გასულ კვირას ჩოხატაურის მუნიციპალიტეტის საკრებულოს თავმჯდომარემ ზაალ მამალაძემ რამდენიმე მნიშნელოვანი ინიციატივა გააჟღერა. მამალაძე მიიჩნევს, რომ ქველმოქმედება თითოეულმა საჯარო მოხელემ ყოველდღიურობად უნდა გახადოს.
"მოგიწოდებთ, რომ ქველმოქმედება ჩვენს ყოველდღიურობად ვაქციოთ. გამგეობაში, საკრებულოში, ა(ა)იპებში, ყველა საჯარო დაწესებულებებში დავდგათ ყუთები, სადაც თანხის ჩაგდების საშუალება ნებისმიერ ადამიანს ექნება. თანხის რაოდენობას მნიშვნელობა არ აქვს _ ვისაც რის საშუალება ექნება, იმდენს გაიღებს. მინდა, რომ ეს ყუთები დაიდგას სკოლებში და მომავალმა თაობამ ისწავლოს ქველმოქმედება. გარდა ამისა, გამოვყოთ ოთახი, სადაც მოგროვდება მეორადი ტანსაცმელი, საყოფაცხოვრებო ნივთები. ჩვენს ირგვლივ უამრავი ადამიანია, რომელსაც ეს სჭირდება" _ აღნიშნა მამალაძემ და დასძინა, რომ იმ ადამიანებისთვის, რომლებიც ეკლესიიდან, ჩოხატაურის მუნიციპალიტეტის დაფინანსებით მხოლოდ პურს იღებენ, ამ ეტაპზე მშრალი პროდუქტების შეძენაა შესაძლებელი.
საკრებულოს თავმჯდომარესთან საუბარი სწორედ ამ თემით დავიწყეთ:
_ ბატონო ზაალ, ბიუჯეტი მიღებულია, პრიორიტეტები ვიცით, თუმცა სოციალურ ბიუჯეტად წოდებულ დოკუმენტში ვერ მოხვდა უფასო სასადილო. საკრებულოს სხდომაზე თქვენ აღნიშნეთ, რომ უპოვრებს შემოწირულობებით დაეხმარებით. რა მოხდა, რატომ ვერ ჩაისვა ბიუჯეტში უფასო სასადილო და რატომ გადაწყვიტეთ, რომ ეს ადამიანები შემოწირულობების იმედად იყვნენ?
_ ის ფორმა, რომელიც დღემდე, სხვადასხვა მუნიციპალიტეტში თუ ქალაქში არსებობს, ჩემი აზრით, დასახვეწია. არ შეიძლება გამოყოფილი თანხის 50 პროცენტი სახელფასო ფონდზე მიდიოდეს და მხოლოდ ნახევარი ხმარდებოდეს უპოვართა კვებას. ბევრი სხვა პრობლემაცაა, მაგალითად, ბენეფიციარებს ჯანმრთელობის პრობლემებიც აქვთ და ამდენად, განსასაზღვრია რა სახის საკვების მიწოდება სჭირდება თითოეულს. ინიციატივა, რომ დაგვეფინანსებინა უკიდურესად შეჭირვებულები საკვებით, თქვენგან დეკემბრის დასაწყისში შემოვიდა. ეს დრო კი ყველა საკითხის მოსაგვარებლად საკმარისი ნამდვილად არ იყო. თუმცა, ეს არ ნიშნავს იმას, რომ უფასო სასადილო არ იქნება. აქვე იმასაც აღვნიშნავ, რომ დასაზუსტებელია სტატისტიკა, რომელიც რეალობას ასახავს და უკვე დავიწყეთ მონაცემების შეგროვება. ყველა დეპუტატს დაევალა, რომ თავიანთ სოფლებში მოიძიონ დაზუსტებული მონაცემები იმ ადამიანების შესახებ, რომლებიც დახმარების გარეშე ნამდვილად იშიმშილებენ. როცა ეს ყველაფერი დაზუსტდება, უფრო კონკრეტულად შეგვეძლება ამ თემაზე საუბარი. მანამდე კი, როგორც სხდომის დასასრულს აღვნიშნე, ვეცდებით შემოწირულობით მიღებული თანხებით ბენეფიციარებს პროდუქტები შევუძინოთ.
_ გამოეხმაურა თუ არა თქვენს ინიციატივას ვინმე და როგორ ფიქრობთ, რა თანხა შეგროვდება თვის განმავლობაში?
_ ეს ახალი ინიციატივაა. ჩვენი დეპუტატები აქტიურად მუშაობენ ამ საკითხზე. რაც შეეხება გამოხმაურებას, დეპუტატების გარდა, ჯერ სხვა არავინ შეგვხმიანებია. შესაბამისად, ამ ეტაპზე ვერც იმ სავარაუდო თანხას დავასახელებ, რომლის შემოსვლის მოლოდინიც გვაქვს.
"გურია ნიუსთან" საუბრისას ზაალ მამალაძემ ვრცლად ისაუბრა სასოფლო-სამეურნეო კოოპერატივებზე და აღნიშნა, რომ ამ პროგრამაში ჩართვა ბევრი ოჯახის შემოსავალს მკვეთრად გაზრდის:
_ თავდაპირველად, კოოპერატივი სამეწარმეო იურიდიულ პირად მეწარმეთა და არასამეწარმეო (არაკომერციული) იურიდიული პირების რეესტრში (საჯარო რეესტრში) უნდა დარეგისტრირდეს. შემდეგ კი სტატუსის მინიჭების მოთხოვნით მიმართოს სასოფლო-სამეურნეო კოოპერატივების განვითარების სააგენტოს. სასოფლო-სამეურნეო კოოპერატივის წევრი შეიძლება იყოს 18 წელს მიღწეული საქართველოს მოქალაქე, რომელიც უშუალოდ მონაწილეობს ამ კოოპერატივის სასოფლო-სამეურნეო საქმიანობაში და ფლობს პაის. კოოპერატივის ქონება იქმნება წევრთა (მეპაიეთა) შენატანით (პაით), სასოფლო-სამეურნეო საქმიანობით მიღებული მოგებით, გრანტით ან სხვა წყაროებით. კოოპერატივი დემოკრატიული მართვის პრინციპს ემყარება – ერთ მეპაიეს ერთი ხმის უფლება აქვს, იმის მიუხედავად, რა რაოდენობის ქონებით შევა გაერთიანებაში.
საკრებულოს თავმჯდომარის ინფორმაციით, საჭიროა მაღალმთიან რეგიონში მინიმუმ 3, ხოლო დანარჩენ ტერიტორიაზე _ მინიმუმ 5 ადამიანის საერთო იდეის გარშემო გაერთიანება.
სასოფლო-სამეურნეო კოოპერატივების განვითარების სააგენტოს გარდა, პროექტის განხორციელების პროცესში რამდენიმე ორგანიზაციაა ჩართული:
_ ENPARD-ის მცირე ფერმერთა კოოპერაციის კომპონენტის ფარგლებში, ევროკავშირის მიერ შეირჩა ოთხი კონსორციუმი _ CARE, Mercy Corps, Oxfam, PIN _ ეს ის ორგანიზაციებია, რომლებიც პროგრამის გახორციელებაში მონაწილეობენ, _ აღნიშნა მამალაძემ.
_ სოფლის მეურნეობის სამინისტრო "სასოფლო-სამეურნეო კოოპერატივების მოტო ბლოკებითა და ხელის სათესი მექანიზმებით უზრუნველყოფის პროექტს" განახორციელებს. პროექტი ითვალისწინებს კოოპერატივებისათვის 1700 ერთეული მოტო ბლოკისა და 2000 ხელის სათესის შეღავათიანი პირობებით ან ლიზინგით (გრძელვადიანი იჯარა-გამოსყიდვის უფლებით) გადაცემას; სოფლის მეურნეობის პროექტების მართვის სააგენტოს "სასოფლო-სამეურნეო პროდუქტების გადამამუშავებელი საწარმოების თანადაფინანსების პროექტით", რომელიც სოფლის მეურნეობის პროდუქციის გადამამუშავებელი ახალი საწარმოების შექმნას ან უმოქმედო საწარმოს ამუშავებას ითვალისწინებს, ფინანსური და ტექნიკური დახმარების გაწევა განსაზღვრულია კოოპერატივებისთვისაც; სასოფლო-სამეურნეო კოოპერატივი სარგებლობს უპირატესობით, მიიღოს გრანტი; განსაზღვრულია სასოფლო-სამეურნეო კოოპერატივებში დასაქმებულების უფასო სწავლება-გადამზადება და კვალიფიკაციის ასამაღლებელი სხვა პროგრამები.
_ გავიგეთ, რომ სახელმწიფო მხარს უჭერს კოოპერატივებს.. კიდევ რა უპირატესობები აქვს კოოპერატივს?
_ სასოფლო-სამეურნეო კოოპერატივის წევრებს შემოსავალი მეტი აქვთ, ხარჯი კი ნაკლები, რადგან დანახარჯები და რისკები რამდენიმე სუბიექტზე ნაწილდება, ერთობლივი ეკონომიკური საქმიანობით სტაბილური ბაზარი უფრო ხელმისაწვდომია, ხელსაყრელია ერთიანი საბითუმო დაბალი ფასები აგრო თუ სხვა მასალების შესყიდვისას. ინდივიდუალურად, ცალ-ცალკე გლეხების საქმიანობა წარიმართება მხოლოდ დაბალ ტექნოლოგიურ დონეზე. ძალთა გაერთიანებით კი შესაძლებელია ახალი ტექნოლოგიების დანერგვა. გარდა ამისა, სასოფლო-სამეურნეო კოოპერატივი, როგორც გაერთიანება, კრედიტუნარიანად ითვლება და საკრედიტო რესურსი მისთვის უფრო ხელმისაწვდომია, ვიდრე განცალკევებული სუბიექტისთვის, გლეხისთვის.
მნიშვნელოვანია ისიც, რომ მოგების გადასახადით არ იბეგრება სასოფლო-სამეურნეო საქმიანობით მიღებული შემოსავალი (პირველადი წარმოება) და გრანტი; სასოფლო-სამეურნეო კოოპერატივთან დაკავშირებით, არ არის დაწესებული მოგების გადასახადის ზღვარი წლიური ბრუნვის მიხედვით, რომელიც, მაგალითად, შპს-ს შემთხვევაში, 200 000 ლარს შეადგენს; ქონების გადასახადით არ იბეგრება კოოპერატივის ქონება, რომელიც გამოიყენება სასოფლო-სამეურნეო საქმიანობისთვის; სასოფლო-სამეურნეო საქმიანობისთვის ლიზინგით გაცემული მოძრავი ქონება; საშემოსავლო გადასახადით არ იბეგრება კოოპერატივის საქმიანობის ფარგლებში, კოოპერატივის წევრების მიერ მიღებული დივიდენდი; სასოფლო-სამეურნეო კოოპერატივები ასევე სარგებლობენ ყველა იმ საგადასახადო შეღავათებით, რომლებიც სოფლის მეურნეობასთან მიმართებაში მოქმედებს, _ განმარტავს მამალაძე.
_ ამიტომაც მოვუწოდებ ჩოხატაურის მოსახლეობას, რომ კარგად გაეცნონ ამ პროგრამას, დაუკავშირდნენ თავიანთი სოფლების მაჟორიტარებს, რომლებიც დააკვალიანებენ და პროცედურის წარმართვაშიც დაეხმარებიან. ახლა მთავარია კარგი იდეები, რომ პროცესი დავიწყოთ. მით უმეტეს, რომ გასულ წელს, ჩოხატაურში პრეცენდენტი გაჩნდა და ორი კოოპერატივი უკვე დაფინანსდა, _ ამბობს ჩვენთან საუბრისას ზაალ მამალაძე.
