დღეს, ოზურგეთის მუნიციპალიტეტის საკრებულოს ბიუროს სხდომა შედგა. საკრებულოს თავმჯდომარემ, დავით დარჩიამ საკრებულოს ბიუროს წევრებს ცხრასაკითხიანი დღის წესრიგი წარუდგინა, სადაც ექვსი საკითხი სხვადასხვა კომისიების მიერ გაწეული ანგარიშის შეჯამებას ეხებოდა, ხოლო მომდევნო სამი საკითხი, მუდმივმოქმედ კომისიათა 2015 წლის სამუშაო გეგმის, პირველი კვარტლის სამუშაო გეგმების და საკრებულოს ფრაქციათა მოხსენების წარდგენის გრაფიკის დამტკიცებას შეეხებოდა.
საფინანსო-საბიუჯეტო კომისიის ანგარიში, ამავე კომისიის თავმჯდომარემ, გელა ჩავლეშვილმა წარმოადგინა და ისაუბრა გაწეულ მუშაობაზე. აღნიშნა, რომ მიზანშეწონილად მიიჩნიეს შპს "მარულას" გაუქმება და წარმოადგინა ახალი წლის სამუშაო გეგმაც.
საკრებულოს თავმჯდომარის მოადგილემ, დიმიტრი კვერღელიძემ მას შემხვედრი კითხვები დაუსვა:
"ხალხთან თუ გადიხართ? გამოკითხვა თუ აწარმოეთ, რა სურთ და რა არა, მოსწონთ თუ არა ესა თუ ის ხარჯი? ათი წევრი და ორი თემატური ჯგუფი რომ გყავს კომისიაში, გასვლა არ გვაწყენს სოფელში, აქტიურობა ხალხთან! ესაა ჩვენი უპირველესი ამოცანა. გარდა ამისა, გონიერი მუშაობა გვმართებს, რომ ბიუჯეტში რაც შეიძლება ნაკლები სოციალური პაკეტი იყოს და გაიზარდოს ინფრასტრუქტურაში მიმართული ხარჯები. სოციალური პაკეტებით მდიდარი ბიუჯეტი პროგრესული არ იქნება! ბიუჯეტი არ არის "წითელი ჯვარი"! ამიტომ უნდა მივიდეთ ხალხთან ახლოს. შევუთანხმდეთ, რა დავაფინანსოთ და რა არა!" _ თქვა კვერღელიძემ.
ბიუროს წევრებმა ასევე მოისმინეს განათლებისა და ჯანდაცვის, სამანდატო და იურიდიულ საკითხთა, ინფრასტრუქტურის კომისიების და საკრებულოს აპარატის უფროსის ანგარიში, თუ როგორ იმუშავეს გასული წლის იმ ოთხი თვის განმავლობაში, რაც ისინი ადგილობრივი თვითმმართველობის არჩევნების შემდეგ, საკრებულოს შემადგენლობაში მოვიდნენ. ღიად დატოვეს და სამომავლო განხილვისთვის გადადეს "აგრარულ საკითხთა და ბუნებრივი რესურსების საკითხების კომისიის ანგარიში", რადგან დღეის მდგომარეობით, კომისიის თავმჯდომარე საავადმყოფო ფურცელზე იმყოფება და მას მალე გამოჯანმრთელება უსურვეს.
ბიურომ დაამტკიცა ოზურგეთის მუნიციპალიტეტის საკრებულოს 2015 წლის მთლიანი და ასევე 2015 წლის პირველი კვარტლის სამუშაო გეგმა, რასაც საკრებულოს მორიგ სხდომაზე ცნობად მიიღებენ.
