ბორჯღალოსნების წლევანდელი საერთაშორისო სეზონის გახსნამდე ორი კვირა რჩება. 7 თებერვალს საქართველოს ეროვნული ნაკრები ევროპის ერთა თასის 2015 წლის გათამაშების პირველ მატჩში სტუმრად გერმანიის ეროვნულ ნაკრებ გუნდს დაუპირისპირდება. მატჩი ქალაქ ჰოიზენშტამში ‘სპორტცენტრუმ' სტადიონზე, თბილისის დროით 17:00 საათზე დაიწყება.
გერმანიაში ჩასვლამდე ერთი კვირით ადრე ჩვენი გუნდი ტულუზაში, "ერნესტ ვალონის" ბაზაზე შეიკრიბება, სადაც მატჩისთვის მზადებას დაიწყებს.
დღეს კი, საქართველოს ეროვნული ნაკრების მთავარმა მწვრთნელმა ბორჯღალოსნების გაფართოებული შემადგენლობა დაასახელა, რომლითაც ჩენი გუნდი ევროპის ერთა თასის პირველ ორ მატჩში (გერმანიის და პორტუგალიის ნაკრებების წინააღმდეგ) წარსდგება. ჰეიგის სელექციაში 27 მორაგბეა, ხოლო ტულუზაში გამგზავრებამდე რაზმს კიდევ ერთი მორაგბე დაემატება.
მიმდინარე ტრავმების გამო გუნდში არ იმყოფებიან: ვიქტორ კოლელიშვილი, დავით ხინჩაგაშვილი (ორივეს მუხლის ტრავმა აქვს), თედორე ზიბზიბაძე, ჯაბა ბრეგვაძე (ორივე ტრავმის შემდგომ რეაბილიტაციას გადიან) და ვაჟა ხუციშვილი, რომელსაც ბარძაყის კუნთის მცირე ტრავმა აწუხებს.
რაზმის დასახელებამდე, მილტონ ჰეიგმა სელექციის შესახებ ისაუბრა: "შემადგენლობის დასახელება გუნდში არსებული რამდენიმე ტრავმის გათვალისწინებით მოგვიწია, მაგრამ ამით იმ მორაგბეების თამაშის შეფასების შესაძლებლობა მოგვეცემა, ვისი ხილვაც განსხვავებულ პოზიციებზე გვსურს. გარდა ამისა, საქმეში იმათ ვნახავთ, ვისი გამოძახებაც ეროვნულ ნაკრებში ბოლო 6 თვის განმავლობაში გვსურდა, მაგრამ ამის შესაძლებლობა არ გვეძლეოდა. სელექციაში ვიხილავთ მორაგბეებს, რომლებსაც გარკვეული დროის განმავლობაში ნაკრებში არ უთამაშიათ – ვაზტანგ მაისურაძე, რომელსაც ტრავმები დაახლოებით ცხრა თვის განმავლობაში აწუხებდა და სულ ახლახან განაახლა თამაში; ვუხმეთ ვასილ კაკოვინს. ვასოს ტრავმების გამო ნაკრებში ერთ წელზე მეტი არ უთამაშია; საბედნიეროდ ტრავმები მოიშუშეს და გუნდში დაბრუნდნენ მამუკა გორგოძე, დავით ზირაქაშვილი და შალვა სუთიაშვილი."
განსხვავებულ პოზიციებზე სამწვრთნელო შტაბს განზრახული აქვს ზურაბ ჟვანიას შერკინების კვაჭის, ხოლო თამაზ მჭედლიძის შუამარბის პოზიციაზე ნახვა. ჰეიგმა განაცხადა, რომ : "ალბათ 6 თვეზე მეტია რაც ამის განხორციელებას ვფიქრობდით. უნიკალური შესაძლებლობა გვეძლევა ზურა ჟვანია ნაკრბში ჰუკერზე გავსინჯოთ. ფასდაუდებელია, როდესაც გუნდში გყავს მოთამაშე, რომელსაც როგორც ბურჯის, ასევე კვაჭის პოზიციაზე შეუძლია თამაში.
თამაზ მჭედლიძეს რაც შეეხება, პირველად მისი თამაში ცენტრის პოზიციაზე ვიხილე. ის მასიური და ძლიერი მორაგბეა, რომელიც შეტევებში კარგ შესაძლებლობებს ქმნის. იაპონიის წინაღმდეგ მას, დავით კაჭარავას დაშავების შემდეგ, შუამარბად მოუწია გადასვლა და კარგადაც გაართვა ამას თავი. მიმაჩნია, რომ არის რაღაცეები რისი სწავლაც ამ პოზიციისთვის მას ესაჭიროება, მაგრამ პერსპექტივაში მე მჭედლიძეს შუამარბად მოვიაზრებ.
დასახელებულ რაზმში ორი დებიუტანტია: ‘ბოლნისის ყოჩებისა' და 7-კაცა ნაკრების მოთამაშე ალეხანდრე ხუციშვილი და ‘არმაზის' მორაგბე ვასო ლობჟანიძე. ამ უკანასკნელს ახალგაზრდა ბორჯღალოსნების ყველა ასაკობრივ გუნდში უასპარეზია.
ალექსანდრეს წელიწადზე მეტ ხანს ვაკვირდებოდით. ამ პერიოდის განმავლობაში, იგი ნაკრების ადგილობრივ მოთამაშეთა ჯგუფთან ერთად ვარჯიშობდა და 7-კაცაშიც შესანიშნავად ირჯებოდა.
საქმე იმაში გახლავთ, რომ ირაკლი მაჩხანელის ნაკრებიდან წასვლის შემდეგ, ფრთაზე ადგილი გამონთავისუფლდა და მომდევნო ორ მატჩში ხუციშვილის თამაშის ნახვის კარგი შესაძლებლობა გვეძლევა. მინდა ავღნიშნო, რომ იგი არის დიდი და სწრაფი მოთამაშე, რომელსაც ოფლოუდების კეთებაც ეხერხება. აქედან გამომდინარე, სამწვრთნელო შტაბმა გადავწყვიტეტ მას თავის გამოჩენის შანსი მივცეთ და ვნახოთ, როგორ გაამართლებს.
ნოემბერში ვაჟა ხუციშვილმა იაპონიის წინააღმდეგ შესანიშნავად ითამაშა. იმ ტესტში იგი ერთ-ერთი გამორჩეული მოთამაშე იყო, მაგრამ ბარძაყის კუნთის ტრავმის გამო სელექციაში ვერ მოხვდა. ამით 9 ნომერზე ახალგაზრდა ვასო ლობჟანიძის სანაკრებო დონეზე ხილვის შესაძლებლობა მოგვეცა. ეს რათქმაუნდა არ ნიშნავს, რომ ვასო მთელი ტურნირის განმავლობაში მოხვდება სელექციაში. წინ მსოფლიო თასია და რათქმაუნდა მწვრთნელები ამ სამ 9 ნომერს – გიორგი ბეგაძეს, ვაჟა ხუციშვილსა და ვასო ლობჟანიძეს დავაკვირდებით სამსოფლიო გუნდის სელექციისას. აღსანიშნავია, რომ ბოლო პერიოდში ვასომ საგრძნობლად მოუმატა და იგი საკმაოდ პერსპექტიული მოთამაშეა." _ განაცხადა ჰეიგმა.
საქართველოს ნაკრები
შერკინება: ვასილ კაკოვინი (ტულუზი), მიხეილ ნარიაშვილი (მონპელიე), დავით ზირაქაშვილი (კლერმონი), ლევან ჩილაჩავა (ტულონი), დავით ქუბრიაშვილი, ზურაბ ჟვანია (ორივე-სტად ფრანსე), შალვა მამუკაშვილი (სეილ შარქსი). გიორგი ნემსაძე (ტარბი), ვახტანგ მაისურაძე (ალბი), გიორგი ჩხაიძე (ლილი), კოტე მიქაუტაძე, მამუკა გორგოძე (ორივე-ტულონი), გიორგი თხილაიშვილი (ბათუმი), შალვა სუთიაშვილი (მასი), ბექა ბიწაძე (ლოკომოტივი), ლაშა ლომიძე (ბეზიე).
უკანა ხაზი: ვასილ ლობჟანიძე (არმაზი), გიორგი ბეგაძე (ყოჩები), ლაშა ხმალაძე, ალექსანდრე თოდუა (ორივე-ლელო), ლაშა მალაღურაძე (ბაგნერე), მერაბ შარიქაძე (ორიაკი), დავით კაჭარავა (ენისეი), თამაზ მჭედლიძე (აჟენი), ალექსანდრე ხუციშვილი (ყოჩები), მერაბ კვირიკაშვილი (მონლუსონი), გიორგი აფციაური (აია).
წყარო: rugby.ge
