საქართველოს კულტურისა და ძეგლთა დაცვის სამინისტროს ხელშეწყობით სსიპ “მწერალთა სახლი” 2 სალიტერატურო ჟურნალის გამოსაცემად კონკურსს აცხადებს.
კულტურის სამინისტროს განცხადებით, კონკურსის მიზანია, სალიტერატურო პროცესის გააქტიურება, ქართული ლიტერატურის (პროზა, პოეზია, დრამატურგია და ა. შ.) ნიმუშების წარმოჩენა, სალიტერატურო და სახელოვნებო კრიტიკის განვითარება, კითხვის პოპულარიზაციის ხელშეწყობა. კონკურსში მონაწილეობის მიღება შეუძლიათ სალიტერატურო პერიოდიკის გამოცემით დაკავებულ იურიდიულ პირებს, რომლებსაც აღნიშნულ სფეროში მუშაობის მინიმუმ 1 წლიანი გამოცდილება აქვთ.
წარმოდგენილი პროექტი უნდა აკმაყოფილებდეს შემდეგ კრიტერიუმებს: პერიოდულ გამოცემაში თანაბრად უნდა იბეჭდებოდეს ყველა თაობის ქართულენოვანი ავტორების გამოუქვეყნებელი ნაწარმოებები; ასევე დებიუტანტი მწერლებისა და მთარგმნელების ნაწარმოებები. წარმოდგენილი უნდა იყოს ლიტერატურული კრიტიკის და ესეისტიკის ნიმუშები; ცალკე რუბრიკა უნდა მიეძღვნას მსოფლიოში მიმდინარე თანამედროვე ლიტერატურულ პროცესებს; დაცული უნდა იყოს საავტორო უფლებები; სასურველია, პროექტის წარმომადგენელ ორგანიზაციას ჰყავდეს თანადამფინანსებელი; გამარჯვებულს გამოავლენს 11 წევრისგან შემდგარი ჟიური (მწერალთა სახლის სამეთვალყურეო საბჭო); გადაწყვეტილება მიიღება ხმათა უმრავლესობით. გამარჯვებული პროექტის გამოვლენის შემდეგ "მწერალთა სახლი" კონკურსში გამარჯვებულ ორგანიზაციასთან აფორმებს ხელშეკრულებას.
კონკურსში მონაწილეებს შემდეგი დოკუმენტაციის წარმოდგენა ევალება: წერილი "მწერალთა სახლის" დირექტორ-მენეჯერის ნატალია ლომოურის სახელზე (1 გვ.); პროექტის აღწერილობა (2-3 გვ.); პროექტის თანდართული მასალები: პერიოდიკის გამოცემის 12 თვიანი გეგმა (ნომრების რაოდენობის, ფორმატის, მოცულობის, რუბრიკების, ტირაჟის, ნომრის თვითღირებულების და საცალო ფასის, რეალიზაციის სტატისტიკის მითითებით) (3-4 გვ.). პროექტის 12 თვიანი დეტალური ხარჯთაღრიცხვა; პერიოდული გამოცემის ნიმუშის მაკეტი; ამონაწერი სამეწარმეო რეესტრიდან; სარედაქციო კოლეგიის შემადგენლობის ნუსხა; თანადაფინანსების შემთხვევაში კონკურსანტმა ორგანიზაციამ უნდა წარმოადგინოს თანადაფინანსების შესახებ ოფიციალური დოკუმენტის ორიგინალი.
განმცხადებელმა საკონკურსო დოკუმენტაცია უნდა წარმოადგინოს როგორც ბეჭდური (1 ეგზემპლარი), ასევე ელექტრონული სახით (CD); საბუთების მიღება იწარმოებს „მწერალთა სახლში“ 2015 წლის 26 იანვრიდან 16 თებერვლის ჩათვლით.
