ყოფილი პრემიერ-მინისტრის ზურაბ ჟვანიას დაცვის ყოფილი უფროსის, კობა ხარშილაძის განცხადებით, ზურაბ ჟვანიამ ტუჩთან დაზიანება მაშინ მიიღო, როდესაც ხელოვნურ სუნთქვას უტარებდა:
_ შიგნით შევედი ფანჯრის გისოსების გამოგლეჯვის შემდეგ, რადგან კარები იყო ურდულით ჩაკეტილი და გასაღებით მას ვერ გავაღებდი. როდესაც შიგნით შევედი, ზურაბ ჟვანია უგონო მდგომარეობაში იჯდა სავარძელში. არც შეხებაზე და არც ყვირილზე რეაგირება არ ჰქონია და არანაირი სიცოცხლის ნიშანწყალი არ ეტყობოდა, არც პულსი არ ესინჯებოდა. ამის შემდეგ გადმოვაწვინე იატაკზე და გადავწყვიტე, ჩამეტარებინა ხელოვნური სუნთქვა. ხელოვნურმა სუნთქვამ შედეგი არ გამოიღო და მივხვდი, რომ გარდაცვლილი იყო, რის შესახებაც ვუთხარი მიხეილ ძაძამიასაც. პრემიერი გარეგნულად დავათვალიერე და მას არანაირი დაზიანება არ ჰქონდა. ა არ ჰქონდა დაზიანება უსუპოვსაც. ტუჩთან დაზიანება ზურაბ ჟვანიამ მას შემდეგ მიიღო, რაც ხელოვნურ სუნთქვას ვუტარებდი. მას ასევე არანაირი სისხლის ლაქა არ ჰქონდა, _ განაცხადა ხარშილაძემ დღევანდელ სასამართლო პროცესზე.
ხაშილაძის განცხადებით, ბინაში არაორდინალური სიტუაცია იყო და ამის გამოსასწორებლად უსუპოვის გვამი შემთხვევის ადგილიდან პირადად გაიტანა:
_ უსუპოვი პრემიერისგან მოშორებით ეგდო, იყო არაორდინალური სიტუაცია და ამ სიტუაციის გამოსასწორებლად, მოვიფიქრე შემდეგი გეგმა _ რაულ უსუპოვის ცხედარი მე და მიხეილ ძაძამიამ გავიტანეთ ბინიდან და ჩავდეთ მანქანაში. როდესაც მანქანაში ჩავსხედით, შემდეგ მივხდი, რომ ეს იყო აბსურდული გეგმა და ცხედარი ისევ უკან შევიტანეთ. დავაწვინეთ იმავე ადგილზე და იმავე მდგომარეობაში როგორც იყო. ფეხსაცმელი, სავარაუდოდ, ამ გატანის დროს გაძვრა და ასევე შარვალიც, სავარაუდოდ ამ დროს დაესვარა, _ განაცხადა ხარშილაძემ, რომლის განმარტებით ამის შემდეგ გიორგი ბარამიძეს დაურეკა და მომხდარი შეატყობინა
_ მე ვიყავი სახლში. დამირეკა მიხეილ ძაძამიამ და მითხრა, რომ ზურა იყო უგონო მდგომარეობაში. გავემართე შემთხვევის ადგილზე, თუმცა გზაზე მანქანა გამიფუჭდა. ამის შემდეგ ბინიდან მოშორებით მომაკითხა ძაძამიამ და შემთხვევის ადგილზე მიმიყვანა. როდესაც მივედი, ფანჯრიდან დავინახე, რომ ბატონი პრემიერი უგონოდ გამოიყურებოდა. ვერ გავაღეთ კარი, შემდეგ ავძვერი გისოსებზე და ძაძამიას დახმარებით მოვაგლიჯე ეს გისოსები და შევედი ბინაში, _ თქვა ხარშილაძემ.
ზურაბ ჟვანიას საქმეზე შემდეგი სასამართლო პროცესი 2 თებერვალს გაიმართება, სადაც მიხეილ ძაძამიას და დაცვის სხვა წევრებს დაკითხავენ.
