ქ. ასტანაში საქართველოსა და ესტონეთის რესპუბლიკის საელჩოების ორგანიზებით ქართველი კინორეჟისორის ზაზა ურუშაძის ფილმის „მანდარინების“ ჩვენება გაიმართა.
საქართველოსა და ესტონეთის რესპუბლიკის საელჩოების მიერ ორგანიზებულ კინოჩვენებას 300-მდე სტუმარი დაესწრო, მათ შორის იყვნენ ყაზახეთის რესპუბლიკის საკანონმდებლო და აღმასრულებელი ხელისუფლების, ყაზახეთის რესპუბლიკაში აკრედიტებული დიპლომატიური კორპუსის, ბიზნესწრეების, კულტურის სფეროს, მასმედიის წარმომადგენლები, კინოკრიტიკოსები და ქ. ასტანაში ქართული დიასპორების წევრები.
კინოჩვენების დასრულების შემდეგ გაიმართა საქართველოსა და ესტონეთის რესპუბლიკის საელჩოების მიერ ორგანიზებული მიღება. ღონისძიების ფარგლებში სტუმრებს საშუალება მიეცათ დაეგემოვნებინათ სპეციალურად აღნიშნული ღონისძიებისთვის საქართველოდან ჩამოტანილი მანდარინი და მოეხდინათ ქართული ღვინისა და ესტონური ლიქიორის დეგუსტაცია.
მიღების ფარგლებში სტუმრების მიერ არა ერთხელ აღინიშნა ქართული კინემატოგრაფიის მნიშვნელობა მსოფლიო კინო ინდუსტრიაში და, რომ მხატვრული ფილმი "მანდარინების" ოსკარზე წარდგენა აღნიშნულის კიდევ ერთ დასტურს წარმოადგენს.
შეხვედრის დასასრულს სტუმრებმა მადლობა გადაუხადეს ქართულ მხარეს მოწვევისთვის და წარმატებები უსურვეს ამერიკის კინოაკადემიის, ოსკარის 87-ე დაჯილდოების ცერემონიაზე.
