უსწრაფესად უნდა გამოიძიოს აღნიშნული ფაქტი და კანონის უმკაცრესი ფორმით დასაჯოს დამნაშავეები, რათა საზოგადოებას აღარ დარჩეს კითხვები.
„გაერთიანებული დემოკრატიული მოძრაობა“ ღრმა მწუხარებას გამოთქვამს და სამძიმარს უცხადებს ბატონი იურის ოჯახის წევრებსა და ახლობლებს."
