ბუტა რობაქიძის დედის, ია მეტრეველის განცხადებით, პატიმარი ვისაც მისი ლიკვიდაცია ჰქონდა დავალებული, ჯერჯერობით დაკითხული არ არის.
ამის შესახებ ია მეტრეველმა "გურია ნიუსს“ რამდენიმე დღის წინ განუცხადა.
"აბსოლუტურად დაუცველად ვგრძნობ თავს და არა მარტო მე, ყველა ჩვენგანი. ამ საშინელი ტრაგედიის შემდეგ, რისი იმედი უნდა მქონდეს. მით უმეტეს, რომ ჩემზეც იყო ლიკვიდაციის დავალება გაცემული. ის ადამიანი, ვისაც ეს დაავალეს ახლა ნარკოტიკების გამოა დაპატიმრებული, ყველაფერს ამბობს, ვისი დავალებით მოხდა ეს და რატომ, მაგრამ გამოძიება ჯერ დაწყებული არ არის. საქმეც კი არ აღძრეს. დაახლოებით, ერთი წლის წინ დამიკავშირდა ეს პატიმარი ციხიდან, რომელიც დეტალურად ყვება ვინ დაავალა, როგორ, რამდენი იყვნენ და სად მიიღო ეს დავალება. ესეც ყოფილი ხელისუფლების წარმომადგენლებს უკავშირდება. თუმცა, იმასაც ვერ მივაღწიე, რომ საქმე აღეძრათ და ეს პირი დაეკითხათ“, _ აღნიშნავს მეტრეველი.
შეგახსენებთ, რომ სახალხო დამცველი საქართველოს მთავარ პროკურორს, გიორგი ბადაშვილს, შინაგან საქმეთა სამინისტროს ყოფილი თანამშრომლების სავარაუდო დანაშაულებრივი ქმედების შესახებ გამოძიების მოთხოვნით მიმართავს.
საქმე ეხება ერთ-ერთი მსჯავრდებულის მიერ სახალხო დამცველის ოფისისთვის მიწოდებულ ინფორმაციას, პოლიციის ყოფილი მაღალჩინოსნის, ირაკლი ფირცხალავას წინააღმდეგ.
აღნიშნულ პირზე დაყრდნობით, უჩა ნანუაშვილი აცხადებს, რომ ირაკლი ფირცხალავამ მსჯავრდებულს ბუტა რობაქიძის დედის, ია მეტრეველის მკვლელობა დაუკვეთა. ასევე, საუბარი იყო იმაზე, რომ მას უნდა მოეძებნა პირი, რომელიც ზურაბ ვაზაგაშვილის წინააღმდეგ ჩვენებას მისაცემდა, დანაშაულის ჩადენის შესახებ.
მსჯავრდებული ირწმუნება, რომ ირაკლი ფირცხალავა მას ნარკოდანაშაულზე პასუხისმგებლობისგან გათავისუფლებას პირდებოდა. მისივე თქმით, მას სხვა არჩევანი არ ჰქონდა და გარიგებას დათანხმდა. მსჯავრდებული აცხადებს, რომ მას მკვლელობა უნდა განეხორციელებინა ერთ-ერთ მაღაზიაში, ვითომ ყაჩაღობის მიზნით, რის შემდეგაც მას დააკავებდნენ, თუმცა ციხეში პრივილეგირებულ პირობებში ამყოფებდნენ, მათ შორის უზრუნველყოფილი იქნებოდა ნარკოტიკული ნივთიერებებით.
მსჯავრდებული ამ შეთანხმებიდან მალე საქართველოდან წავიდა, აგვისტოს ომის დროს, 2008 წელს დაბრუნდა და შეხვდა შსს-ს მაღალჩინოსნებს, რომლებმაც დაკვეთილი მკვლელობის გადავადება მოითხოვეს იმ მიზეზით, რომ საქმე აქტუალური აღარ იყო. მოგვიანებით, მსჯავრდებულმა კიდევ ერთხელ დატოვა საქართველო, თუმცა დაბრუნებისთანავე დააკავეს და ნარკოდანაშაულის ბრალდებით პატიმრობა შეეფარდა.
სახალხო დამცველის თქმით, ამ მოწმის და მკვლელობის დაკვეთის შესახებ ინფორმაცია ია მეტრეველმა არაერთხელ გააჟღერა, თუმცა მოწმე ჩვენების მიცემაზე უარს აცხადებდა წინა ხელისუფლების პირობებში, ასევე მას შემდეგაც, თუმცა რამდენიმე დღის წინ მან აზრი შეიცვალა და მისი უსაფრთოების უზრუნველყოფის მოთხოვნით, სახალხო დამცველს ეს ინფორმაცია მიაწოდა.
უჩა ნანუაშვილმა მსჯავრდებულის უსაფრთხოების დაცვის მოთხოვნით სასჯელაღსრულების მინისტრს, გიორგი მღებრიშვილსაც მიმართა.
სახალხო დამცველი პროკურატურას ამ საქმის გამოძიებას და აღნიშნული მოწმის უსაფრთხოების დაცვას სთხოვს.
