ლანჩხუთის მუნიციპალიტეტის საკრებულოს დეპუტატმა, ფრაქცია "თავისუფალი დემოკრატების" თავმჯდომარემ, ელგუჯა ჩხაიძემ, ბიუროს ბოლო სხდომაზე კატეგორიული მოითხოვა საკრებულოს სამანდატო, საპროცედურო, იურიდიულ საკითხთა და ეთიკის კომისიის მიერ მიმდინარე წლის დასაწყისში გამართული დახურული სხდომის დასკვნის გასაჯაროება, რომელიც ფრაქცია "თავისუფალი დემოკრატების" თავმჯდომარის განცხადებას განიხილავდა.
საქმე ისაა, რომ საკრებულოს ბიუროს ერთ-ერთ სხდომაზე დეპუტატმა ჩხაიძემ მიზანშეუწონლად მიიჩნია, მისივე თქმით, "ტაშ-ფანდურის" სამსახურის შექმნა (საუბარია განათლების, კულტურის, სპორტისა და ახალგაზრდულ სამსახურზე) და დეპუტატებს მოუწოდა შესყიდვების ან ქონების სამსახური შევქმნათო.
სწორედ ამ განცხადებას მოჰყვა სოციალურ ქსელში მუნიციპალიტეტის სპორტისა და ახალგაზრდულ საქმეთა განყოფილების უფროსის მოვალეობის შემსრულებლის სოფიო ჩხაიძის განცხადებები.
კომისიის დასკვნაში აღნიშნულია, რომ ქალბატონი ჩხაიძე ბატონი ჩხაიძეს სოციალური ქსელის მეშვეობით დაცინვითა და ფარული მუქარით ეხმაურება, მაშინ, როცა თავად ელგუჯა ჩხაიძეს, არც ბიუროს სხდომაზე და არც შემდგომ შეურაცხყოფა არავისთვის მიუყენებია. ეთიკის კომისიის გადაწყვეტილებით, სოფიო ჩხაიძემ დაარღვია სუბორდინაციის ელემენტარული მოთხოვნები და საკუთარ უფლებამოსილებას გადააჭარბა.
"სოციალურ ქსელში სოფიო ჩხაიძეს ელგუჯა ჩხაიძის ლანძღვასა და მუქარაში მხარდამჭერი გამოუჩნდა ლანჩხუთის მუნიციპალიტეტის ადმინისტრაციული სამსახურის პრესასთან და საზოგადოებასთან ურთიერთობის განყოფილების მთავარი სპეციალისტის მოვალეობის შემსრულებლის ნინო მშვიდობაძის სახით. სამწუხაროდ, მშვიდობაძისთვის ეს პირველი შემთხვევა არ არის, როცა ის შეურაცხყოფას აყენებს ელგუჯა ჩხაიძეს. უფრო მეტიც, იგივე სოციალურ ქსელებში გაკეთებული კომენტარებით იგი ღირსების შემლახავ ინფორმაციას ავრცელებდა ლანჩხუთის მუნიციპლიტეტის თანამშრომლებზე ელენე იმნაძესა და მაკა სულაბერიძეზე, რომელიც ჩვენი კომისიის მიერ შესწავლილი და დადასტურებული იყო ჯერ კიდევ 2014 წლის 21 ოქტომბერს და როგორც იკვეთება მაშინ გამგებლის მხრიდან აღნიშნულ საკითხზე რეაგირება არასაკმარისი იყო" , – ვკითხულობთ ეთიკის კომისიის დასკვნაში.
აქვე მშვიდობაძის წინააღმდეგ მუნიციპალიტეტის საკრებულოს სამანდატო, საპროცედურო, იურიდიულ საკითხთა და ეთიკის კომისია სოციალური ქსელით მის მიერ 2014 წლის 21 დეკემბერს გაკეთებულ განცხადებას იშველიებს _" ვცხოვრობთ უკანონო ქვეყანაში არალეგიტიმური ხელისუფლების შემყურე" და კომისიას უჩნდება კითხვა, თუ მშვიდობაძის აზრით, დღევანდელი ხელისუფლება არალეგიტიმურია, მათ შორის თვითმმართველობებიც, მაშინ რატომ გაუჩნდა სურვილი დასაქმებულიყო არალეგიტიმური ლანჩხუთის მუნიციპალიტეტის გამგეობაში, ან რატომ მუშაობდა წინა წლებში ასეთ გამგეობაში. ეთიკის კომისიის დასკვნაში წერია ისიც, რომ მშვიდობაძემ, როგორც საკონკურსო-საატესტაციო კონკურსის აპლიკანტმა, მიზნის მისაღწევად გააყალბა საკუთარი რეზიუმე და დამალა 2012 წლის 22 ივნისს მისი სამსახურიდან გათავისუფლების ფაქტი და რეზიუმეში სხვა სამსახურში გადასვლა მიუთითა.
თავის მხრივ კომისია იმედს იტოვებს, რომ ლანჩხუთის მუნიციპალიტეტის გამგებელი ზაზა ურუშაძე გულდასმით შეისწავლის მომზადებულ დასკვნას და შესაბამის რეაგირებასაც მოახდენს.
