საქმე ესპანელ მხატვარ აუგუსტო ფერრერ დალმაუს ეხება, რომელიც საქართველოს ხელისუფლების მიწვევით ავღანეთში მოგზაურობდა და ამ მოგზაურობას 5 ნახატი მიუძღვნა. 15 ნამუშევრის შექმნას კი მომავალში აპირებს.
იგი ესპანელებს უყვება, რომ ავღანეთის გულში, სადაც ტერორისტების საფრთხე ყოველ ფეხის ნაბიჯზეა, იქ მყოფი ქართველი სამხედროების დახმარებით, ოპიუმით ცნობილი პროვინციები მოიარა და ნანახით აღფრთოვანებული დარჩა.
ფერრერ დალმაუს მონათხრობი ესპანურენოვან ბლოგზე – www.bellumartis.blogspot.com -ი არის განთავსებული, რომელიც ხშირად აქვეყნებს სამხედრო ისტორიასთან და ხელოვნებასთან დაკავშირებულ მასალებს.
"…საქართველოს ხელისუფლების მიწვევით აუგუსტო ფერრერ დალმაუს გულმა ავღანეთის საშიშ უდაბნოებში მოგზაურობისაკენ გაუწია. სადაც მან საქართველოს გენერალური შტაბის მეთაურთან, გენერალ-მაიორ ვახტანგ კაპანაძესთან, ბრიგადის მეთაურ ვიცე-პოლკოვნიკ დიმიტრი კიკნაძესთან დაზაზა ჩხაიძესთან ერთად იმოგზაურა", _ აღნიშნულია დალმაუს მოგზაურობის შესახებ ბლოგზე განთავსებულ მასალაში.
" ჩვენი ყოფილი აღმოსავლეთ იბერიის, დღეს საქართველოდ წოდებული ქვეყნის ჯარისკაცებთან ერთად ვიყავით. ქაბულიდან ჰელმუნდის პროვინციაში, ლაშხარგაჰში, იქიდან კი ამერიკელთა სამხედრო ბაზაზე, კემპლათერნეკში წავედით, სადაც 31 ქვეითი ბატალიონის ბათუმის მესამე ბრიგადაა განთავსებული", – ამბობს მხატვარი, რომელსაც ავღანეთში მყოფმა სამხედროებმა, ოპიუმით განთქმული ჰელმუნდის პროვინცია და ყანდაგარის მიმდებარე რაიონები მოატარეს.
რისთვის დაპატიჟა საქართველოს ხელისუფლებამ ჩვენთან ნაკლებად ცნობილი ესპანელი მხატვარი ავღანეთში სამოგზაუროდ და რა თანხა დაჯდა ეს? ამის შესახებ ბლოგში არაფერია ნათქვამი, მაგრამ აუგუსტო ფერრერ დალმაუ, რომ თანამედროვე მსოფლიოს ძალიან ცნობილ და ძვირადღირებულ ბატალისტად (საბრძოლო სცენების მხატვარი) არის ცნობილი, ამაში ინტერნეტ სივრცეში არსებული მასალებითაც ადვილად დარწმუნდება მკითხველი.
იგი კატალონიელია და მეორემსოფლიოს თემატიკაზე შექმნილი მისი ნამუშევრები საყოველთაოდ არის ცნობილი. მათი ფასიც საკმაოდ მაღალია და ბევრისთვის ხელმიუწვდომელი. ნაკლებად დასაჯერებელია, რომ ასეთი დონის მხატვრის ავღანეთში დაპატიჟება საქართველოს ხელისუფლებას ცოტა თანხა დაჯდომოდა.
ქართულ საზოგადოებას გასული წელს საშუალება ჰქონდა ბათუმში სასტუმრო "შერატონში" გამოფენილი ამ მხატვრის ხუთი ნამუშევრის ნახვის. მაშინ, ეს გამოფენა იმდროინდელმა ყოფილმა თავდაცვის მინისტრმა ირაკლი ალასანიამ გახსნა და კომენტარის დროს კი განაცხადა, რომ ეს პროექტი ქართველი სამხედრო მოსამსახურეების მიერ ავღანეთის მისიაში გაღებულ წვლილს ეძღვნება.
"ჩვენი ბიჭები მსოფლიოს უსაფრთხოებისა და სტაბილურობისთვის ბრძოლას დღესაც განაგრძობენ. საქართველო მზად არის ეს კურსი გააგრძელოს. ჩვენი სწრაფვა ევრო-ატლანტიკურ სტრუქტურებში გაწევრიანებისკენ შეუქცევადია. საქართველო ავღანეთში 2014 წლის შემდეგაც დარჩება.
აუგუსტოს ნახატებში კარგად ჩანს როგორც ჩვენი სამხედროების მებრძოლი სული, ასევე, ის რთული გარემო, სადაც მათ უწევთ ცხოვრება."
თუმცა, ალასანიას სიტყვა არ უხსენებია იმის შესახებ, რომ "ქართველი სამხედროების მებრძოლის სულის დასანახად მხატვრის მოგზაურობის ხარჯები ჩვენი ქვეყნის ბიუჯეტიდან დაიფარა.
თუმცა, ამას არ უარყოფს საქართველოს თავდაცვის სამინისტროს პრესცენტრი, რომელმაც "გურია ნიუსს" შეკითხვაზე თუ ვინ გაიღო უცხოელი მხატვრის მოგზაურობის ხარჯები, წერილით უპასუხა.
"2014 წლის 19-25 აპრილს, ავღანეთის რესპუბლიკაში, ჰელმანდის პროვინციაში, ესპანელი მხატვრის, ფერერ დალმაუს და მწერლის, ლუკას მოლინა ფრანკოს ტრანსპორტირება და ბაზაზე განთავსება უზრუნველყო საქართველოს თავდაცვის სამინისტრომ მაშინდელი მინისტრის, ირაკლი ალასანიას ბრძანების საფუძველზე. პროექტი განხორციელდა ესპანეთის სამეფოში საქართველოს ელჩის, ზურაბ პოლოლიკაშვილის ინიციატივით."
ეს არის ის პასუხი, რომელიც დროის მოკლე მონაკვეთში თავდაცვის სამინისტრომ "გურია ნიუსს" მიაწოდა. თუმცა, ეს არ არის სრული ინფორმაცია იმის შესახებ, თუ რა თანხა დაჯდა ეს მოგზაურობა და გარდა ამისა, საქართველოს ხელისუფლებამ რა თანხა გადაუხადა ესპანელ მხატვარს ჰონორარის სახით. ამ ინფორმაციის მოპოვებას "გურია ნიუსი" მომავლაში შეეცდება.
თავდაცვის სამინისტროს პასუხში ესპანელ მხატვართან ერთად მწერალი ლუკას მოლინა ფრანკოა ნახსენები, რომელსაც ქართველ ჯარისკაცებზე წიგნი უნდა დაეწერა.
ამ დღეებში ავღანურ მოგზაურობაში მიღებული შთაბეჭდილებებით შექმნილი ტილოები და "ქართველების ავღანურ მისიაზე" დაწერილი წიგნი, ესპანურ ქალაქებში გამოფინა.
გამოფენას ქალაქ ვაიადოლიდის მერიაში საქართველოს დელეგაციაც ესწრებოდა. მათ შორის საქართველოს თავდაცვის მინისტრი მინდია ჯანელიძეც. აუგუსტო ფერერ დალმაუ და ლუკას მოლინა ფრანკო კი საქართველოს შეიარაღებული ძალების განვითარებაში შეტანილი მნიშვნელოვანი წვლილისთვის უწყებრივი მედლებით "გენერალი კვინიტაძე" დააჯილდოვეს.
